ཤིན་ཏུ་འབྱུང་བ་མེད་པའི་མཐའ་དེ་ནི་དབེན་པ་ཞེས་བྱའོ། །འཇམ་དཔལ་དབེན་པ་ལ་ནི་སྐྱེ་བ་དང་རྒ་བ་དང་། འཆི་བ་མེད་དོ། །གང་ལ་སྐྱེ་བ་དང་རྒ་བ་དང་འཆི་བ་མེད་པ་དེ་ལ་སྡུག་བསྔལ་མེད་དོ། །གང་ལ་སྡུག་བསྔལ་མེད་པ་དེ་ལ་སྡུག་བསྔལ་མི་འབྱུང་ངོ་། །གང་ལ་སྡུག་བསྔལ་མི་འབྱུང་བ་དེ་འཇིགས་པ་མེད་དོ། །གང་འཇིགས་པ་མེད་པ་དེ་སེམས་དང་རྣམ་པར་ཤེས་པ་དང་བྲལ་བའོ། །གང་སེམས་དང་རྣམ་པར་ཤེས་པ་དང་བྲལ་བ་དེ་ནི་མ་སྐྱེས་མ་འགགས་པའོ། །གང་མ་སྐྱེས་པ་མ་འགགས་པ་དེ་དབེན་པ་སྟེ། དེ་དང་དེས་གནས་པས་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་དབེན་པར་གནས་པ་ཞེས་བྱའོ། །འཇམ་དཔལ་དེ་བཞིན་གཤེགས་པ་ནི་གནས་པ་མེད་པའོ། །དེ་བཞིན་གཤེགས་པར་བརྟགས་པ་ནི་བརྟགས་པ་མེད་པའོ། །ཆོས་ཐམས་ཅད་མི་མཐོང་བ་ནི་དེ་བཞིན་གཤེགས་པ་མཐོང་བའོ། །དེ་བཞིན་གཤེགས་པའི་ཚིག་ནི་ཚིག་ཐམས་ཅད་ལས་འདས་པ་སྟེ། བསྟན་དུ་མེད་པའོ། །དེ་ཅིའི་ཕྱིར་ཞེ་ན། འཇམ་དཔལ་ངས་ནི་ཆོས་ཐམས་ཅད་ཀྱི་ཡི་གེ་དང་ངེས་པའི་ཚིག་གིས་བསྟན་པ་འགག་པའི་ཕྱིར་ཆོས་སྟོན་གྱི་འཇམ་དཔལ་དེ་བཞིན་གཤེགས་པ་ནི་ཡི་གེ་གཅིག་ཀྱང་མི་བརྗོད་དོ། །དེ་ཅིའི་ཕྱིར་ཞེ་ན། དེ་བཞིན་གཤེགས་པ་ལ་སེམས་ཀྱི་འཇུག་པ་མེད་དོ། །སེམས་ཀྱི་ལས་མེད་དོ། །སེམས་ལས་ངེས་པར་སེམས་པ་མེད་དོ། །སེམས་ཀྱི་རྒྱུ་བ་མེད་དོ། །སེམས་ཡོངས་སུ་རྟོགས་པ་མེད་དོ། །སེམས་ཀྱི་ཞི་གནས་མེད་དོ། །སེམས་ཀྱི་རྗེས་སུ་འབྲང་བ་རྣམ་པར་ཤེས་པ་མེད་དོ། །རང་གི་སེམས་ཀྱི་གནས་མེད་དོ། །གཞན་གྱི་སེམས་ཀྱི་གནས་མེད་དོ། །དེ་བཞིན་གཤེགས་པ་ལ་གཟུགས་དང་ཚོར་བ་དང་འདུ་ཤེས་དང་འདུ་བྱེད་དང་རྣམ་པར་ཤེས་པ་ལ་གནས་པའི་སེམས་མེད་དོ། །མིག་དང་རྣ་བ་དང་སྣ་དང་ལྕེ་དང་ལུས་དང་ཡིད་ལ་གནས་པའི་སེམས་མེད་དོ། །དེ་བཞིན་གཤེགས་པ་ལ་གཟུགས་དང་སྒྲ་དང་དྲི་དང་རོ་དང་རེག་བྱ་དང་ཆོས་ལ་གནས་པའི་སེམས་མེད་དོ། །དེ་ཅིའི་ཕྱིར་ཞེ་ན། འཇམ་དཔལ་དེ་བཞིན་གཤེགས་པ་ནི་ཞི་བའོ། །བསིལ་བར་གྱུར་པའོ། །རྟག་ཏུ་མཉམ་པར་གཞག་པའོ། །མི་སྣང་བའོ། །བལྟར་མེད་པའོ།