གང་ཟག་འདི་ནི་བྱམས་པ་འདི་ལྟ་བུ་ཞིག་གིས་ཀུན་ནས་ཉོན་མོངས་པར་འགྱུར། གང་ཟག་འདི་ནི་བྱམས་པ་འདི་ལྟ་བུ་ཞིག་གིས་རྣམ་པར་དག་པར་འགྱུར་རོ་ཞེས་དེ་ལྟར་ན་དེ་བཞིན་གཤེགས་པས་ཐམས་ཅད་མཁྱེན་པ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་ཐམས་ཅད་མཁྱེན་པ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། དེ་བཞིན་དུ་སྦྱར་ཏེ། ལོངས་སྤྱོད་པའི་བར་དུ་འགྱུར་རོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་ཐམས་ཅད་མཁྱེན་པ་ཤེས་པ་ཀུན་འབྱུང་བ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་རྒྱུ་གང་དང་རྐྱེན་གང་དག་གིས་ཐམས་ཅད་མཁྱེན་པ་ཤེས་པ་ཡང་དག་པར་འགྲུབ་པ་གལ་ཏེ་མི་རྟག་པར་རྗེས་སུ་ལྟ་བར་གནས་པའམ། གལ་ཏེ་སྡུག་བསྔལ་བར་རྗེས་སུ་ལྟ་བར་གནས་པའམ། གལ་ཏེ་ནད་དུ་རྗེས་སུ་ལྟ་བར་གནས་པའམ། གལ་ཏེ་འབྲས་སུ་རྗེས་སུ་ལྟ་བར་གནས་པའམ། གལ་ཏེ་ཟུག་རྔུར་རྗེས་སུ་ལྟ་བར་གནས་པའམ། གལ་ཏེ་སྡིག་པར་རྗེས་སུ་ལྟ་བར་གནས་པའམ། ཉམས་པར་རྗེས་སུ་ལྟ་བར་གནས་པའམ། གལ་ཏེ་གཡོ་བར་རྗེས་སུ་ལྟ་བར་གནས་པའམ། རབ་ཏུ་འཇིག་པར་རམ། ཉེས་པར་རམ། འགོ་བའི་ནད་དུའམ། སྟོང་པ་ཉིད་དུའམ། བདག་མེད་པར་རམ། གལ་ཏེ་རོ་མྱང་བ་མེད་པར་རྗེས་སུ་ལྟ་བར་གནས་པའམ། གལ་ཏེ་ཉེས་དམིགས་སུ་རྗེས་སུ་ལྟ་བར་གནས་པའམ། གལ་ཏེ་གནོད་པར་རྗེས་སུ་ལྟ་བར་གནས་པའམ། གལ་ཏེ་ཕྱིར་རྒོལ་བར་རྗེས་སུ་ལྟ་བར་གནས་པའི་བར་དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་ཐམས་ཅད་མཁྱེན་པ་ཤེས་པ་ཀུན་འབྱུང་བ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། ལོངས་སྤྱོད་པའི་བར་དུ་འགྱུར་རོ། །ཁྱིམ་བདག་ཇི་ལྟར་ན་དེ་བཞིན་གཤེགས་པས་ཐམས་ཅད་མཁྱེན་པ་ཤེས་པ་འགོག་པ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་འདི་ལྟར་རབ་ཏུ་མཁྱེན་ཏེ། སེམས་ཅན་དཔག་ཏུ་མེད་པ་རྣམས་ཀྱི་དོན་བྱས་ཤིང་དོན་མ་ཡིན་པ་བཟློག་ལ། སྣང་བ་བྱས་ཤིང་མུན་པ་བསལ་ཏེ། སེམས་ཅན་དཔག་ཏུ་མེད་པ་རྣམས་སྡུག་བསྔལ་ལས་ཡོངས་སུ་ཐར་བར་བྱས་ནས། བདེ་བ་ལ་བཙུད་པ་ནི་ཐམས་ཅད་མཁྱེན་པ་ཤེས་པ་འགོག་པ་སྟེ།