འདི་བས་ཅུང་ཞིག་གོང་ན་ཞི་བ་ཉིད་དང་། གྱ་ནོམ་པ་ཉིད་ཡོད་དོ་སྙམ་ནས་དེས་བསམས་ཏེ་རྟོག་པ་མེད་པའི་བསམ་གཏན་ཐོབ་ནས་དེ་འདི་སྙམ་དུ་གྱུར་ཏེ། གང་ལ་རྟོག་པ་དང་དཔྱོད་པ་དག་མི་འབྱུང་བ་འདི་ནི། མྱ་ངན་ལས་འདས་པ་ཡིན་ཏེ། འདི་ནི་ཞི་བའོ། །འདི་ནི་གྱ་ནོམ་པའོ། །གང་ལ་རྟོག་པ་དང་དཔྱོད་པ་དག་མེད་པ་དེ་ཡང་དང་ཡང་དུ་སྐྱེ་བར་མི་འཇུག་ལ་ཉེ་བར་ལེན་པ་ཅུང་ཟད་ཀྱང་མེད་དེ་འདི་ནི་ཕུང་པོ་ལྷག་མ་མེད་པའི་དབྱིངས་སུ་མྱ་ངན་ལས་འདའོ་སྙམ་ནས་དེ་ཏིང་ངེ་འཛིན་དེ་ལས་ལངས་ནས། སྲོག་ཆགས་འབུམ་ཕྲག་དྲུག་བཟོད་པ་འདི་ལ་བཙུད་དོ། །དེ་དག་ཀྱང་འདི་སྙམ་དུ་གྱུར་ཏེ། རྟོག་པ་དང་དཔྱོད་པ་འདི་དག་སྤངས་ན་དེའི་སྐྱེ་བ་མི་འཇུག་སྟེ་དེ་ཡང་དང་ཡང་དུ་སྐྱེ་བ་མི་འཇུག་པ་འདི་ནི་མྱ་ངན་ལས་འདའ་བ་ཐོབ་བོ་སྙམ་མོ། །དེ་ལྟར་བཟོད་པ་དང་སྣང་བ་ལ་དགའ་བ་དེ་དག་ལ་འོད་གསལ་གྱི་གཞལ་མེད་ཁང་དག་བྱུང་བར་གྱུར་ཏོ། །དེ་ལྟར་གཞལ་མེད་ཁང་དེ་དག་མཐོང་ནས་འདི་སྙམ་དུ་གྱུར་ཏེ། འདི་ལྟ་སྟེ། མྱ་ངན་ལས་འདས་པ་ཞེས་བྱ་བ་འདི་ནི་ལོག་པར་འཛིན་པའོ། །གང་དགེ་སྦྱོང་དང་བྲམ་ཟེ་མྱ་ངན་ལས་འདས་པར་སྨྲ་བ་དེ་དག་ནི་ལོག་པར་ཞུགས་པའོ། །དེ་ཅིའི་ཕྱིར་ཞེ་ན། མྱ་ངན་ལས་འདས་པ་ལ་ནི་གཞལ་མེད་ཁང་མེད་དོ་སྙམ་ནས། དེ་དག་མཐོང་བ་ཐོབ་མ་ཐག་ཏུ་གཞལ་མེད་ཁང་དེ་དག་མི་སྣང་བར་གྱུར་ཅིང་སེམས་ཅན་དམྱལ་བ་ཆེན་པོར་ལྟུང་བར་གྱུར་ཏོ། །དེའི་ཚེ་བྲམ་ཟེ་མངོན་པར་ཤེས་པ་ལྔ་དང་ལྡན་ཞིང་རྣམ་པར་ལྟ་བ་པ་ཤེས་པ་སྣ་ཚོགས་ཡོད་པ་ཞེས་བྱ་བ་ཞིག་བྱུང་ངོ་། །དེས་སེམས་ཅན་དམྱལ་བ་ཆེན་པོར་ཞུགས་པ་དེ་དག་མཐོང་ནས་དེ་འདི་སྙམ་དུ་གྱུར་ཏེ། ཀྱེ་མ་འཇིག་རྟེན་གནས་པ་འདི་ནི་རབ་ཏུ་ཉམས་པ་སྟེ། འདི་ལྟར་སེམས་ཅན་ལོག་པར་འཛིན་པ་འདི་དག་སེམས་ཅན་དམྱལ་བ་ཆེན་པོར་རབ་ཏུ་ལྟུང་ངོ་སྙམ་མོ། །དེ་ལྟ་བུའི་ཏིང་ངེ་འཛིན་མཉམ་པར་གཞག་པ་ལ་ཇི་ལྟར་སེམས་མཉམ་པར་གཞག་པའི་རྫུ་འཕྲུལ་གྱི་སྟོབས་བསྐྱེད་པ་དེས་སེམས་ཅན་དམྱལ་བ་ཆེན་པོ་དེ་དག་ཐམས་ཅད་བསིལ་བར་བྱས་སོ། །བསིལ་བར་བྱས་ནས་སྒྲ་ཕྱུང་བ། ཀྱེ་སེམས་ཅན་དག་མྱ་ངན་ལས་འདས་པ་ཡོད་དེ། ཁྱོད་ཀྱིས་སྔོན་མྱ་ངན་ལས་འདས་པ་མ་ཐོས་ཤིང་། ཁྱོད་ཀྱིས་མྱ་ངན་ལས་འདས་པ་མ་ཡིན་པ་ལ་མྱ་ངན་ལས་འདས་པར་འདུ་ཤེས་ཏེ། དེས་ན་ཁྱེད་ཅག་དམྱལ་བར་སྐྱེས་སོ།