Degé Kangyur volume 47, F.61.b

དབང་པོ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། འབྱུང་བ་ཆེན་པོ་བཞི་དག་གི་དང་བ་ནི་མིག་གི་དབང་པོ་ཡིན་ཏེ། སའི་ཁམས་དང་བ་དང་། ཆུའི་ཁམས་དང་བ་དང་། མེའི་ཁམས་དང་བ་དང་། རླུང་གི་ཁམས་དང་བ་ཡིན་ཏེ། དེ་ལ་སའི་ཁམས་དང་བ་ཡང་མིག་མ་ཡིན་ལ། སའི་ཁམས་དང་བ་ལས་གཞན་པ་ཡང་མིག་མ་ཡིན། ཆུའི་ཁམས་དང་བ་ཡང་མིག་མ་ཡིན་ལ། ཆུའི་ཁམས་དང་བ་ལས་གཞན་པ་ཡང་མིག་མ་ཡིན། མེའི་ཁམས་དང་བ་ཡང་མིག་མ་ཡིན་ལ། མེའི་ཁམས་དང་བ་ལས་གཞན་པ་ཡང་མིག་མ་ཡིན། རླུང་གི་ཁམས་དང་བ་ཡང་མིག་མ་ཡིན་ལ། རླུང་གི་ཁམས་དང་བ་ལས་གཞན་པ་ཡང་མིག་མ་ཡིན་མོད་ཀྱི། ཁྱིམ་བདག་འོན་ཀྱང་ལས་ཀྱི་རྣམ་པར་སྨིན་པས་མིག་ཡོངས་སུ་གྲུབ་པ་ཡིན་ཏེ། དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །​དེ་ལ་ཤེས་པ་དང་། མཐོང་བ་ནས་མཁས་པའི་བར་གང་ཡིན་པ་འདི་ནི་མིག་གི་དབང་པོ་ཤེས་པ་ཞེས་བྱ་སྟེ། དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །​དེ་བཞིན་གཤེགས་པ་མིག་གི་དབང་པོ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། དེ་བཞིན་དུ་སྦྱར་ཏེ། དེ་ནི་ཙན་དན་གྱི་ཁྱམས་དང་ཁང་བཟངས་ཀྱི་བར་འདི་ལ་ལོངས་སྤྱོད་པར་འགྱུར་རོ། །​ཁྱིམ་བདག་ཇི་ལྟར་ན་དེ་བཞིན་གཤེགས་པས་མིག་གི་དབང་པོ་ཤེས་པ་ཀུན་འབྱུང་བ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་འདི་ལྟར་རབ་ཏུ་མཁྱེན་ཏེ། སངས་རྒྱས་བཅོམ་ལྡན་འདས་དཔག་ཏུ་མེད་པ་རྣམས་ལ་དགེ་བའི་རྩ་བ་བསྐྱེད་ནས། མིག་གི་དབང་པོ་ཤེས་པ་ཀུན་འབྱུང་བ་ཤེས་པ་ཡང་དག་པར་འགྲུབ་པ་དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །​ཁྱིམ་བདག་གཞན་ཡང་དེ་བཞིན་གཤེགས་པས་འདི་ལྟར་རབ་ཏུ་མཁྱེན་ཏེ། རྒྱུ་གང་དང་རྐྱེན་གང་དག་གིས་མིག་གི་དབང་པོ་ཤེས་པ་ཀུན་འབྱུང་བ་ཤེས་པ་ཡང་དག་པར་འགྲུབ་པའི་རྒྱུ་དེ་དང་རྐྱེན་དེ་དག་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། གལ་ཏེ་མི་རྟག་པར་རྗེས་སུ་ལྟ་བར་གནས་པ་ནས། གལ་ཏེ་ཕྱིར་རྒོལ་བར་རྗེས་སུ་ལྟ་བར་གནས་པའི་བར་དེ་དེ་བཞིན་གཤེགས་པས་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་



The English translation of this folio by 84000 Translating the words of the Buddha can be found at:
https://read.84000.co/translation/toh99.html?part=UT22084-047-001-2672#UT22084-047-001-2672