།ཤིན་ཏུ་མི་བཟད་བདུད་སྟོབས་རབ་སྐྲག་བྱེད། །སྟོབས་བཅུའི་མཁྱེན་པས་རྒྱ་མཚོ་དེ་དགའ་ནས། །དེ་ཡི་སྐད་ཅིག་ས་ལ་པུས་བཙུགས་ཏེ། །འཇིགས་པར་མི་གནས་ཞི་བར་རབ་འདུག་ནས། །བདེ་བར་གཤེགས་ལ་ཐལ་སྦྱར་ཕྱག་འཚལ་བྱེད། །སྲིད་ཀུན་བདག་ལ་མི་གནས་ཕྱག་འཚལ་ལོ། །དངང་མེད་འཇིགས་བྲལ་ལྡན་ལ་ཕྱག་འཚལ་ལོ། །དངང་དང་འཇིགས་ལས་སྐྱེ་བོ་བསྒྲལ་བགྱི་ཞིང་། །དེ་བཞིན་གཤེགས་པ་མི་དངང་བདག་འགྱུར་བགྱི། །དེ་ནས་ཀླུའི་རྒྱལ་པོ་གསེར་གཙུག་གིས་བཅོམ་ལྡན་འདས་ལ་ཚིགས་སུ་བཅད་པའི་དབྱངས་ཀྱིས་ཞུ་བ་ཞུས་པ། དྲང་སྲོང་ཆེན་པོ་སྤྱན་དགེ་དབང་པོ་ཐུལ། །སྲིད་པའི་རྒྱ་མཚོ་རྒལ་ཅིང་ཕ་རོལ་ཕྱིན། །སྐམ་ལ་བཞུགས་པ་སྲེད་བསྐམས་གང་ཟག་མཆོག །འགྲོ་བའི་དོན་ཕྱིར་ཁྱོད་ཞུ་བཀའ་སྩལ་གསོལ། །ཇི་ལྟར་སྤྱད་ན་བདེ་གཤེགས་བདག་སྐྱེ་ཞིང་། །རྒྱལ་བའི་བསྟན་ལ་རབ་ཏུ་གནས་གྱུར་དང་། །བདུད་ཕྲག་སྟོང་དག་གིས་ཀྱང་མི་བསྐྱོད་པ། །ཀུན་སྤྱད་འདི་དག་བདག་ལ་བཀའ་སྩལ་གསོལ། །སངས་རྒྱས་ཚུལ་ལ་མི་གཡོ་རབ་གནས་ཤིང་། །ཀླུ་ཡི་གཙོ་བོས་འདྲེན་ལ་དེ་ཞུས་པ། །ཀླུ་ཡི་བདག་པོ་བསམ་པ་ཐུགས་ཆུད་ནས། །ཉོན་མོངས་ཀུན་སྤངས་དེ་ནི་ལུང་བསྟན་པ། །ལྷག་པའི་བསམ་པས་ཆོས་ཀྱི་ངེས་ལྡན་ཞིང་། །ངེས་པ་སྟོང་པའི་ཡུལ་ལ་རབ་ཏུ་གནས། །སྲིད་ལས་རྣམ་རྒྱལ་བསྟན་ལ་མི་གཡོ་ཞིང་། །གཞལ་མེད་བྱང་ཆུབ་ལ་ནི་འདུན་པ་བསྐྱེད། །གསེར་གཙུག་རྫུ་འཕྲུལ་ཆེ་བའི་ཀླུ་དེ་ནི། །སངས་རྒྱས་གསུངས་པ་ཐོས་ནས་ཐེ་ཙོམ་མེད། །བྱང་ཆུབ་ཕྱིར་ནི་མི་གཡོ་ཡིད་བསྐྱེད་ཅིང་། །འཇིགས་ཀུན་ཕ་རོལ་ཕྱིན་ལ་མངོན་པར་བསྟོད། །སྲིད་མཚོ་རྒལ་ཅིང་སྐམ་ལ་ཤིན་ཏུ་བཞུགས། །ཐེ་ཙོམ་མི་མངའ་མི་གཡོ་བརྟན་བརྙེས་ཤིང་། །སྲིད་པར་འཁོར་བརྟན་བཞིན་དུ་རབ་བཞུགས་པ། །རི་རབ་རི་ལ་ལྷ་ཡི་གནས་བཅས་བཞིན། །འདི་ལྟར་མི་གཡོ་བ་ལ་སྐྱབས་མཆི་ཞིང་། །མི་གཡོ་རི་ལྟ་བུར་ནི་འགྱུར་བར་བགྱི། །དེའི་ཚེ་འགུལ་དང་མི་འགུལ་ཞིང་མི་གནས། །མི་གཡོ་རི་རབ་ལྟ་བུར་འགྱུར་བར་བགྱི། །མ་སྨད་པས་ནི་དེ་ཡི་ཐུགས་ཆུད་ནས། །ཡིད་དུ་འོང་བའི་དབྱངས་ཀྱིས་ལུང་བསྟན་པ།