།མི་ཡིས་འཇིག་རྟེན་རྙེད་དཀའ་ཐོབ་ནས་སུ། །རང་གིས་ཆུང་མ་ལ་ཡང་དབང་མེད་ཅིང་། །ལས་མི་ཤེས་པས་དེ་ནི་མྱ་ངན་བྱེད། །གང་དག་གཞན་གྱི་བུད་མེད་སྡོམ་བྱེད་ཅིང་། །གཞན་གྱི་བུད་མེད་དག་ལ་ཡིད་མི་གཏོད། །མི་ཡི་ལུས་ནི་དེ་ཡིས་སྤངས་ནས་སུ། །འདི་ནས་འཕོས་ནས་མཐོ་རིས་རབ་ཏུ་དགའ། །དེ་རྟག་ལྷ་ཡི་འཇིག་རྟེན་ཤེས་རབ་ལྡན། །མཁས་པ་མི་ཡི་འཇིག་རྟེན་ཐོབ་ནས་ཀྱང་། །གུས་བྱེད་བུད་མེད་རྙེད་ཅིང་རྗེས་འབྲང་ལ། །བསམ་པ་འཐུན་པའི་སློབ་མ་རྙེད་པར་འགྱུར། །མི་གང་ཚིག་ལ་ཤིན་ཏུ་མི་སྡོམ་པ། །དེ་ལ་དྲིས་ན་རྫུན་པའི་ཚིག་སྨྲ་སྟེ། །མི་ལས་ཤི་ནས་ངན་འགྲོར་དེ་འགྲོ་ཞིང་། །ལེགས་པ་མ་ཡིན་སྡུག་བསྔལ་ཚོར་མྱོང་འགྱུར། །དེ་ནས་ཤི་ནས་མི་ཡི་སྲིད་པར་འོངས། །མི་ཡི་འཇིག་རྟེན་རྙེད་དཀའ་ཐོབ་ནས་སུ། །ཡང་དག་མ་ཡིན་མེད་པའི་སྐུར་པ་འཐོབ། །མི་ཡི་འཇིག་རྟེན་དག་ཏུ་ཉོན་མོངས་འཚོ། །མི་གང་ཚིག་ནི་ཤིན་ཏུ་སྡོམ་པ་དག །བདེན་པ་སྲུང་ལ་བརྫུན་དུ་མི་སྨྲ་བ། །མི་ཡི་འཇིག་རྟེན་ཤི་ནས་བརྟུལ་ཞུགས་གཙང་། །ཡོན་ཏན་ལྡན་པ་ལྷ་ཡི་འཇིག་རྟེན་འགྲོ། །མཁས་པ་གཙང་བའི་ལས་དག་ཟད་ནས་སུ། །ལྷ་ལས་ཤི་ནས་མི་ཡི་འཇིག་རྟེན་འོང་། །དེ་ཡིས་སྨྲས་པ་ཡང་དག་ཚད་མར་འགྱུར། །གཙང་མའི་འབྲས་བུ་དེ་ནི་མི་འཐུན་མེད། །མི་ཡི་འཇིག་རྟེན་དུ་ནི་ཕྲ་མ་དང་། །མི་ཡི་སྲིད་པར་དབྱེན་སྦྱོར་བྱེད་པ་ནི། །མི་ཡི་ལུས་འདི་དག་ནི་སྤངས་ནས་སུ། །དེ་ནི་ངན་སོང་སྡུག་བསྔལ་འཐོབ་ཅིང་མྱོང་། །དེ་ནས་ཤི་ནས་མི་སྲིད་འདིར་འོངས་ཏེ། །མི་ཡི་འཇིག་རྟེན་རྙེད་དཀའ་འཐོབ་ནས་ཀྱང་། །ཇི་ལྟར་རྩྭ་རྩེར་ཟིལ་པ་མི་གནས་ལྟར། །མཛའ་བཤེས་དང་ནི་དེ་བཞིན་གཉེན་འབྱེད་དོ། །མི་འཐུན་པ་ཡི་མི་དག་བསྡུམས་བྱས་ན། །འདི་ནས་ཤི་ནས་མཐོ་རིས་རབ་ཏུ་དགའ། །དེ་ནི་ལྷ་ཡུལ་དག་ན་ཤིན་ཏུ་བཀུར། །ལྷ་ཡི་ཚོགས་ཀྱིས་མཁས་པ་ཡང་དག་མཆོད། །དེ་ནས་ཤི་ནས་མི་སྲིད་འདིར་འོངས་ཏེ། །བསམ་པ་འཐུན་པའི་བུད་མེད་ཕུན་སུམ་ཚོགས།