བར་སྣང་ལས་ཀུན་འབྱུང་གི་ཆོས་གང་ཡིན་པ་དེ་ཐམས་ཅད་ནི་འགོག་པའི་ཆོས་ཅན་ནོ་ཞེས་སྒྲ་ཐོས་ཏེ། བདག་སྒྲ་དེ་ཐོས་ནས་མི་དགའ་བ་སྐྱེས་ཏེ། འདུས་བྱས་ངན་པ་འཇིག་པའི་ཆོས་ཅན་གང་ལ་བདག་དགའ་བ་སྐྱེ་བ་བྲལ་བར་གྱུར་ཏེ། ཡབ་བདག་ནི་གང་མི་འགོག་པའི་ཆོས་དེ་ཚོལ་ལོ། །དེ་ལ་མ་དང་ཕ་དེ་དག་གིས་སྨྲས་པ། ཅི་འཁྲུལ་ཏམ། ཅི་སྐྲག་གམ། ཅི་དངངས་སམ། ཅི་གནོད་སྦྱིན་ནམ། འབྱུང་པོ་ཁ་ཅིག་གིས་མ་གཙེས་སམ། གཞོན་ནུ་མི་འགོག་པའི་ཆོས་ནི་གང་ཡང་མེད་དེ། གཞོན་ནུ་འདི་ལྟ་སྟེ་དཔེར་ན། ནམ་མཁའ་ལ་སྒྲིབ་པའམ། གཉེན་པོ་མེད་དོ། །གཞོན་ནུ་དེ་བཞིན་དུ་མི་འགོག་པའི་ཆོས་དེ་ནི་གང་ཡང་མེད་དོ། །དེས་ཕ་མ་དེ་དག་ལ་འདི་སྐད་ཅེས་སྨྲས་སོ། །ཡབ་ཡུམ་མི་སྐྱེ་ན་འགུམ་པ་མ་མཆིས་ཏེ། གང་སྐྱེ་བ་དེ་འགུམ་ལགས་སོ། །གང་མི་སྐྱེ་བ་ནི་དེའི་འགུམ་པ་མ་མཆིས་ཏེ། གང་གི་བུ་མཆིས་ན་དེའི་བུ་འགུམ་ལ། གང་ལ་བུ་མ་མཆིས་ན་དེའི་བུ་མི་འགུམ་པར་གདའ་ལགས་སོ། །དེའི་བུ་དག་ལས་བུ་སྐྱེས་ན་བུ་དང་ལྡན་པའི་བུ་འགུམ་པར་གདའ་ལགས་ཏེ། དེ་ལྟ་ལགས་པས་བུ་སྐྱེ་བ་མཆིས་ན་འགུམ་པ་ཡང་མཆིས་སོ། །བུ་སྐྱེ་བ་མ་མཆིས་ན་བུ་འགུམ་པར་ཡང་མི་འགྱུར་ལགས་ཏེ། དེ་ལྟར་ཉེ་བར་ལེན་པ་ཐམས་ཅད་ལ་ཡོངས་སུ་འཛིན་ཏེ། དེ་ལྟ་བས་ན་གང་ཉེ་བར་མི་ལེན་པ་དེ་དག་ལ་ནི་སྡུག་བསྔལ་མ་མཆིས་སོ། །དེ་འདི་སྙམ་དུ་གྱུར་ཏེ་ཐབས་ཤིག་ཡོད་དེ། ཐབས་གང་གིས་ཡོངས་སུ་འཛིན་པའི་ཉེས་པ་མི་བསྐྱེད་པར་བྱའོ་སྙམ་མོ། །དེ་ཡང་འདི་སྙམ་དུ་གྱུར་ཏེ། མངོན་པར་ཞེན་པ་ནི་ཡོངས་སུ་འཛིན་པའི་ཉེས་པ་སྟེ། མངོན་པར་ཞེན་པ་མེད་པ་ལ་ནི་ཡོངས་སུ་འཛིན་པའི་ཉེས་པ་མེད་པས། གང་བདག་གིས་སེམས་ཅན་ཐམས་ཅད་ཡོངས་སུ་གཟུང་བར་བྱ་ཞིང་དེ་དག་ལ་མངོན་པར་ཞེན་པར་ནི་མི་བྱའོ་སྙམ་མོ། །དེ་ཡང་འདི་སྙམ་དུ་གྱུར་ཏེ། སེམས་ཅན་འདི་དག་ནི་ཡོངས་སུ་འཛིན་པའི་ཉེས་པ་མི་ཤེས་ལ་དེ་ཉེས་པ་དེ་དག་སྤོང་བར་མི་བྱེད་དེ། ཉེས་པ་དེ་དག་མ་སྤངས་པས་ཡོངས་སུ་འཛིན་པའི་ཉེས་པས་གོས་ཏེ་བདག་གིས་འདི་ལྟར་སེམས་ཅན་ཐམས་ཅད་ཡོངས་སུ་གཟུང་བར་བྱ་ཞིང་སེམས་ཅན་དེ་དག་ཐམས་ཅད་བདག་གིས་བསླབ་པར་བྱ། ཡོངས་སུ་འཛིན་པའི་ཉེས་པ་ཡང་ཁོང་དུ་ཆུད་པར་བྱའོ་སྙམ་མོ།