དེའི་འོག་ཏུ་ཤིད་ཀ་ར་བཱི་རའི་མེ་སྦར་ནས། བསྒོངས་པ་རེ་རེ་ལ་ལན་བདུན་བཟླས་བརྗོད་བགྱིས་ནས། མེའི་ནང་དུ་སྦྱིན་སྲེག་བགྱིས་ཏེ། ཉིན་ལན་གསུམ་མཚན་ལན་གསུམ་དུ་བརྒྱ་རྩ་བརྒྱད་ཙམ་སྦྱིན་སྲེག་བགྱིའོ། །དེ་ནས་རིག་སྔགས་འཆང་ཡུངས་ཀར་དང་མེ་ཏོག་ཅི་རྙེད་པ་དང་བསྲེས་ཏེ། ལན་ཉི་ཤུ་རྩ་གཅིག་བཟླས་བརྗོད་བགྱིས་ནས་མེའི་དབུས་སུ་སྩལ་བར་བགྱིའོ། །འབྲས་ཡོས་དང་། ཡུངས་ཀར་ལ་ཁྲོ་བོའི་རྒྱལ་པོ་ལན་བརྒྱ་རྩ་བརྒྱད་བཟླས་ནས་གཏོར་བར་བགྱིའོ། །དེ་ནས་མེའི་དབུས་ནས་མེ་ལྷ་ལུས་ཕྱེད་ཙམ་ཕྱུང་ནས། རིན་པོ་ཆེ་སྣ་བདུན་ལས་བགྱིས་པའི་སྣོད་ཟས་བསྒོངས་པས་བཀང་ནས། རིག་སྔགས་འཆང་ལ་རིག་སྔགས་འཆང་ཁྱོད་ཀྱིས་ཟས་བསྒོངས་པ་བསྒྲུབ་པའི་ཆོ་ག་གྲུབ་ཟིན་གྱིས། ལྷའི་ཟས་བསྒོངས་པ་ཆེན་པོ་ལོང་ཤིག་ཅེས་སྟོབས་པར་བགྱིད་དོ། །དེ་ནས་རིག་སྔགས་འཆང་གིས་ཟས་བསྒོངས་པའི་སྣོད་དེ་བླང་བར་བགྱིའོ། །བླངས་པ་ཙམ་ཁོ་ནས་བཅུད་ཀྱིས་ལེན་དུ་གྱུར་ནས། ནམ་མཁའ་ལ་འཕུར་བར་འགྱུར་རོ། །སྐྲ་ཅུང་ཟད་འཁྱིལ་བར་ཡང་འགྱུར་རོ། །པགས་པ་ཡོངས་སུ་དག་པར་འགྱུར་རོ། །རིག་སྔགས་འཆང་འཁོར་ལོས་སྒྱུར་བར་འགྱུར་རོ། །རིག་སྔགས་འཆང་གིས་འཁོར་ལོས་སྒྱུར་བ་དྲུག་ཁྲི་བརྒྱད་སྟོང་གིས་ཡོངས་སུ་བསྐོར་བར་འགྱུར་རོ། །མེ་ལྷ་གནས་དང་གཞལ་མེད་ཁང་དང་བཅས། འཁོར་དང་བཅས་པ་དབང་དུ་མཆིས་ནས། ལས་ཐམས་ཅད་བགྱིད་པར་འགྱུར་རོ། །གང་དང་གང་གིས་ཟས་བསྒོངས་པ་ལ་རེག་པ་དེ་ཡང་ཐོས་པ་བསགས་པའི་རྒྱ་མཚོ་ཆེན་པོར་འགྱུར་རོ། །དོན་ཡོད་ཞགས་པའི་སྙིང་པོ་བྱང་ཆུབ་སེམས་དཔའ་ཐམས་ཅད་ཀྱིས་ཕྱག་བགྱིས་པ་རྣམ་པར་གྲོལ་བའི་དཀྱིལ་འཁོར་ཕྱག་རྒྱ་དང་། གསང་སྔགས་རིམ་པར་དབྱེ་བ་དང་བཅས་པ་ཆོ་ག་ཞིབ་མོ་མཐའ་དག་རྫོགས་པར་ཁ་ཏོན་དུ་གནས་པ་འདི། ཉིན་གཅིག་བཞིན་ཤློ་ཀ་སྟོང་ཀློག་གམ་འཆང་བར་བགྱིད་ན། ཚེ་བརྗེས་ནས་འཇིག་རྟེན་གྱི་ཁམས་བདེ་བ་ཅན་དུ་སྐྱེ་བར་འགྱུར་རོ། །པདྨ་ལས་བརྫུས་ཏེ་སྐྱེས་ནས་སྐྱེ་བ་དྲན་པར་འགྱུར་རོ། །ལན་འགའ་ཡང་ཕྱིས་དྲན་པ་བརྗེད་པར་མི་འགྱུར་རོ། །ཚིག་བཙན་པར་འགྱུར་ཏེ། སེམས་ཅན་ཐམས་ཅད་ཀྱི་སྙིང་དུ་སྡུག་པར་འགྱུར་རོ། །