།དེ་ནས་ཀླུའི་རྒྱལ་པོ་དགའ་བོས་བཅོམ་ལྡན་འདས་ལ་ཚིགས་སུ་བཅད་པའི་དབྱངས་ཀྱིས་ཞུ་བ་ཞུས་པ། བདེ་བར་གཤེགས་པ་ཞི་གནས་ཐུགས་སུ་ཆུད། །རྒྱལ་བ་གང་ཟག་མཆོག་ལ་བདག་ཞུ་བ། །ཁྱོད་ཉིད་ལས་འཁྲུངས་བྱང་ཆུབ་རབ་གནས་པ། །མི་མཆོག་ཇི་ལྟར་ལྷག་མཐོང་དག་ལ་སྤྱད། །མི་འདུལ་ཁ་ལོ་སྒྱུར་ལ་དགའ་བོས་ཞུས། །ཀླུ་དེའི་སྔོན་གྱི་མཐའ་ནི་གཟིགས་པས་ན། །དགེ་བའི་ལས་བསགས་པ་དག་ཐུགས་ཆུད་ནས། །མི་འདུལ་ཁ་ལོ་སྒྱུར་བ་འདི་སྐད་གསུང་། །ཡེ་ཤེས་དམ་པ་བྱང་ཆུབ་མཆོག་བཙལ་ཕྱིར། །མ་ཞུམ་ཡིད་ཀྱིས་ནོར་དང་འབྲུ་དག་ལ། །སེར་སྣ་མེད་ཅིང་རྫས་མང་མི་ཉུང་དང་། །ཆུང་མ་དང་ནི་བདག་ཉིད་གཏོང་བར་བྱེད། །དེ་ཡིས་ལེགས་པའི་ལས་དེ་བྱས་པ་དང་། །གཏོང་བ་ཤིན་ཏུ་སྡུག་བསྔལ་བསྟེན་པས་ན། །ཡེ་ཤེས་དམ་པ་བདག་རྒྱལ་སངས་རྒྱས་འགྱུར། །དེ་ནི་ལྷག་མཐོང་སྤྱད་པའི་འབྲས་བུ་ཡིན། །དེ་ནས་ཀླུའི་རྒྱལ་པོ་ཉེ་དགའས་བཅོམ་ལྡན་འདས་ལ་ཚིགས་སུ་བཅད་པའི་དབྱངས་ཀྱིས་ཞུ་བ་ཞུས་པ། འགྲོ་བ་ཀུན་གྱི་འདྲེན་ལ་བདག་ཞུ་བ། །ཁྱོད་སྲས་བྱང་ཆུབ་ཇི་ལྟར་སྤྱད་བགྱིས་ན། །ཞི་གནས་ལྷག་མཐོང་མཉམ་པར་སྤྱོད་པ་དང་། །ཟང་ཟིང་མེད་ཞི་བྱང་ཆུབ་འཐོབ་འགྱུར་ལགས། །འདྲེན་པ་དེ་ལ་ཀླུ་དེས་ཞུས་པ་དང་། །ཞི་གནས་ལྷག་མཐོང་ཡང་དག་ལེན་མཁྱེན་པ། །ཐོགས་པ་མེད་པ་འདྲེན་པ་འདི་བརྙེས་པས། །དེ་ནི་བདེ་བར་གཤེགས་པའི་བསྟན་ལ་བཞག །བྱང་ཆུབ་སེམས་དཔའ་གང་ཞིག་སྤྱད་སྤྱོད་ཚེ། །གཉིས་ཀའི་སྟོབས་འདི་མཉམ་པར་བསྟེན་པས་ན། །དེ་ནི་བྱེ་བ་ཁྲག་ཁྲིག་མཐའ་ཡས་ཞིང་། །འགྲོ་བའི་དོན་དུ་མཉམ་པར་རྣམ་པར་སྦྱོང་། །བསྐལ་པ་བྱེ་བ་མང་པོ་དེ་འཚང་རྒྱ། །ཞིང་གི་དམ་པ་དག་ཀྱང་འགོད་འགྱུར་ཏེ། །དེའི་མཐའ་བསྔགས་པ་བསྐལ་པ་བྱེ་མང་དུ། །སངས་རྒྱས་བྱེ་བས་ཟད་པར་དེ་མི་སྤྱོད། །དེ་ཚེ་ཀླུ་ཡི་བདག་པོ་ཉེ་དགའ་ཡིས། །ཐེག་པ་མཉམ་པའི་བསྔགས་པ་ཐོས་ནས་སུ། །གཞལ་དུ་མེད་པའི་དགའ་བས་སེམས་བདེ་ནས། །བྱང་ཆུབ་མཆོག་གི་སེམས་རབ་བསྐྱེད་གྱུར་ཏོ། །འཇིག་རྟེན་ཕན་ཕྱིར་བྱང་ཆུབ་དེ་ལུང་བསྟན། །མ་འོངས་དུས་སུ་སངས་རྒྱས་འགྱུར་བ་སྟེ། །མིང་ནི་རྒྱལ་བ་འདྲེན་པ་ཀུན་སྤྱན་ནོ།