།རྫུ་འཕྲུལ་གྱིས་ཀྱང་སངས་རྒྱས་ཀྱི་ཞིང་མཐའ་ཡས་པ་དག་ཏུ་འགྲོ་ཞིང་སེམས་ཅན་གང་དག་རྫུ་འཕྲུལ་གྱིས་འདུལ་བ་དག་ཀྱང་རྫུ་འཕྲུལ་གྱིས་འདུལ་ཏེ། དེའི་ཕྱིར་མངོན་པར་ཤེས་པའི་ལམ་ཞེས་བྱའོ། །དེ་ལ་ཚད་མེད་པའི་ལམ་ནི་གང་སྡུག་པའི་རྣམ་པར་ལྟུང་བའི་ཚངས་པ་རྣམས་དང་། གཟུགས་ན་སྤྱོད་པའི་ལྷ་གཞན་དག་གི་སེམས་ཀྱི་འཇུག་པ་ཡང་རབ་ཏུ་ཤེས་ཏེ། འདི་ནི་བྱམས་པའི་སེམས། འདི་ནི་སྙིང་རྗེ་ཆེན་པོའི་སེམས། འདི་ནི་དགའ་བའི་སེམས། འདི་ནི་བཏང་སྙོམས་ཀྱི་སེམས་སོ་ཞེས་ཇི་ལྟ་བུས་འདུལ་བ་དེ་བཞིན་དུ་རབ་ཏུ་འདྲེན་ཏེ། དེ་ཕྱིར་ཚད་མེད་པའི་ལམ་ཞེས་བྱའོ། །དེ་ལ་ཡན་ལག་བརྒྱད་པའི་ལམ་ནི་སེམས་ཅན་ཐམས་ཅད་ཀྱི་རྗེས་སུ་སོང་བ་དང་། ཉན་ཐོས་ཀྱི་ཐེག་པའི་རྗེས་སུ་སོང་བ་དང་། རང་སངས་རྒྱས་ཀྱི་ཐེག་པའི་རྗེས་སུ་སོང་བ་དང་། ཐེག་པ་ཆེན་པོའི་རྗེས་སུ་སོང་བ་སྟེ། ཐམས་ཅད་ཀྱི་རྗེས་སུ་འགྲོ་བས་དེའི་ཕྱིར་ཡན་ལག་བརྒྱད་པའི་ལམ་ཞེས་བྱའོ། །དེ་ལ་སེམས་ཅན་ཐམས་ཅད་ལ་སེམས་མཉམ་པའི་ལམ་ནི་འདིའི་ནི་བྱའོ། །འདིའི་ནི་མི་བྱའོ། །འདི་ལ་ནི་བཤད་དོ། །འདི་ལ་ནི་མི་བཤད་དོ། །འདི་ནི་སྦྱིན་གནས་སོ། །འདི་ནི་སྦྱིན་གནས་མ་ཡིན་ནོ་ཞེས་དེ་རྣམ་པར་རྟོག་པ་ལ་མི་སྤྱོད་དེ། སེམས་ཅན་ཐམས་ཅད་ལ་སེམས་མཉམ་པ་ཉིད་ཀྱི་རྗེས་སུ་འགྲོ་བས་དེའི་ཕྱིར་སེམས་ཅན་ཐམས་ཅད་ལ་སེམས་མཉམ་པའི་ལམ་ཞེས་བྱའོ། །དེ་ལ་རྣམ་པར་ཐར་པ་གསུམ་གྱི་ལམ་ནི་དམིགས་པ་ཐམས་ཅད་སྤང་བའི་ཕྱིར་སྟོང་པ་ཉིད་དང་། རྟོག་པ་དང་། རྣམ་པར་རྟོག་པ་དང་། ཡོངས་སུ་རྟོག་པ་དང་། མཚན་མ་དང་། རྣམ་པར་རྟོག་པ་ཐམས་ཅད་སྤང་བའི་ཕྱིར་མཚན་མ་མེད་པ་དང་། ཁམས་གསུམ་པ་ལ་རྟོན་པ་སྤང་བའི་ཕྱིར་སྨོན་པ་མེད་པ་སྟེ། དེའི་ཕྱིར་རྣམ་པར་ཐར་པ་གསུམ་གྱི་ལམ་ཞེས་བྱའོ། །དེ་ལ་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པའི་ལམ་ནི་བྱང་ཆུབ་སེམས་དཔའ་ལུང་བསྟན་པ་རབ་ཏུ་ཐོབ་པ་ཡིན་ཏེ། མི་སྐྱེ་བ་ལ་བཟོད་པ་དེ་དང་ལྡན་པར་རིག་ནས་སངས་རྒྱས་བཅོམ་ལྡན་འདས་རྣམས་བྱང་ཆུབ་སེམས་དཔའ་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་ལུང་སྟོན་ཏེ། དེའི་ཕྱིར་མི་སྐྱེ་བའི་ཆོས་ལ་བཟོད་པ་རབ་ཏུ་ཐོབ་པའི་ལམ་ཞེས་བྱའོ།