ལམ་པོ་ཆེ་ཇི་སྙེད་ཡོད་པ་དེ་དག་ཐམས་ཅད་ན་ཡང་དེ་བཞིན་གཤེགས་པའི་སྐུ་མཚན་གྱིས་བརྒྱན་པ་མཐོང་ངོ་། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དེ་དག་ཐམས་ཅད་ཀྱི་སྤྱན་སྔ་ན་ཡང་སྒྱུ་མ་མཁན་བཟང་པོ་བདག་ཉིད་ཕྱག་འཚལ་ནས་ཉེས་པ་འཆགས་པར་མཐོང་ཞིང་། དེ་ནས་སྒྱུ་མ་མཁན་བཟང་པོའི་མིག་ལམ་ན་གང་ཅུང་ཟད་ཅི་སྣང་བ་དེ་ཐམས་ཅད་དེ་བཞིན་གཤེགས་པ་མ་གཏོགས་པ་གཞན་ཅུང་ཟད་ཀྱང་མ་མཐོང་ནས་དེ་ཚིམ་ཞིང་མགུ་ལ་ཡི་རངས་ཏེ། རབ་ཏུ་དགའ་ཞིང་དགའ་བ་དང་ཡིད་བདེ་བར་གྱུར་ཏོ། །དེ་དགའ་བ་དང་ཡིད་བདེ་བ་དེ་ཉིད་ཀྱིས་དད་པ་རྗེས་སུ་དྲན་པའི་ཏིང་ངེ་འཛིན་ཐོབ་བོ། །དེ་ཏིང་ངེ་འཛིན་དེ་ལས་ལངས་མ་ཐག་ཏུ་ཐལ་མོ་སྦྱར་ཏེ་བཅོམ་ལྡན་འདས་ཀྱི་སྤྱན་སྔར་འདུག་ནས་ཚིགས་སུ་བཅད་པ་འདི་དག་གསོལ་ཏོ། །བཞེད་ན་བརྒྱ་ཕྲག་སྟོང་ལས་ལྷག་གྱུར་ཅིང་། །དཔེར་ན་གང་གཱའི་ཀླུང་གི་བྱེ་སྙེད་ཀྱི། །སངས་རྒྱས་མང་པོ་སྤྲུལ་པར་མཛད་པ་ཡི། །དེ་བཞིན་གཤེགས་པའི་རྫུ་འཕྲུལ་དེ་ལ་མོས། །བདག་གིས་སྔོན་བསླབས་སྒྱུ་མའི་ས་མ་ལགས། །འཛམ་བུའི་གླིང་ན་བདག་འདྲ་མེད་སྙམ་ན། །དེ་རིང་རྒྱལ་བའི་རྫུ་འཕྲུལ་འདི་མཐོང་ནས། །འདི་ཡི་གྲངས་དང་ཆར་ཡང་མ་ཕོད་དོ། །བདག་གི་ཤ་ཡི་མིག་གིས་གང་མཐོང་བ། །ཐམས་ཅད་རྒྱལ་བའི་མཚན་གྱིས་བརྒྱན་པའི་སྐུ། །ཆོས་ཀྱི་རྒྱལ་པོ་ལ་ནི་འདི་དག་ཞུས། །རྒྱལ་བ་ཡང་དག་གང་ལགས་བཀའ་སྩོལ་ཅིག །གང་ཞིག་མཆོད་ན་ལེགས་པར་མཆོད་པ་ལགས། །གང་ལ་འབྲས་བུ་ཆེན་པོར་འགྱུར་བ་ལགས། །གང་གི་བྱང་ཆུབ་འཐུན་པར་གཟུང་བ་འདི། །ཀུན་ཏུ་སྤྱན་གྱིས་བདག་ལ་བཀའ་སྩོལ་ཅིག །དེ་རིང་འཇིག་རྟེན་མགོན་བགམ་བགྱིས་པ་ཡི། །ནོངས་པ་གང་ལགས་དེ་འདིར་ཀུན་ཏུ་འཆགས། །གང་དག་སེམས་ཅན་མཆོག་ལ་གུས་མི་གནས། །སེམས་ཅན་དེ་དག་རྒྱལ་བའི་བདེ་ལས་ཉམས། །བདག་ལ་ལྷ་དང་བརྒྱ་བྱིན་ཚངས་པ་དང་། །འཁོར་འདུས་གྱུར་པ་འདི་དག་ཀུན་གསོན་ཅིག །སེམས་ཅན་ཐམས་ཅད་རབ་ཏུ་དགྲོལ་སླད་དུ། །བྱང་ཆུབ་སེམས་ནི་བདག་གིས་བསྐྱེད་པར་བགྱི། །བདག་གིས་སེམས་ཅན་ཐམས་ཅད་འགྲོན་དུ་གཉེར།