རིག་སྔགས་འཆང་ནམ་མཁའ་ལ་འཕུར་བར་འགྱུར་ཞིང་། རལ་གྲི་གྲུབ་པའི་རིག་སྔགས་འཆང་ཐམས་ཅད་ཀྱི་གཙོ་བོ་འཁོར་ལོས་སྒྱུར་བར་འགྱུར་རོ། །གཞན་གྱི་མཐུས་ཟིལ་གྱིས་ནོན་པར་མི་འགྱུར་རོ། །ལོ་ཁྲི་བརྒྱད་སྟོང་དུ་འཚོ་བར་འགྱུར་རོ། །འོན་ཏེ་ལག་པ་གཡོན་པས་ཞགས་པ་བཟུང་ལ་གཡས་པས་རལ་གྲི་བཟུང་སྟེ། ཁྲོས་པས་ཧཱུྃ་ཞེས་བགྱི་བས་མནན་ན། མི་གདའ་བར་གྱུར་ནས། མི་གདའ་བ་དང་། ཞགས་པ་དང་། རལ་གྲི་གྲུབ་པའི་རིག་སྔགས་འཆང་ཐམས་ཅད་ཀྱི་གཙོ་བོ་རྒྱལ་པོ་འཁོར་ལོས་སྒྱུར་བར་འགྱུར་རོ། །ཚེ་ལོ་ཁྲི་ཐུབ་པར་འགྱུར་རོ། །འོན་ཏེ་རིག་སྔགས་འཆང་ཁྲོས་པས་རལ་གྲི་བསྐོར་ན། བགེགས་དང་། ལོག་འདྲེན་དང་། གནོད་སྦྱིན་དང་། སྲིན་པོ་གདུག་པ་ཐམས་ཅད་དང་། འབྱུང་པོ་ཐམས་ཅད་ཀྱི་རིག་སྔགས་གཅད་པར་འགྱུར་རོ། །གཡུལ་གྱི་དབུས་སུ་ལན་ཅིག་བསྐོར་ན། གཡུལ་འགྱེད་པའི་མཚོན་ཆ་ཐམས་ཅད་བཅད་པར་འགྱུར། རེངས་པར་བགྱིས་པར་འགྱུར་ཏེ། ཐམས་ཅད་ཕྱོགས་བཅུར་འབྱེར་བར་འགྱུར་རོ། །དུར་ཁྲོད་ཀྱི་ནང་དུ་བསྐོར་ན། དུར་ཁྲོད་ན་གནས་པའི་གདུག་པ་རྒྱུ་བ་ཐམས་ཅད་ཀྱི་རིག་སྔགས་གཏུབས་པར་འགྱུར་ཞིང་། གནས་ཐམས་ཅད་སྟོངས་པར་འགྱུར་རོ། །ཕུག་གི་སྒོར་བསྐོར་ན། འཁྲུལ་འཁོར་དང་སྒོ་གླེགས་ཐམས་ཅད་དཀྲུགས་པར་འགྱུར་རོ། །སྒོ་དང་གཏན་པ་ཐམས་ཅད་གཏུབས་པར་འགྱུར་རོ། །གདུག་པའི་མི་མ་ཡིན་པ་བར་ཆད་བགྱིད་པ་ཐམས་ཅད་བཅོམ་པར་འགྱུར། ཐལ་བར་བརླག་པར་འགྱུར་རོ། །གཞན་ཡང་དགོས་པ་ཐམས་ཅད་དུ་ཅི་ལྟར་འཚལ་བ་བཞིན་དུ་བགྱིད་པར་འགྱུར་རོ། །རལ་གྲི་སྒྲུབ་པའི་ཆོ་གའོ།། །།དེ་ནས་ཡང་རིག་སྔགས་འཆང་སྦྲུལ་གྱི་ཞགས་པ་བསྒྲུབ་པར་འཚལ་ན། རིག་སྔགས་འཆང་དེས་སྐུད་པ་ལྔ་ལས་བསྒྲུབས་ཏེ། ཚོན་རྩིས་ཁ་བསྒྱུར་བའི་སྐུད་པ་ཚད་བཞིན་དུ་གཏུབས་ལ། བསྒྲུབ་པར་ཤིན་ཏུ་འོས་པ་ལས་བསྒྲུབ་པར་བགྱིའོ། །དེ་ནས་ཟས་བཟང་པོའི་ཕྱེ་མ་དང་། མ་དྷུའི་མེ་ཏོག་དང་། ར་སའི་མེ་ཏོག་དང་། ལྡོང་རོས་དང་། པདྨ་གེ་སར་དང་། ནཱ་ག་པུཥྤ་དང་། ཤིང་ཨརྐའི་འོ་མ་དེ་ལྷན་ཅིག་ཏུ་སྦྱར་བ་དེར་བཙག་བཙལ་ཏེ།