ཆོས་ཀྱིས་འཁོར་ལོ་བསྐོར་བ་ནས་ཡོངས་སུ་མྱ་ངན་ལས་འདས་པའི་བར་དུ་ཚེའི་ཚད་གཅིག་ཙམ་དུ་སྐྱོང་བར་བགྱིད་དོ། །དེ་བཞིན་དུ་གྲུབ་པ་བླ་ན་མེད་པ་ཆེན་པོ། འཕགས་པ་སྤྱན་རས་གཟིགས་དབང་ཕྱུག་ཉིད་བྱང་ཆུབ་ཀྱི་སྙིང་པོ་ལ་ཐུག་གི་བར་དུ་རྟག་ཏུ་རྗེས་སུ་འབྲང་བར་འགྱུར་ཏེ། དེ་ལྟར་ཟས་ཀྱི་གོང་བུ་སྒྲུབ་པའི་ཆོ་ག་ཤིན་ཏུ་རྙེད་པར་དཀའ་ལགས་སོ། །ཕྱོགས་བཅུ་མཐའ་དག་གི་སངས་རྒྱས་ཀྱི་ཞིང་ཐམས་ཅད་ཀྱི་དེ་བཞིན་གཤེགས་པ་ཐམས་ཅད་དང་ལྷན་ཅིག་འགྲོགས་ནས་མཆི་བར་འགྱུར། དེ་བཞིན་གཤེགས་པ་ཐམས་ཅད་ལས་མངོན་སུམ་དུ་ཆོས་ཉན་པ་ཐོས་པར་འགྱུར་རོ། །དེའི་འོད་ཟེར་འབར་བའི་སྙིང་པོས་སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་སྣང་བར་འགྱུར་རོ། །དོན་ཡོད་པའི་ཞགས་པ་འཕགས་པ་སྤྱན་རས་གཟིགས་དབང་ཕྱུག་གི་སྙིང་པོ་བྱང་ཆུབ་སེམས་དཔའ་ཐམས་ཅད་ཀྱིས་ཕྱག་བགྱིས་པ་རྣམ་པར་གྲོལ་བའི་དཀྱིལ་འཁོར་གྱི་གསང་སྔགས་དང་ཕྱག་རྒྱ་རིང་བར་ཕྱེ་བའི་ཆོ་ག་ཞིབ་མོ་མཐའ་དག་རྫོགས་པར་བསྒྲུབ་པའི་ཆོ་ག་ཐམས་ཅད་དང་། ཆོ་ག་ཞིབ་མོ་རྒྱ་ཆེན་པོ་མཐའ་དག་གི་དཀྱིལ་འཁོར་འདི་ཁོ་ན་ཉིད་དུ་གནས་པར་འགྱུར་ལགས་སོ། །ཀླུའི་རྒྱལ་པོ་བྱེ་བ་ཕྲག་བརྒྱ་སྟོང་རྣམས་དེའི་དབང་དུ་གྱུར་ནས་རྟག་པར་རྒྱུན་དུ་མཆི་བར་འགྱུར་རོ། །ལྷ་དང་། ཀླུ་དང་། གནོད་སྦྱིན་དང་། དྲི་ཟ་དང་། ལྷ་མ་ཡིན་དང་། ནམ་མཁའ་ལྡིང་དང་། མིའམ་ཅི་དང་། ལྟོ་འཕྱེ་ཆེན་པོ་ཐམས་ཅད་དབང་དུ་གྱུར་ནས་མཆིས་པར་འགྱུར་རོ། །འོག་མིན་གྱི་གནས་ཀྱི་ལྷ་རྣམས་རིག་སྔགས་འཆང་དེའི་ཕྱི་བཞིན་རྟག་ཏུ་འབྲང་ཞིང་རྟག་པར་རྒྱུན་དུ་ཡོངས་སུ་བསྐོར་བར་འགྱུར་རོ། །ལྷའི་རོ་བྲོ་བའི་མཆོག་དང་ལྡན་པའི་གཞལ་མེད་ཁང་རྣམ་པ་སྣ་ཚོགས་དག་ལྷུན་གྱིས་གྲུབ་པར་འབྱུང་བར་འགྱུར་རོ། །དེ་བཞིན་དུ་གོས་དང་། ལྷབ་ལྷུབ་དང་། རྒྱན་སྣ་ཚོགས་དང་ལྡན་པའི་གཞལ་མེད་ཁང་དག་འབྱུང་བར་འགྱུར་ཏེ། དེ་ལ་སོགས་པ་སྦྱིན་སྲེག་གི་ཆོ་ག་དོན་ཡོད་པ་སྒྲུབ་པ་དག་འབྱུང་བར་འགྱུར་བའི་གྲུབ་པ་འཐོབ་པར་འགྱུར་རོ། །འོན་ཏེ་སྐལ་བ་ཆུང་བ་སངས་རྒྱས་དང་བྱང་ཆུབ་སེམས་དཔའི་ས་བོན་མ་མཆིས་པ་ཞིག་མཆིས་ལ་དེས་སྣོད་དེ་བླངས་པ་ཙམ་གྱི་མོད་ལ་རྒྱལ་སྲིད་ཀྱི་དབང་ཕྱུག་ཐོབ་པར་འགྱུར་ཏེ། ལྷ་དང་མིའི་དཔལ་ཉམས་སུ་མྱོང་བར་འགྱུར་རོ།