།གཟུགས་བརྙན་མཎྜལ་གྲུ་བཞིར་བཞག །ཟླ་བ་དྲུག་ཏུ་མཆོད་པར་བྱ། །ལྷ་ཡི་འཁོར་ལོས་སྒྱུར་བ་དང་། །ཚེ་འདི་ཉིད་ལ་སྐལ་བ་མཉམ། །བསོད་ནམས་ཆེན་པོ་ཐོབ་པར་འགྱུར། །ལོངས་སྤྱོད་ལྷ་དང་མཉམ་པ་དང་། །ཚེ་ཡང་རིང་བའི་མཆོག་ཏུ་འགྱུར། །མི་ལ་སོགས་པ་དབང་དུ་འགྱུར། །ལྷ་ཡི་བུ་ཡང་བྲན་བཞིན་འགྱུར། །བདག་གི་བསྒོ་བ་ཉན་པར་འགྱུར། །ཀླུ་ཡང་དེ་ཡི་བསྒོ་བ་ཉན། །བྲན་བཞིན་ལས་རྣམས་བྱེད་པར་འགྱུར། །ལྷ་ཡི་ལོངས་སྤྱོད་མངའ་རིས་ལས། །འདོད་པའི་ལོངས་སྤྱོད་འབྱུང་བར་འགྱུར། །དངོས་གྲུབ་སྒྲུབ་པའི་སྐལ་བ་ཅན། །གདུལ་བྱའི་དབང་གི་སྐུ་སྤྲུལ་པ། །ལྷ་ཆེན་ཚོགས་བདག་ཆེན་པོས་བྱ། །དངོས་གྲུབ་དམ་པ་མཆོག་སྒྲུབ་ན། །མཐུ་སྟོབས་ཕུན་སུམ་ཚོགས་ལྡན་ཞིང་། །ལོངས་སྤྱོད་ཡིད་བཞིན་འཕེལ་བར་བྱེད། །འཇིག་རྟེན་ཕན་མཛད་ལྷ་ཡི་ལྷ། །གང་གིས་མཆོད་པ་དངོས་གྲུབ་ཡིན། །ལྷ་ཆེན་ཚོགས་ཀྱི་བདག་པོའི་རྒྱུད་ལས་དངོས་གྲུབ་འབྱུང་བ་ཞེས་བྱ་བའི་ལེའུ་སྟེ་དང་པོའོ།། །།དེ་ནས་དབེན་པའི་གནས་སུ་ནི། །དཀྱིལ་འཁོར་གྲུ་བཞི་དག་བྱ་སྟེ། །བ་ཡི་ལྕི་བས་ལེགས་པར་བྱུག །འཇམ་ཞིང་མཉེན་ལ་དབུས་མཐོ་བའི། །དབུས་སུ་ཚོགས་བདག་སྐུ་གཟུགས་བཞུགས། །མེ་ཏོག་དཀར་པོས་དེ་ལ་གཏོར། །བདག་ཉིད་གཅེར་བུར་བྱུང་བྱས་ཏེ། །ལོག་འདྲེན་གཟུགས་ཀྱིས་ཡང་དག་མཆོད། །བ་ར་ཏ་ཀ་ཟླ་བ་དྲུག །ཉིན་རེ་བཞིན་དུ་དུས་གསུམ་དུ། །གསང་སྔགས་བརྒྱ་ནི་རྩ་བརྒྱད་བཟླས། །ཡིད་ལ་རེ་བ་ཐམས་ཅད་རྫོགས། །བསམ་པ་ཐམས་ཅད་འགྲུབ་པར་འགྱུར། །ཨོཾ་ནི་བཀྲ་ཤིས་དཔལ་དང་ལྡན། །གསང་སྔགས་མགོ་ལ་གཞག་པར་བྱ། །ཡིད་བཞིན་ནོར་བུ་ལྟ་བུ་ཡི། །དངོས་གྲུབ་སྟེར་བྱེད་ཡི་གེ་ཡང་། །དེ་འོག་གྲལ་ལ་གཞག་པར་བྱ། །ཉི་མ་ལྟ་བུའི་ཡི་གེ་ཡང་། །དེ་ཡི་རྗེས་ལ་བཀླག་པར་བྱ། །དེ་བཞིན་གཤེགས་པའི་མཚན་དང་པོ། །ཡི་གེ་མཆོག་ནི་བླང་བར་བྱ། །གསལ་བྱེད་ཡི་གེ་དང་པོ་ཡང་། །དེ་ཡི་མཇུག་ཏུ་བརྗོད་པར་བྱ། །རིན་ཆེན་ཡི་གེ་སྭཱ་ཞེས་བྱ། །ལས་ཀྱི་ཡི་གེ་ཧཱ་ཞེས་བྱ། །དངོས་གྲུབ་འདོད་པས་གསང་སྔགས་བཟླས།