ཇི་སྲིད་འཚོའི་བར་དུ་བསྒོ་བ་བཞིན་མཆིས་པར་འགྱུར་རོ། །རྨ་མ་བྱུང་བའི་མི་རོ་ལ། དྲི་ཆབ་ཀྱིས་ཁྲུས་བགྱིས་ལ་ལ་དུ་ལ་ལན་ཉི་ཤུ་རྩ་གཅིག་བཟླས་བརྗོད་བགྱིས་ཏེ། ལག་པ་གཉིས་སུ་ལ་དུ་སྩལ་ལ། གོས་དཀར་པོས་རོ་གཡོགས་ནས། ཁྲོ་བོའི་རྒྱལ་པོ་ཆབ་དང་ཡུངས་ཀར་ལ་ལན་བདུན་བཟླས་ནས་དབང་བསྐུར་ན་ཅི་དྲིས་པ་དེ་དག་ཐམས་ཅད་སྨྲ་བར་འགྱུར་ཏེ། བདེ་བ་དང་ལོ་ལེགས་པ་དང་། ལོ་ནོངས་པ་དང་། ནད་དང་། གནོད་པ་དང་། འཚེ་བ་དང་། ཕ་རོལ་གྱི་དཔུང་དང་། ཕས་ཀྱི་དགྲ་བོ་དང་། མི་མཛའ་བའི་འཇིགས་པ་དང་། མི་ངས་དང་། ཡམས་ཀྱི་ནད་དེ་དག་ཐམས་ཅད་སྨྲ་བར་འགྱུར་རོ། །ལྷའི་འཇིག་རྟེན་དུ་སྐྱེ་བའམ། སངས་རྒྱས་ཀྱི་ཞིང་དུ་སྐྱེ་བ་སྨྲ་བར་འགྱུར་ཞིང་། དམྱལ་བར་སྐྱེ་བ་སྨྲ་བར་འགྱུར་རོ། །ཚེ་རིང་བའམ་ཚེ་ཐུང་བ་སྨྲ་བར་འགྱུར་རོ། །དུས་མ་ལགས་པའི་འཆི་བ་སྨྲ་བར་འགྱུར་རོ། །གཏེར་གྱི་གཏམ་སྨྲ་བར་འགྱུར་ཏེ། ནོར་བསྒྱུར་བའི་གཏམ་མམ། ཞིང་གི་གཏམ་མམ། མིག་འཕྲུལ་གྱི་གཏམ་སྨྲ་བར་འགྱུར་རོ། །ཆོ་ག་ཞིབ་མོ་འགྲུབ་པ་དང་། གསང་སྔགས་འགྲུབ་པ་དང་། ཕྱག་རྒྱའི་དཀྱིལ་འཁོར་འགྲུབ་པ་སྨྲ་བར་འགྱུར་རོ། །མིག་སྨན་འགྲུབ་པ་དང་རིལ་བུ་འགྲུབ་པ་སྨྲ་བར་འགྱུར་རོ། །ནམ་མཁའ་ལ་མཆི་བ་དང་། མི་གདའ་བར་བགྱི་བ་དང་། རོ་ལངས་བསླང་བ་དང་། རིགས་མ་དག་པ་དང་། དགྲ་ཆད་པས་བཅད་ཅིང་དབང་དུ་བགྱི་བ་དེ་དག་ཐམས་ཅད་སྨྲ་བར་འགྱུར་རོ། །སྒྱུ་ཐབས་སྨྲ་བར་འགྱུར་རོ། །ཉམས་པ་སྨྲ་བར་འགྱུར་རོ། །འཕེལ་བ་སྨྲ་བར་འགྱུར་བ་ནས་བསྐལ་པ་ལས་འདས་པའི་འདས་པ་དང་། མ་འོངས་པའི་དང་། ད་ལྟར་བྱུང་བའི་བར་དུ་སྨྲ་བར་འགྱུར་རོ། །དེ་ནས་རིག་སྔགས་འཆང་གིས་ཆབ་ཀྱི་ཁར་སྩལ་ལ་ལ་དུ་བླངས་ན་རོ་འགྱེལ་བར་འགྱུར་རོ། །ལ་དུ་ལ་ལན་ཉི་ཤུ་རྩ་གཅིག་བཟླས་བརྗོད་བགྱིས་ནས། རྒྱལ་པོའི་སྒོར་བསྣུན་ན། རྒྱལ་པོའི་བཙུན་མོ་འཁོར་དང་བཅས་པ་བདག་ཉིད་དམ། ནོར་དབང་དུ་གྱུར་ནས་མཆིས་པར་འགྱུར་རོ། །གྲོང་ཁྱེར་གྱི་སྒོར་བསྣུན་ན། གྲོང་ཁྱེར་ན་གནས་པའི་སྐྱེས་པའམ། བུད་མེད་དམ། ཁྱེའུ་དང་བུ་མོ་ཐམས་ཅད་དབང་དུ་གྱུར་ནས་མཆིས་པར་འགྱུར་ཞིང་། ནོར་ཆེན་པོ་འདུ་བ་འགྲུབ་པ་ཐོབ་པར་འགྱུར་རོ། །