བདག་ཡོད་པའམ་བདག་མེད་པའམ། ཡང་གང་འཁོར་བའམ། མྱ་ངན་ལས་འདའ་བའི་ཆོས་གང་ཡང་མ་དམིགས་ཏེ། དེ་ལྟར་ཞུགས་ན་རྒྱལ་པོ་ཆེན་པོ་ལམ་ལ་ཞུགས་པ་ཞེས་བྱའོ། །དེ་ནས་འཇམ་དཔལ་གཞོན་ནུར་གྱུར་པ་ལ་རྒྱལ་པོ་མ་སྐྱེས་དགྲས་འདི་སྐད་ཅེས་གསོལ་ཏོ། །འཇམ་དཔལ་བདག་གི་འགྱོད་པ་ངན་པ་སྦྱང་བའི་སླད་དུ་སང་འཁོར་དང་བཅས་ཏེ་བཤོས་ལ་གཤེགས་ན་ལེགས་སོ། །འཇམ་དཔལ་གྱིས་སྨྲས་པ། རྒྱལ་པོ་ཆེན་པོ་གང་མེད་པ་དེ་ནི་གཞར་ཡང་མེད་དོ། །མེད་པས་ན་ཡོངས་སུ་གྲོལ་བ་ཡང་མེད་དོ། །གང་ཡོངས་སུ་གྲོལ་བ་དེ་དག་ཀྱང་མེད་པས་ཡོངས་སུ་གྲོལ་ལོ། །མེད་པ་དེ་ཡང་གང་ལས་ཀྱང་ཡོངས་སུ་གྲོལ་བར་མི་འགྱུར་རོ། །དེ་ཅིའི་ཕྱིར་ཞེ་ན། རྒྱལ་པོ་ཆེན་པོ་ཆོས་ཐམས་ཅད་ནི་རང་བཞིན་གྱིས་ཡོངས་སུ་གྲོལ་བའི་ཕྱིར་རོ། །དེ་ནས་བཅོམ་ལྡན་འདས་ཀྱིས་འཇམ་དཔལ་གཞོན་ནུར་གྱུར་པ་ལ་འདི་སྐད་ཅེས་བཀའ་སྩལ་ཏོ། །འཇམ་དཔལ་ཁྱོད་རྒྱལ་པོ་མ་སྐྱེས་དགྲའི་དེར་ཟན་ལ་སོང་ཤིག །དེ་ན་འདི་ལ་སོགས་ཏེ་འགྲོ་བ་མང་པོའི་དོན་དུ་འགྱུར་རོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་འཇམ་དཔལ་གཞོན་ནུར་གྱུར་པས་འདི་སྐད་ཅེས་གསོལ་ཏོ། །བཅོམ་ལྡན་འདས་བཀའ་བཞིན་འཚལ། བདག་ནི་དེ་བཞིན་གཤེགས་པའི་བཀའ་མི་གཅོག་གོ། །དེ་ནས་འཇམ་དཔལ་གཞོན་ནུར་གྱུར་པས་གནང་བར་རྒྱལ་པོ་མ་སྐྱེས་དགྲས་ཤེས་ནས། དགའ་མགུ་རངས་རབ་ཏུ་དགའ་ཞིང་དགའ་བ་དང་ཡིད་བདེ་བ་སྐྱེས་ནས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས། འཇམ་དཔལ་གཞོན་ནུར་གྱུར་པ་དང་། དགེ་སློང་གི་དགེ་འདུན་ཐམས་ཅད་ཀྱི་ཞབས་ལ་ཡང་མགོ་བོས་ཕྱག་འཚལ་ཏེ་སོང་ངོ་། །དེ་ནས་ཚེ་དང་ལྡན་པ་ཤཱ་རིའི་བུ་ལ་རྒྱལ་པོ་མ་སྐྱེས་དགྲས་འདི་སྐད་ཅེས་སྨྲས་སོ། །བཙུན་པ་ཤཱ་རིའི་བུ་འཇམ་དཔལ་གཞོན་ནུར་གྱུར་པའི་གཡོག་ཇི་སྙེད་ཅིག་མཆིས། ཤཱ་རིའི་བུས་སྨྲས་པ། རྒྱལ་པོ་ཆེན་པོ་བྱང་ཆུབ་སེམས་དཔའ་ལྔ་བརྒྱ་ཙམ་དག་དང་ཐབས་ཅིག་ཏུ་བཤོས་གསོལ་ལོ། །