།རི་རབ་འདྲ་བར་མི་གཡོ་ཤིན་ཏུ་འཕགས། །དག་པའི་སེམས་ཅན་ཟླ་བ་ལྟ་བུར་སྤྱོད། །སྟོང་པ་མཚན་མེད་སྨོན་མེད་རྣམ་གྲོལ་དང་། །སྒྱུ་མ་སྨིག་རྒྱུ་ལྟ་བུར་ཆོས་ངེས་དང་། །འདུས་བྱས་རྨི་ལམ་ངོ་བོ་ཉིད་མོས་པ། །དེ་ནི་མ་སྨད་བདག་ལ་བཤད་དུ་གསོལ། །དེ་ནས་བཅོམ་ལྡན་འདས་ཀྱིས་ཀླུའི་རྒྱལ་པོ་མ་དྲོས་པ་ལ་འདི་སྐད་ཅེས་བཀའ་སྩལ་ཏོ། །ཀླུའི་བདག་པོ་ལེགས་སོ་ལེགས་སོ། །ཀླུའི་བདག་པོ་ཁྱོད་ཇི་ལྟར་སྔོན་གྱི་དགེ་བའི་རྩ་བའི་རྒྱུ་འཐུན་པ་དང་། སྙིང་རྗེ་ཆེན་པོ་མ་བཏང་བ་དང་། གསོལ་བ་མ་བཏབ་པར་སེམས་ཅན་ཐམས་ཅད་ལ་དགེ་བའི་བཤེས་གཉེན་བྱེད་པ་དང་། འཁོར་བ་ན་ཡོངས་སུ་མི་སྐྱོ་བ་དང་། སངས་རྒྱས་དང་ཆོས་དང་དགེ་འདུན་གྱི་རིགས་རྒྱུན་མི་གཅོད་པས་དེ་བཞིན་གཤེགས་པ་ལ་དོན་འདི་འདྲི་བར་སེམས་པ་ནི་ཡང་ལེགས་སོ། །ཀླུའི་བདག་པོ་དེའི་ཕྱིར་ལེགས་པར་ཤིན་ཏུ་ཉོན་ལ་ཡིད་ལ་ཟུང་ཤིག་དང་ཇི་ལྟར་བྱང་ཆུབ་སེམས་དཔའ་རྣམས་ཀྱིས་འདི་དག་དང་། ཡོན་ཏན་གྱི་ཁྱད་པར་གཞན་དག་ཀྱང་ཐོབ་པར་འགྱུར་བ་ངས་ཁྱོད་ལ་བཤད་དོ། །ཀླུའི་རྒྱལ་པོ་མ་དྲོས་པས་བཅོམ་ལྡན་འདས་དེ་བཞིན་ནོ་ཞེས་གསོལ་ཏེ་བཅོམ་ལྡན་འདས་ཀྱི་ལྟར་ཉན་པ་དང་། བཅོམ་ལྡན་འདས་ཀྱིས་དེ་ལ་འདི་སྐད་ཅེས་བཀའ་སྩལ་ཏོ། །ཀླུའི་བདག་པོ་བྱང་ཆུབ་སེམས་དཔའ་སེམས་དཔའ་ཆེན་པོ་ཆོས་གཅིག་དང་ལྡན་ན་རྣམ་པའི་མཆོག་ཐམས་ཅད་དང་ལྡན་པའི་སངས་རྒྱས་ཀྱི་ཆོས་རྣམས་ཡོངས་སུ་འཛིན་ཏོ། །ཆོས་གཅིག་པོ་གང་ཞེ་ན། འདི་ལྟ་སྟེ། སེམས་ཅན་ཐམས་ཅད་མི་གཏོང་བའི་ཐམས་ཅད་མཁྱེན་པའི་སེམས་སོ། །དེའི་ཐམས་ཅད་མཁྱེན་པའི་སེམས་དེ་ཡང་རྣམ་པ་སུམ་ཅུ་རྩ་གཉིས་ཀྱིས་ཤིན་ཏུ་བསྡུས་པ་ཡིན་ཏེ། སུམ་ཅུ་རྩ་གཉིས་གང་ཞེ་ན་འདི་ལྟ་སྟེ། བསམ་པས་བསྡུས་པ་ཡིན། ལྷག་པའི་བསམ་པས་བསྡུས་པ་ཡིན། བྱམས་པ་ཆེན་པོས་བསྡུས་པ་ཡིན། སྙིང་རྗེ་ཆེན་པོས་བསྡུས་པ་ཡིན། ཡོངས་སུ་མི་སྐྱོ་བས་བསྡུས་པ་ཡིན། སྟོབས་ཀྱིས་བསྡུས་པ་ཡིན། རྣམ་པར་གནོན་པས་བསྡུས་པ་ཡིན། མཐུས་བསྡུས་པ་ཡིན། སོ་སོར་བརྟགས་པས་བསྡུས་པ་ཡིན། དགེ་བའི་བཤེས་གཉེན་གྱིས་བསྡུས་པ་ཡིན། ཆོས་སྤྱོད་པས་བསྡུས་པ་ཡིན། དགེ་བ་སྤྱོད་པས་བསྡུས་པ་ཡིན། བསྡུ་བའི་དངོས་པོས་བསྡུས་པ་ཡིན། སྡོམ་པས་བསྡུས་པ་ཡིན། ཐབས་ཀྱིས་བསྡུས་པ་ཡིན། བཅོས་མ་མ་ཡིན་པས་བསྡུས་པ་ཡིན། ཇི་སྐད་སྨྲས་པ་དེ་བཞིན་བྱེད་པས་བསྡུས་པ་ཡིན།