མ་འོངས་པ་ལ་མ་ཕྱིན་པར་མི་འདོད། ད་ལྟར་ལ་མི་རྟོག་པའི་ཕྱིར་ཐོག་མ་ནས་མ་སྐྱེས་པར་མོས་ཤིང་ལྷག་པར་ཡང་མི་བྱེད། བྲི་བར་ཡང་མི་བྱེད་པ་དེ་ཙམ་གྱིས་ན་རྒྱལ་པོ་ཆེན་པོ་མངོན་པར་འདུ་བྱེད་པ་ལ་མངོན་པར་འདུ་མི་བྱེད་པར་མོས་པ་ཡིན་ནོ། །གསོལ་པ། འཇམ་དཔལ་ཇི་ལྟར་ན་ཉོན་མོངས་པ་དང་ལམ་འགྲོགས་པར་འགྱུར། སྨྲས་པ། རྒྱལ་པོ་ཆེན་པོ་དེ་ཇི་སྙམ་དུ་སེམས། ཉི་མའི་འོད་ཟེར་མུན་པ་དང་ལྷན་ཅིག་ཏུ་གནས་སམ། གསོལ་པ། འཇམ་དཔལ་དེ་ནི་མ་ལགས་སོ། །དེ་ཅིའི་སླད་དུ་ཞེ་ན། མུན་པ་ནི་གདུགས་ཀྱི་འོད་ཟེར་གྱིས་གསལ་བར་འགྱུར་རོ། །སྨྲས་པ། རྒྱལ་པོ་ཆེན་པོ་འོ་ན་ཅི་མུན་པ་དེ་ཕུང་པོའམ། ཕྱོགས་སུ་འགྲོ་བར་འགྱུར་རམ། གསོལ་པ། འཇམ་དཔལ་དེ་མ་ལགས་སོ། །སྨྲས་པ། རྒྱལ་པོ་ཆེན་པོ་དེ་བཞིན་དུ་ལམ་གྱི་ཡེ་ཤེས་སྐྱེས་ན་ཉོན་མོངས་པ་རྣམས་མི་འབྱུང་བར་འགྱུར་གྱི། ཉོན་མོངས་པ་རྣམས་ཕུང་པོར་ཡང་མི་འགྱུར། ཡུལ་ན་ཡང་མི་གནས། ཕྱོགས་ན་ཡང་མི་གནས་ཏེ། རྒྱལ་པོ་ཆེན་པོ་ཉོན་མོངས་པ་མཉམ་པ་ཉིད་ཀྱི་ཕྱིར་ལམ་མཉམ་པ་ཉིད་དོ། །ལམ་མཉམ་པ་ཉིད་ཀྱི་ཕྱིར་ཉོན་མོངས་པ་མཉམ་པ་ཉིད་དོ། །ཉོན་མོངས་པ་མཉམ་པ་ཉིད་ཀྱི་ཕྱིར་ཆོས་ཐམས་ཅད་མཉམ་པ་ཉིད་དེ། རྒྱལ་པོ་ཆེན་པོ་གང་དག་གིས་དེ་ལྟར་རྟོགས་པ་ནི་ཉོན་མོངས་པ་ཉིད་དེ་དག་གི་ལམ་ཡིན་ནོ། །དེ་ཅིའི་ཕྱིར་ཞེ་ན། དེ་ལྟར་ཉོན་མོངས་པ་ཚོལ་བའི་ཕྱིར་ཉོན་མོངས་པ་མི་འབྱུང་བར་འགྱུར་རོ། །ཡང་གང་ཉོན་མོངས་པ་ཚོལ་བ་དེ་ནི་ལམ་ཡིན་ནོ། །རྒྱལ་པོས་གསོལ་པ། འཇམ་དཔལ་ཇི་ལྟར་ན་ཉོན་མོངས་པ་བཙལ་ན་ཉོན་མོངས་པ་ཉིད་ལམ་ལགས། འཇམ་དཔལ་གྱིས་སྨྲས་པ། རྒྱལ་པོ་ཆེན་པོ་གང་གི་ཚེ་ན་ཉོན་མོངས་པ་ཚོལ་བས་གཉིས་སུ་སེམས་མི་འགྲོ་བ་དེ་ལྟ་བུ་ནི་ཉོན་མོངས་པ་དག་བཙལ་ན་ཉོན་མོངས་པ་ཉིད་ལམ་ཡིན་ཏེ། རྒྱལ་པོ་ཆེན་པོ་དེ་ལྟར་ན་ཉོན་མོངས་པ་ཉིད་ལམ་ཡིན་ནོ། །གསོལ་པ། འཇམ་དཔལ་ཇི་ལྟར་ན་ལམ་སྒོམ་པ་ལགས། སྨྲས་པ། རྒྱལ་པོ་ཆེན་པོ་ཆོས་ཐམས་ཅད་སྒོམ་པ་ནི་ལམ་སྒོམ་པ་ཡིན་ནོ།