།དེ་ནས་གཡུལ་འགྱེད་པའི་ཕ་རོལ་གྱི་དཔུང་རྣམས་ཕམ་པར་གྱུར་ནས། ཕྱོགས་བཅུར་འཁྲུགས་ནས་འབྱེར་བར་འགྱུར་རོ། །ཕྱི་ནས་ལན་འགའ་ཡང་ཕ་རོལ་གྱི་དཔུང་དང་། དགྲའི་འཇིགས་པ་འབྱུང་བར་མི་འགྱུར་རོ། །ཕ་རོལ་གྱི་དགྲ་དང་མི་མཛའ་བའི་འཇིགས་པ་འབྱུང་བར་མི་འགྱུར་རོ། །ལག་པས་ནོར་བུ་བཟུང་ནས་ཕུག་གི་གནས་སུ་ཞུགས་ན། གནས་ཀྱི་སྒོ་ཐམས་ཅད་འབྱེ་བར་འགྱུར་རོ། །གནས་ན་གནས་པ་ཐམས་ཅད་མདུན་དུ་མཆིས་པར་འགྱུར་རོ། །ཀླུའི་གནས་ཐམས་ཅད་དུ་མཆིས་ནས། ལག་པས་ནོར་བུ་བཟུང་སྟེ། གནས་ཀྱི་ནང་དུ་ཞུགས་ན། ཆབ་ཐམས་ཅད་ཀྱིས་ཕྱིར་མི་ཚུགས་པར་འགྱུར་རོ། །དེ་ནས་ཀླུ་ཐམས་ཅད་མདུན་ན་མཆིས་ནས། བདེན་པར་དམ་བཅའ་བར་འགྱུར་རོ། །དབང་དུ་གྱུར་ནས་ཇི་སྲིད་འཚོའི་བར་དུ་ལས་བགྱིད་པར་འགྱུར་རོ། །བསྒོ་བ་བཞིན་བགྱིད་པར་འགྱུར་རོ། །ལོ་ཏོག་དང་རྩྭ་དང་། ཤིང་གེལ་བ་དང་། ནགས་ཚལ་ཐམས་ཅད་བདེ་བར་འཕེལ་བར་འགྱུར་རོ། །མཉེན་ཅིང་མདངས་དང་ལྡན་པ་དང་མཉེན་པར་འགྱུར་རོ། །གཟི་བརྗིད་དང་ལྡན་པ་དང་། དྲན་པ་དང་ལྡན་པ་དང་མི་བདེ་བ་ཡང་ཆུང་བར་འགྱུར་རོ། །སེམས་ཅན་གང་དག་གིས་ཀྱང་ལོ་ཏོག་དང་། མེ་ཏོག་དང་། འབྲས་བུ་ལ་ལོངས་སྤྱོད་པར་འགྱུར་བ་དེ་དག་ཐམས་ཅད་དང་། གཞན་ཆེས་མང་པོ་དག་གིས་དགོས་པ་མང་པོ་བགྱིད་པར་འགྱུར་བ་ནི། ནོར་བུ་ཆེན་པོ་དོན་ཡོད་འབར་བའི་ནོར་བུ་མེ་འབར་བ་ཆེན་པོ་ལགས་སོ། །དེ་ནས་དོན་ཡོད་སྣང་བ་རྣམ་པར་བལྟ་བས། འཕགས་པ་སྤྱན་རས་གཟིགས་དབང་ཕྱུག་བཀུག་སྟེ། རང་གི་གཟུགས་སུ་ལྟ་བར་འཚལ་ན། དེ་ནས་རིག་སྔགས་འཆང་གཙང་མས་གོས་གཙང་མ་བགོ་བར་བགྱིའོ། །ལུས་ལེགས་པར་བཀྲུས་ཏེ། སྤོས་ཆབ་ཀྱིས་བྱུག་པར་བགྱིའོ། །ཤིང་ཨརྐའི་ཡམ་སྲེག་ཤིང་གིས་མེ་སྦར་བར་བགྱིའོ། །ཡུངས་ཀར་དང་། ཨ་ག་རུ་དང་། ཙནྡན་དང་། ཞོ་དང་། སྦྲང་རྩི་དང་མར་སྦྱར་བས་སྟོང་རྩ་བརྒྱད་སྦྱིན་སྲེག་བགྱིའོ། །དེ་ནས་དོན་ཡོད་ལྕགས་ཀྱུ་གུ་གུལ་ལ་ལན་ཉི་ཤུ་རྩ་གཅིག་གི་སྲེག་བླུགས་ཀྱིས་སྦྱིན་སྲེག་བགྱིས་ན། འཕགས་པ་སྤྱན་རས་གཟིགས་དབང་ཕྱུག་རང་གི་གཟུགས་ཀྱིས་མདུན་ན་མཆིས་ནས། མཆོག་ཐམས་ཅད་བསམས་པ་བཞིན་ཡོངས་སུ་རྫོགས་པར་བགྱིད་དོ།