།ཞེ་སྡང་འཆང་བས་དེ་དག་ཚིག་མི་སྟེར། །འཐབ་ལ་དགའ་ཞིང་ཉེས་པ་ཚོལ་བྱེད་ལ། །བཟོད་པའི་བསྔགས་པའང་རྟག་པར་དེ་དག་རྗོད། །ཆོས་རྣམས་ཐམས་ཅད་སྟོང་པ་ཉིད་ཅེས་སྨྲ། །ང་རྒྱལ་ཁེངས་པས་འཁྲུལ་པ་རྗེས་སུ་རྟོག །ཟས་ལ་ཆགས་ཤིང་མ་རིག་མདུད་པས་བཅིངས། །ཉིན་མཚན་དག་ཏུ་འདོད་པའི་ཡོན་ཏན་སེམས། །དེ་དག་ལྷས་དང་གྲོང་ཁྱེར་གྲོང་སོང་ཞིང་། །སེམས་ཅན་མང་པོས་ཡོངས་སུ་དགྲོལ་ཞེས་ཟེར། །འགྲོ་བ་ཀུན་ལ་སྙིང་རྗེ་བདག་ལ་ཡོད། །འཇིག་རྟེན་ཀུན་ལ་ཕན་སེམས་དེ་བཞིན་ཏེ། །དེ་དག་ཞེ་སྡང་སེམས་ཀྱིས་དེ་ལྟ་བུའི། །ཆོས་ཉིད་འཚེ་བའི་ཚུལ་ཅན་རྗོད་པར་བྱེད། །འཚེ་བ་སྙིང་རྗེ་གཅིག་ཏུ་འདུས་པ་ནི། །ནམ་ཡང་ཡོད་པར་མ་མཐོང་མ་ཐོས་ཏེ། །ཕན་ཚུན་ཁྲོ་བར་བྱེད་དང་ལྡན་གྱུར་ཅིང་། །ཚད་མེད་ཚེ་ཡི་ཞིང་དུ་སྨོན་པར་བྱེད། །གང་གཱའི་ཀླུང་གི་བྱེ་མ་ཇི་སྙེད་པར། །བརྡེག་ཅིང་སྤྱོ་བ་འཐོབ་པའི་གནས་ཡོད་ཀྱི། །བཟོད་པ་དམ་པ་ཡོངས་སུ་མ་བསྒོམས་པར། །རྒྱལ་བ་དེ་དག་ཞིང་དུ་དེ་མི་འགྲོ། །ཞིང་རྣམས་ཞིང་མིན་གང་གིས་ཤེས་གྱུར་ཅིང་། །ཞིང་རྣམས་ཐམས་ཅད་ནམ་མཁའི་རང་བཞིན་ཞེས། །ཞིང་གི་ཡོན་ཏན་རློམ་སེམས་གང་མེད་པ། །སྐྱེས་བུ་ཁྱུ་མཆོག་ཞིང་དུ་དེ་འགྲོའོ། །ཐམས་ཅད་ཉེས་བྱས་བདག་གིས་བཟོད་པར་བྱ། །རྒྱལ་བའི་སྲས་ལ་སྟོན་པར་སེམས་ཤེས་སྨྲ། །སྟོན་པའི་འདུ་ཤེས་ཅན་ལ་ཁྲོ་ཡོད་པ། །ངས་ནི་ནམ་ཡང་མ་མཐོང་མ་ཐོས་སོ། །བསླང་བའི་གྲོང་དང་མཛའ་བའི་གྲོང་ཆགས་ཤིང་། །གཅིག་ལ་གཅིག་ནི་སྤྱོད་པ་སུན་ཡང་འབྱིན། །འདི་ནི་བདག་གིས་སྨིན་བྱའི་སྐལ་ཡིན་གྱིས། །སུ་ཡང་དེར་མ་འགྲོ་ཞེས་དེ་དག་ཟེར། །བདག་དང་འདྲ་བ་དེ་འདྲ་གང་ཡང་མེད། །དེ་ལ་སྤྱོད་པ་རྣམ་དག་མེད་ཅེས་ཟེར། །མི་མཁས་དེ་ནི་བྱང་ཆུབ་འཐོབ་མི་འགྱུར། །དེ་ལ་དོན་དུ་འགྱུར་བའང་གང་ཡང་མེད། །ཉིན་པར་ལན་གསུམ་མཚན་ཡང་དེ་བཞིན་ཏེ། །བྱང་ཆུབ་སེམས་དཔའ་དག་ལ་སྤྱི་བོས་ཐུད། །དེ་དག་འཁྲུལ་པ་གང་ལའང་བརྟག་མི་བྱ། །རྟག་པར་སྤྱོད་པ་ཅི་བདེར་སྤྱོད་དུ་ཚུད། །འདོད་པའི་ཡོན་ཏན་དགའ་བར་སྤྱོད་མཐོང་ན། །དེ་ཡི་འཁྲུལ་པ་གང་ཡང་བརྟག་མི་བྱ། །བྱང་ཆུབ་སྤྱོད་པ་མཐའ་ཡས་ཡོན་ཏན་གྱིས། །དེ་ཡང་མ་འོངས་དུས་ན་བྱང་ཆུབ་འཐོབ། །ལན་ཅིག་ཁོ་ནར་རྒྱལ་བར་འགྱུར་བ་མིན།