བཅོམ་ལྡན་འདས་མཉན་ཡོད་ན་རྒྱལ་བུ་རྒྱལ་བྱེད་ཀྱི་ཚལ་མགོན་མེད་ཟས་སྦྱིན་གྱི་ཀུན་དགའ་ར་བ་ན་བཞུགས་ཏེ། དེ་ནས་ལྷ་ཞིག་བཅོམ་ལྡན་འདས་ག་ལ་བ་དེར་སོང་སྟེ་ཕྱིན་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ་ཕྱོགས་གཅིག་ཏུ་འདུག་གོ། །ཕྱོགས་གཅིག་ཏུ་འདུག་ནས་ལྷ་དེས་བཅོམ་ལྡན་འདས་ལ་ཞུ་བ་ཞུས་པ། ཚུལ་ཁྲིམས་གང་ལགས་སྤྱོད་པ་གང་། །ཡོན་ཏན་གང་ལགས་ལས་གང་གིས། །གནས་པ་ཇི་ལྟར་ཤེས་རབ་གང་། །སྐྱེ་བོ་གང་དག་མཐོ་རིས་མཆི། །ལྷ་ལ་ཐུགས་བརྩེ་ཉེར་བཟུང་ནས། །སྟོན་པས་དེ་ལ་ལུང་བསྟན་པ། །སྐྱེ་བོ་མཐོ་རིས་གང་འགྲོ་བ། །ལྷ་ཁྱོད་ང་ལ་རབ་ཏུ་ཉོན། །སྲོག་གཅོད་པ་ལས་ཕྱིར་ལྡོག་ཅིང་། །ཁྲིམས་བཟུང་ཡང་དག་སྡོམ་ལ་དགའ། །གང་དག་འབྱུང་པོ་མི་འཚེ་བ། །སྐྱེ་བོ་དེ་དག་མཐོ་རིས་འགྲོ། །གང་དག་མ་བྱིན་ལེན་སྤོང་ཞིང་། །སྦྱིན་པ་གཏོང་ལ་རྟག་དགའ་སྟེ། །རྐུ་བ་སྤོང་ཞིང་མི་རྐུ་བ། །སྐྱེ་བོ་དེ་དག་མཐོ་རིས་འགྲོ། །གཞན་གྱི་ཆུང་མའི་ཐད་མི་འགྲོ། །ལོག་པར་གཡེམ་པ་རྣམ་པར་སྤོང་། །བདག་གི་ཆུང་མས་ཆོག་སེམས་པ། །སྐྱེ་བོ་དེ་དག་མཐོ་རིས་འགྲོ། །གཞན་གྱི་དོན་ལ་རྐུ་བྱེད་དང་། །བདག་གི་ཕྱིར་དང་འཇིགས་པའི་ཕྱིར། །བརྫུན་གྱི་ཚིག་རྣམས་མི་སྨྲ་བ། །སྐྱེ་བོ་དེ་དག་མཐོ་རིས་འགྲོ། །གྲོགས་པོ་རྟག་པར་འབྱེད་བྱེད་པ། །ཕྲ་མའི་ཚིག་རྣམས་རབ་སྤོང་ཞིང་། །གང་དག་འདུན་པར་རབ་དགའ་བ། །སྐྱེ་བོ་དེ་དག་མཐོ་རིས་འགྲོ། །རྒྱགས་ལ་རྟེན་ཅིང་ཞེ་གཅོད་པ། །ཚིག་རྩུབ་དག་ནི་རྣམ་སྦྱོང་ཞིང་། །འཇམ་པོའི་ཚིག་ཏུ་གང་སྨྲ་བ། །སྐྱེ་བོ་དེ་དག་མཐོ་རིས་འགྲོ། །དོན་མེད་གནས་དང་ལྡན་པ་ཡི། །ཀྱལ་པའི་ཚིག་རྣམས་རབ་སྤོང་ཞིང་། །གང་ཡང་དུས་སུ་ཆོས་སྨྲ་བ། །སྐྱེ་བོ་དེ་དག་མཐོ་རིས་འགྲོ། །གྲོང་ངམ་འོན་ཏེ་དགོན་པ་ན། །གཞན་གྱིས་བདག་གིར་བྱས་པ་ལ། །དེ་ལ་ཆགས་སེམས་གང་མེད་པ། །སྐྱེ་བོ་དེ་དག་མཐོ་རིས་འགྲོ། །བྱམས་པའི་སེམས་ཀྱིས་མི་འཚེ་ཞིང་། །གནོད་པར་སེམས་པ་མེད་པ་ཡིས། །སྐྱེ་བོ་ཀུན་ལ་མི་གནོད་པ། །སྐྱེ་བོ་དེ་དག་མཐོ་རིས་འགྲོ།