ཆུ་སྲིན་དེས་སངས་རྒྱས་ཀྱི་སྒྲ་ཐོས་ནས་རྣ་བར་སྙན་པར་གྱུར་ཏེ། དེའི་ཁ་བཙུམས་པ་དང་། དེ་ནས་ཚོང་པ་དེ་དག་ཐམས་ཅད་ཉོན་མོངས་པ་དེ་ལས་ཐར་ཏོ། །མཽད་གལ་གྱི་བུ་དེ་ཇི་སྙམ་དུ་སེམས། དེའི་ཚེ་དེའི་དུས་ན་དེད་དཔོན་འབྱུང་པོ་ཀུན་ལ་བརྩེ་བ་དང་ལྡན་པ་ཞེས་བྱ་བར་གྱུར་པ་དེ་གཞན་ཡིན་པར་སེམས་ན། ཁྱོད་ཀྱིས་དེ་ལྟར་མི་བལྟ་སྟེ། དེ་ཅིའི་ཕྱིར་ཞེ་ན། ང་དེའི་ཚེ་དེའི་དུས་ན་དེད་དཔོན་འབྱུང་པོ་ཀུན་ལ་བརྩེ་བ་དང་ལྡན་པ་ཞེས་བྱ་བར་གྱུར་ཏོ། །མཽད་གལ་གྱི་བུ་དེ་ལྟ་བས་ན་བྱང་ཆུབ་སེམས་དཔའ་མོས་པ་དུ་མ་ཤེས་པ་མངོན་པར་རྫོགས་པ་ཤེས་པར་འདོད་པས་དངོས་པོར་འཛིན་པ་བསལ་བར་བརྩོན་པར་བྱའོ། །མཽད་གལ་གྱི་བུ་ངས་མོས་པ་དུ་མ་ཤེས་པ་ཀུན་འབྱུང་བ་ཤེས་པར་བྱ་བའི་དོན་དུ་སྔོན་བྱང་ཆུབ་སེམས་དཔའི་སྤྱད་པ་སྤྱོད་པ་ན་དགེ་བའི་རྩ་བ་རྣམ་པ་སྣ་ཚོགས་དུ་མ་དག་མངོན་པར་འདུས་བྱས་སོ། །མཽད་གལ་གྱི་བུ་སྔོན་བྱུང་བ་འདས་པའི་དུས་འཁོར་བ་དཔག་ཏུ་མེད་པ་ནས། དེའི་ཕ་རོལ་གྱི་ཡང་ཆེས་ཕ་རོལ་ན་དེ་བཞིན་གཤེགས་པ་སེམས་ཅན་གྱི་གཉེན་ཞེས་བྱ་བ་འཇིག་རྟེན་དུ་བྱུང་སྟེ། དེ་བཞིན་གཤེགས་པ་སེམས་ཅན་གྱི་གཉེན་དེའི་སངས་རྒྱས་ཀྱི་ཞིང་དེར་བྱང་ཆུབ་སེམས་དཔའ་རྟག་ཏུ་བརྩོན་ཞེས་བྱ་བ་བརྩོན་འགྲུས་བརྩམས་པ། སེམས་ཞུམ་པ་མེད་པ། གོ་ཆ་ཆེན་པོ་བགོས་པ། སངས་རྒྱས་ཀྱི་ཞིང་དཔག་ཏུ་མེད་པར་སྨོན་ལམ་ཡོངས་སུ་དག་པ་དང་ལྡན་པ། སངས་རྒྱས་ཀྱི་ཞིང་གྲངས་མེད་ཅིང་བསམ་གྱིས་མི་ཁྱབ། གཞལ་དུ་མེད། བརྗོད་དུ་མེད་པར་སྨོན་ལམ་ཡོངས་སུ་དག་པ་དང་ལྡན་པ་ཞིག་བྱུང་ངོ་། །དེ་འདི་སྙམ་དུ་སེམས་ཏེ། སེམས་ཅན་དག་མོས་པ་སྣ་ཚོགས་དང་མོས་པ་དུ་མ་ཤེས་པའི་རྒྱུ་ནི་གང་རྐྱེན་ནི་གང་། སེམས་ཅན་དག་མོས་པ་སྣ་ཚོགས་གང་དང་ལྡན་སྙམ་མོ། །དེ་འདི་སྙམ་དུ་སེམས་ཏེ། སེམས་ཅན་དག་ཡུལ་གང་དང་གང་ལ་མང་དུ་བསྟེན་པ་དེ་ཉིད་ལ་མོས་ཤིང་དེ་ཉིད་ལ་དགའ་སྟེ། དེ་དང་དེ་ཉིད་ཀྱིས་མངོན་པར་དགའ། དེ་ལ་གཞོལ་བར་འགྱུར། དེ་ལ་འབབ་དེ་ལ་བབ་སྟེ་ཡུལ་གཞན་ལ་ཡང་མི་འཐུན་པར་འགྱུར་རོ། །དེ་ནས་དེ་ཡུལ་དེ་མ་དམིགས་པ་ན་ཡང་གཞན་གང་ལ་གོམས་པ་ཡོད་ནས། དེ་ལ་ཡང་དེ་ཉིད་ཡིན་པར་འཛིན་ཏེ་དེ་ལ་མོས་པར་ཡང་འགྱུར་རོ།