Degé Kangyur volume 47, F.10.a

དགྲ་བཅོམ་པ་ཡང་དག་པར་རྫོགས་པའི་སངས་རྒྱས་སུ་འགྱུར་བ་གང་ཡིན་པ་ནི་གནས་མ་ཡིན་ཞིང་སྐབས་མ་ཡིན་ནོ། །​འཇིག་རྟེན་གྱི་ཁམས་གཅིག་ཏུ་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གཉིས་འཇིག་རྟེན་དུ་འབྱུང་བ་གང་ཡིན་པ་ཡང་གནས་མ་ཡིན་ཞིང་སྐབས་མ་ཡིན་ནོ། །​ཁྱིམ་བདག་དེ་ལྟར་ན་དེ་བཞིན་གཤེགས་པས་གནས་མ་ཡིན་པ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །​ཁྱིམ་བདག་གཞན་ཡང་དེ་བཞིན་གཤེགས་པས་གནས་མ་ཡིན་པ་ཐོབ་པའི་གང་ཟག་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། གང་ཟག་འདིས་སངས་རྒྱས་ཁྲག་ཁྲིག་འདི་སྙེད་ཅིག་ཐུགས་བྱུང་བར་བྱས་པས། དེ་སངས་རྒྱས་ཀྱི་ཆོས་རྣམས་དང་། རང་སངས་རྒྱས་ཀྱི་ཆོས་རྣམས་དང་། ཉན་ཐོས་ཀྱི་ཆོས་རྣམས་ཀྱི་སྣོད་མ་ཡིན་པ་དེ་ལྟར་དེ་བཞིན་གཤེགས་པས་གནས་མ་ཡིན་པ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏོ། །དེ་བཞིན་གཤེགས་པ་གནས་མ་ཡིན་པ་ཤེས་པ་དེ་ལ་ཡང་ཞུ་བ་ཞུས་པ་ན། བསྐལ་པར་ལན་གསུང་བ་ནས། བསྐལ་པ་བརྗོད་དུ་མེད་པའི་ཡང་བརྗོད་དུ་མེད་པའི་བར་དག་ཏུ་ལན་གསུང་སྟེ། དེའི་སྤོབས་པ་ཟད་མི་ཤེས་སོ། །​དེ་ལྟ་བས་ན་འདིར་གང་གི་ཡེ་ཤེས་མཐོང་བ་ཐོགས་པ་མེད་པར་འཇུག་པ་དེ་ནི་ཙན་དན་གྱི་ཁྱམས་དང་ཁང་བཟངས་འདི་ལ་ལོངས་སྤྱོད་པར་འགྱུར་རོ། །​ཁྱིམ་བདག་གཞན་ཡང་ཇི་ལྟར་ན་དེ་བཞིན་གཤེགས་པས་གནས་མ་ཡིན་པ་ཤེས་པ་ཀུན་འབྱུང་བ་ཤེས་པ་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཅེ་ན། ཁྱིམ་བདག་འདི་ལ་དེ་བཞིན་གཤེགས་པས་རྒྱུ་གང་དང་རྐྱེན་གང་དག་གིས་གནས་མ་ཡིན་པ་ཤེས་པ་ཀུན་འབྱུང་བ་ཤེས་པ་ཡང་དག་པར་འགྲུབ་པའི་རྒྱུ་དེ་དང་རྐྱེན་དེ་དག་ཡང་དག་པ་ཇི་ལྟ་བ་བཞིན་རབ་ཏུ་མཁྱེན་ཏེ། གལ་ཏེ་རྟག་པར་རྗེས་སུ་བལྟ་བར་གནས་པའམ། གལ་ཏེ་སྡུག་བསྔལ་མ་ཡིན་པར་རྗེས་སུ་བལྟ་བའམ། གལ་ཏེ་ནད་མ་ཡིན་པར་རྗེས་སུ་བལྟ་བའམ། གལ་ཏེ་འབྲས་མ་ཡིན་པར་རྗེས་སུ་བལྟ་བའམ། གལ་ཏེ་ཟུག་རྔུ་མ་ཡིན་པར་རྗེས་སུ་བལྟ་བའམ། གལ་ཏེ་སྡིག་པ་མ་ཡིན་པར་རྗེས་སུ་བལྟ་བའམ། གལ་ཏེ་གཞན་མ་ཡིན་པར་རྗེས་སུ་བལྟ་བའམ། གལ་ཏེ་འཇིག་པ་མ་ཡིན་པར་རྗེས་སུ་བལྟ་བའམ། གལ་ཏེ་གཡོ་བ་མ་



The English translation of this folio by 84000 Translating the words of the Buddha can be found at:
https://read.84000.co/translation/toh99.html?part=UT22084-047-001-2569#UT22084-047-001-2569