དམྱལ་བའི་སྡུག་བསྔལ་བཅུ་དྲུག་ལས་གྲོལ་བར་བགྱིད་པ། འཇིགས་པ་མི་བཟད་པ་བརྒྱད་རྟག་ཏུ་འཕྲོག་པ། མི་མཛའ་བ་རྣམས་འཇོམས་པ། ཕ་རོལ་གྱི་དཔུང་ལྡོག་པའི་མཆོག །ནད་ཐམས་ཅད་འཇོམས་པ། མོད་ལ་འཐབ་པ་དང་། འཐབ་མོ་དང་། རྩོད་པ་དང་། འགྱེད་པ་ཞི་བར་བགྱིད་པ། མུ་གེའི་དགོན་པ་འཇིག་པར་བགྱིད་པ། ཡམས་ཀྱི་ནད་དང་གནོད་པ་འཇོམས་པ། ལྷའི་བདེ་བ་འདྲེན་པར་བགྱིད་པའི་མཆོག་དེ་ཁོ་ན་ཉིད་ཀྱི་སངས་རྒྱས་སྒྲུབ་པ། སངས་རྒྱས་ཀྱི་བྱང་ཆུབ་བླ་ན་མེད་པའི་མཆོག་ཐམས་ཅད་སྒྲུབ་པར་བགྱིད་པ། སེམས་ཅན་ཐམས་ཅད་ཀྱི་ཐུན་མོང་མཆོག་སྦྱིན་ཤིན་ཏུ་རྙེད་པར་དཀའ་བ་ལྷ་རྣམས་རྟག་ཏུ་མགུ་བར་འགྱུར་བ། ཀླུ་རྣམས་དགའ་བ་འཐོབ་པར་འགྱུར་བ། དེ་བཞིན་གཤེགས་པ་རྣམས་རྟག་ཏུ་ཉིན་མཚན་དུ་གཟིགས་པར་སོམ་ཉི་མ་མཆིས་པ། བྱང་ཆུབ་སེམས་དཔའ་རྣམས་དགའ་བར་འགྱུར་བ། དུས་ཀུན་དུ་ཤིན་ཏུ་མཉམ་པར་བཞག་པས། འཇིག་རྟེན་དབང་ཕྱུག་མཆོག་སྦྱིན་རྟག་ཏུ་མཆིས་པར་སོམ་ཉི་མ་མཆིས་པར་རྒྱལ་པོ་ཆེན་པོ་བཞི་འཁོར་དང་བཅས་བློན་པོ་དང་བཅས་པ་བསྲུང་བའི་དོན་དུ་ཐམས་ཅད་དུ་རྟག་ཏུ་རྗེས་སུ་འབྲང་བར་འགྱུར་ལགས་སོ། །དེ་ནས་རིག་སྔགས་འཆང་ཤེས་རབ་དང་ལྡན་པས། གཙང་མའི་གནས་སུ་མཆིས་ནས་སྦྱིན་སྲེག་བགྱི་སྟེ། གཙང་མ་ཡི་ནི་ས་ཕྱོགས་སམ། །ཅ་ཅོ་མ་མཆིས་དབེན་པར་ནི། །ཞི་བ་དང་ནི་རྒྱས་པ་དང་། །དྲག་ཤུལ་སྤྱོད་པ་རྣམས་བགྱིའོ། །ཞི་བ་སེམས་ཅན་ཐམས་ཅད་ཀྱི། །དོན་དུ་སྡིག་པ་ཐམས་ཅད་འཇོམས། །རྒྱས་པ་རྒྱས་པ་ཐོབ་འགྱུར་ཏེ། །ཐམས་ཅད་ཕུན་སུམ་ཚོགས་པར་འགྱུར། །དགྲ་དང་ལོག་འདྲེན་གདུག་པ་དང་། །གནོད་སྦྱིན་སྲིན་པོ་གསང་བ་པ། །གདུག་སེམས་ཅན་རྣམས་བྲེད་པ་དང་། །སྐྲག་པར་སྡིགས་པ་དྲག་ཤུལ་སྤྱོད། །གསང་སྔགས་སྒྲུབ་པའི་སྦྱིན་སྲེག་སྟེ། །གསང་སྔགས་སྒྲུབ་པ་བླ་ན་མེད། །འཇིག་རྟེན་འཇིག་རྟེན་ཕ་རོལ་གྱི། །སྦྱིན་སྲེག་གི་ནི་ལས་བགྱིའོ། །མེ་ལྷའི་ལྷ་དང་ཀླུ་དག་དང་། །དེ་བཞིན་རིག་པ་འཛིན་པའང་དགུག །ཁུང་བརྐོས་དེ་ལ་པདྨའི་ཚུལ། །པདྨ་རྟག་ཏུ་བྲི་བར་བགྱི། །ཆོ་ག་ཅི་བཞིན་ཁུང་ནང་གི། །པདྨ་ལ་ནི་གེ་སར་བགྱི།