བདུད་ཀྱི་རིས་ཀྱི་ལྷ་རྣམས་ཐམས་ཅད་ཀྱིས་མི་མཐོང་བར་འགྱུར་རོ། །ཕྱིས་ཀྱང་བགེགས་བྱེད་པར་མི་ནུས་ཏེ་བར་ཆད་བགྱིད་པར་མི་འགྱུར་རོ། །བདེ་བ་སྒྲུབ་པའི་ཆོ་ག་དང་བཟླས་བརྗོད་ཀྱི་ཆོ་ག་འགྲུབ་པར་འགྱུར་རོ། །མིག་ལ་བྱུགས་ཏེ་སྐྱེ་བོ་མང་པོའི་ནང་དུ་ཞུགས་ན་དེ་དག་ཐམས་ཅད་དབང་དུ་གྱུར་ཏེ། ནོར་དང་། འབྲུ་དང་། གོས་དང་། ལྷབ་ལྷུབ་རྒྱན་ཕལ་པོ་ཆེ་འགྲུབ་པར་འགྱུར་རོ། །བུད་མེད་ཀྱང་མིག་མི་འཛུམས་པར་ལྟ་བཞིན་དུ་བདག་ཉིད་དམ་ནོར་དབང་དུ་འགྱུར་རོ། །མིག་ལ་བྱུགས་ཏེ་དགོན་པོ་ཆེན་པོར་ཞུགས་ན། ཆོམ་པོ་དང་། གཡོན་ཅན་དང་། རྐུན་པོ་དང་། གཅན་གཟན་གདུག་པ་དང་། སྦྲུལ་དང་། དབྱིག་དུག་དང་། སྦྲུལ་གྱི་དུག་གི་འཇིགས་པ་ཐམས་ཅད་འབྱུང་བར་མི་འགྱུར་ཏེ། བདེ་ལེགས་སུ་སླར་མཆི་བར་འགྱུར་རོ། །འཐབ་མོ་དང་རྩོད་པ་དང་འགྱེད་པ་ཐམས་ཅད་ལ་མིག་སྨན་བསྐུས་ན། སྨྲ་བ་རྣམས་ཀྱི་བླ་ན་མེད་པར་འགྱུར་ཏེ། ཐམས་ཅད་དུ་རྒྱལ་བར་འགྱུར་རོ། །གཡུལ་ངོར་གཡུལ་འགྱེད་པའི་ནང་དུ་མཆིས་ནས་མིག་ལ་བྱུགས་ན། ཐམས་ཅད་ལས་རྒྱལ་བར་འགྱུར་ཞིང་། འཇིགས་པ་ཐམས་ཅད་ལས་བསྒྲལ་བར་འགྱུར་རོ། །གདུག་པས་ཟིན་པ་ཐམས་ཅད་ལ་མིག་ལ་བསྐུས་ན། གདུག་པ་མ་མཆིས་པར་འགྱུར་རོ། །རིམས་ཞག་གཅིག་པ་དང་། ཞག་གཉིས་པ་དང་། ཞག་གསུམ་པ་དང་། རིགས་ཞག་བཞི་བ་ཐམས་ཅད་ལ་མིག་ལ་བསྐུས་ན། རིམས་ཐམས་ཅད་ལས་གྲོལ་བར་འགྱུར་རོ། །དུག་མི་བཟད་པར་འཚལ་བ་ལ་མིག་ལ་བསྐུས་ན་དུག་མ་མཆིས་པར་འགྱུར་རོ། །གདོན་ཐམས་ཅད་ཀྱིས་ཟིན་པ་ལ་མིག་ལ་བསྐུས་ན། གདོན་བརྒྱད་ཁྲི་བཞི་སྟོང་ལས་ཐར་བར་འགྱུར་རོ། །མིག་བྲོ་འཚལ་བ་ལ་བསྐུས་པ་ཙམ་གྱི་མོད་ལ་བྱང་བར་འགྱུར་རོ། །ཀླད་པ་ཆེར་བྲོ་འཚལ་བ་ཡང་མིག་ལ་བསྐུས་པ་ཙམ་གྱིས་བྱང་བར་འགྱུར་རོ། །ཚངས་པའི་སྲིན་པོའི་གདོན་དང་། བརྗེད་བྱེད་ཀྱིས་ཟིན་པ་ལ་ཡང་མིག་ལ་བསྐུས་པ་ཙམ་གྱིས་ཐར་བར་འགྱུར་རོ། །རྒྱལ་པོ་ཁྲོས་པས་གསོད་པར་འོས་པ་གང་སུ་ཡང་རུང་བ་ཁྲིད་པ་ལ་མིག་ལ་བསྐུས་པ་ཙམ་གྱིས་འཇིགས་པ་ཐམས་ཅད་སྤངས་པའི་ཐར་བར་འགྱུར་རོ། །ནག་པོ་ཆེན་པོའི་མིག་ལ་བསྐུས་ན་རང་གི་གཟུགས་ཀྱིས་དུས་སུ་མདུན་ན་མཆིས་ནས་མཆོག་ཐམས་ཅད་སྩོལ་ཅིང་དགོས་པ་ཐམས་ཅད་བགྱིད་པར་འགྱུར་རོ།