།མཽད་གལ་དེའི་ཚེ་དེའི་དུས་ན་ལག་པ་གཉིས་བསྲེགས་པར་གྱུར་ཀྱང་ལུས་དང་སེམས་ལ་འགྱུར་བ་ཅུང་ཟད་ཀྱང་མེད་དོ། །དེ་ཅིའི་ཕྱིར་ཞེ་ན། ལྷག་པའི་བསམ་པ་ལ་གནས་པའི་བྱང་ཆུབ་སེམས་དཔའ་ནི་གཞན་གྱི་དོན་ཡོངས་སུ་གཉེར་བ་ན་ལུས་དང་སྲོག་ལ་ཡང་མངོན་པར་ཞེན་པ་མེད་པས་སོ། །བསམ་པ་རྣམ་པར་དག་པས་སྦྱིན་པ་ཡོངས་སུ་བཏང་བའི་རྒྱུ་དང་རྐྱེན་གྱིས་དེའི་ལག་པ་ཡང་སྔ་མ་ཁོ་བཞིན་དུ་གྱུར་ཅིང་རྨ་ཡང་མེད་པར་གྱུར་ཏོ། །ཚོང་པ་རྣམས་ཀྱང་ལམ་རྙེད་པར་གྱུར་ཏེ་ནམ་ནངས་ནས་དྲང་སྲོང་གི་ལག་པ་གཉིས་ལ་རྨ་ཡང་མེད་པར་མཐོང་བ་དང་། ངོ་མཚར་གྱི་བསམ་པ་བསྐྱེད་ནས་འདི་སྙམ་དུ་དྲང་སྲོང་འདི་ནི་རྫུ་འཕྲུལ་གྱི་མཐུ་ཆེན་པོ་དང་ལྡན་པས་མཚན་ཐོག་ཐག་ལག་པ་གཉིས་སྤར་ནས་བདག་ཅག་གི་སྣང་བ་བྱས་ཏེ་ལམ་ཡང་དག་པར་བསྟན་ཀྱང་འདིའི་ལག་པ་ལ་ཚིག་པ་ཅུང་ཟད་ཀྱང་མེད་པས་གདོན་མི་ཟ་བར་འདི་ནི་སྤྱོད་པ་ཆེན་པོ་གྲུབ་ཅིང་ཡོན་ཏན་ཆེན་པོ་དང་ལྡན་པ་ཡིན་ནོ་སྙམ་ནས། མཽད་གལ་དེའི་ཚེ་ཚོང་པ་རྣམས་ཀྱིས་དྲང་སྲོང་དེ་ལ་འདི་སྐད་ཅེས་སྨྲས་སོ། །དྲང་སྲོང་ཁྱོད་ཀྱིས་མཆོག་ཏུ་དཀའ་བའི་དཀའ་བ་སྤྱད་པར་གྱུར་པ་ནི་ཤིན་ཏུ་ལེགས་སོ། །དེང་སྤྱོད་པ་འདིས་དངོས་པོ་གང་ཞིག་ཐོབ་པར་སྨོན་ལགས། དྲང་སྲོང་གིས་སྨྲས་པ། ཀྱེ་ཚོང་པ་རྣམས་བདག་ནི་དངོས་པོ་འདིས་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཐོབ་ནས་ཁྱེད་ལ་སོགས་པ་འཁོར་བའི་སྡུག་བསྔལ་ལས་བཟླས་ཏེ། ལམ་ལོག་པར་ཞུགས་པའི་སེམས་ཅན་རྣམས་ལ་ཡང་དག་པའི་ལམ་བསྟན་པར་སྨོན་ཏོ། །དེའི་ཚེ་ཚོང་པ་རྣམས་སེམས་རབ་ཏུ་དགའ་བར་གྱུར་ནས་ཐམས་ཅད་ཀྱིས་འདི་སྐད་དུ་བདག་ཅག་གིས་དངོས་པོ་ཇི་ལྟ་བུ་ཞིག་གིས་དྲང་སྲོང་འདི་ལ་ལན་གླན་པར་བྱ་ཞེས་སྨྲས་པ་དང་། དྲང་སྲོང་གིས་སྨྲས་པ། ཁྱེད་རྣམས་རྩེ་གཅིག་ཏུ་དགེ་བའི་ཆོས་སྤྱོད་ལ་བག་མེད་པར་མ་བྱེད་ཅིག །ཚོང་པ་རྣམས་ཀྱིས་ཇི་སྐད་བསྟན་པ་བཞིན་དུ་འཚལ་ལོ་ཞེས་སྨྲས་ནས་ཚོང་པ་རྣམས་རབ་ཏུ་དགའ་ཞིང་གུས་པས་ཕྱག་བྱས་ཏེ་དེ་ནས་གྱེས་པར་གྱུར་ཏོ། །མཽད་གལ་ཁྱོད་ཀྱིས་དེའི་ཚེ་དེའི་དུས་ན་མུ་སྟེགས་ཅན་གྱི་དྲང་སྲོང་ཚོང་པ་རྣམས་ཀྱི་ཆེད་དུ་ལག་པ་སྤར་ནས་ལམ་སྣང་བར་བྱས་པ་དེ་གཞན་ཞིག་ཡིན་པ་སྙམ་དུ་སེམས་ན་དེ་ལྟར་མི་བལྟ་སྟེ་དེ་ནི་ང་ཉིད་ཡིན་ནོ།