ཀླུ་དང་ཉན་ཐོས་དག་དང་སངས་རྒྱས་སྲས། །འགྲོ་བ་འདི་དག་རྒྱལ་བས་གཟི་ཡངས་ཀྱིས། །ཟིལ་མནན་ཁྱོད་ནི་གསེར་གྱི་རི་ལྟར་གསལ། །རྒྱ་མཚོའི་དབུས་ན་གནས་ཀྱང་རྣམ་མཛེས་པ། །ལྷུན་པོ་ལྷ་ཡི་ཚོགས་ཀྱི་གནས་ལྟ་བུར། །ཐུགས་རྗེའི་རྒྱ་མཚོའི་དབུས་སུ་དེ་བཞུགས་ཏེ། །འོད་ཟེར་སྟོང་ཕྲག་བརྒྱ་དག་འགྱེད་པར་མཛད། །ཚངས་པའི་གནས་ལ་གནས་པའི་ཚངས་པ་དེ། །ཚངས་པའི་མདུན་ན་གནས་ཏེ་མངོན་མཛེས་ལྟར། །བསམ་གཏན་རྣམ་ཐར་ཏིང་ངེ་འཛིན་བཞུགས་པ། །སེམས་ཅན་དམ་པ་འགྲོ་བ་ཀུན་ལ་གསལ། །བརྒྱ་བྱིན་སུམ་ཅུ་རྩ་གསུམ་ལྷ་ནང་དུ། །གནས་ནས་གཟི་བརྗིད་ཡངས་པས་མཛེས་པ་ལྟར། །མཚན་གྱིས་སྤྲས་པ་ཡེ་ཤེས་ཡོན་ཏན་ཕྱུག །ཐུབ་པའི་རྒྱལ་པོ་འགྲོ་བ་ཀུན་ལ་གསལ། །གླིང་བཞི་མི་ཡི་བདག་པོ་སྣང་ལྡན་པ། །འཇིག་རྟེན་འདི་ལ་སྟོན་པ་མཛེས་པ་ལྟར། །འཕགས་པའི་ལམ་དུ་འཛུད་པ་རབ་མཛད་ཅིང་། །ཐུགས་རྗེའི་དགོངས་པའི་ཐུགས་མངའ་འདི་ཡང་མཛེས། །མཁའ་ལ་ཉི་མ་ལམ་མེ་ཐལ་ལེ་བ། །ནོར་བུ་མེ་འོད་མོག་མོག་བྱེད་འདི་ལྟར། །ཉི་མ་སྟོང་བས་ཁྱད་པར་འཕགས་པའི་འོད། །སངས་རྒྱས་ཉི་མ་འགྲོ་བ་འདི་ན་གསལ། །དྲི་མེད་ཟླ་བ་ནམ་གྱི་གུང་གསལ་ལྟར། །ཤིན་ཏུ་རྣམ་དག་འགྲོ་བ་ཀུན་ལ་གསལ། །རྒྱལ་བའི་ཞལ་རས་ཟླ་བ་ཉ་བ་འདྲ། །ཀུན་འོད་ཟིལ་གྱིས་མནན་ནས་རྣམ་པར་མཛེས། །ཇི་ལྟར་རི་བོའི་ཟོམ་ལ་མེ་འབར་བ། །མཚན་མོ་མི་ཉལ་ཙམ་ན་ཀུན་སྣང་ལྟར། །གཏི་མུག་མུན་པ་མ་ལུས་བཅོམ་ནས་ནི། །དྲང་སྲོང་ཆེན་པོའི་ཡེ་ཤེས་འོད་ཀྱང་གསལ།། སེང་གེ་རི་སུལ་བརྟེན་པའི་སྒྲ་སྒྲོག་ཅིང་། །ས་ལ་རི་དགས་ཚོགས་རྣམས་སྐྲག་བགྱིད་ལྟར། །མི་དབང་སྟོང་པ་བདག་མེད་གསུང་སྒྲོག་ཅིང་། །ཕ་རོལ་མུ་སྟེགས་ཅན་རྣམས་སྐྲག་པར་མཛད། །ནོར་བུའི་རྒྱལ་པོ་བཟང་པོ་གཟི་བརྗིད་འབར། །ནོར་བུ་ཐམས་ཅད་ཟིལ་མནན་ལམ་མེ་ལྟར། །རྒྱལ་བའི་སྐུ་ནི་གསེར་གྱི་མདོག་འདྲ་བ། །འགྲོ་ཀུན་ཟིལ་གྱིས་མནན་ནས་ལམ་མེར་བཞུགས། །འཇིག་རྟེན་གང་ནའང་ཁྱོད་དང་མཚུངས་མ་མཆིས། །ལྷག་པའི་སེམས་ཅན་མཆིས་པར་ག་ལ་འགྱུར། །བསོད་ནམས་ཡེ་ཤེས་བརྩོན་འགྲུས་ཐབས་རྣམས་དང་། །ཡོན་ཏན་ཀུན་གྱིས་ཁྱོད་དང་མཚུངས་མ་མཆིས།