Degé Kangyur volume 46, F.80.a

འདྲ་བདུངས་པ་ལས། །​གདོན་མི་འཚལ་བར་དགོངས་པ་རྫོགས་གྱུར་ཏེ། །​བདུད་ཀྱི་སྡེ་བཅོམ་མྱུར་དུ་ཐུབ་པར་བྱོན། །​དགེ་སློང་དག་དེ་ལྟར་བྱང་ཆུབ་སེམས་དཔས་མདའ་བླངས་ནས་གཞུ་དེ་དང་སྦྱར་ཏེ་བཀང་ནས་འཕངས་པའི་མཐུ་སྟོབས་ཀྱིས་ཀུན་དགའ་བོའི་འབེན་དུ་རྔ་བཙུགས་པ་དང་། ལྷ་སྦྱིན་གྱི་འབེན་དུ་རྔ་བཙུགས་པ་དང་། མཛེས་དགའ་བོའི་འབེན་དུ་རྔ་བཙུགས་པ་དང་། ལག་ན་བེ་ཅོན་ཅན་གྱི་འབེན་དུ་རྔ་བཙུགས་པ་དེ་དག་ཐམས་ཅད་ལས་ཐལ་ནས་རྒྱང་གྲགས་བཅུའི་ཕ་རོལ་ཏུ་བདག་གི་འབེན་ལྕགས་ཀྱི་རྔ་བཙུགས་པ་དང་། ཤིང་ཏ་ལ་བདུན་དངར་བ་དང་། ཕག་རྒོད་ཀྱི་གཟུགས་འཁྲུལ་འཁོར་དུ་བྱས་པ་ལས་ཀྱང་ཐལ་ཏེ་མདའ་དེ་ས་ལ་ཟུག་ནས་མི་སྣང་བར་ནུབ་པར་གྱུར་ཏོ། །​ས་ཕྱོགས་གང་དུ་མདའ་དེ་ཟུག་སྟེ་ནུབ་པའི་ས་ཕྱོགས་དེར་ཁྲོན་པ་ལྟ་བུའི་ཁུང་ཞིག་བྱུང་ནས་ད་ལྟར་ཡང་མདའི་ཁྲོན་པ་ཞེས་བྱ་བ་ཡིན་ནོ། །​དེའི་ཚེ་ལྷ་དང་མི་བརྒྱ་སྟོང་དག །​ཨེ་མ་ཨ་ལ་ལ་ཞེས་ཟེར་ཞིང་ཅ་ཅོ་དང་ག་ཞའི་སྒྲ་བརྒྱ་སྟོང་འབྱིན་པར་གྱུར་ཏོ། །​ཤཱཀྱའི་ཚོགས་དེ་དག་ཐམས་ཅད་ཀྱང་ངོ་མཚར་རྨད་དུ་བྱུང་བ་ཐོབ་སྟེ། ཀྱེ་ངོ་མཚར་ཏོ། །​འདིས་ནི་བསླབས་ཀྱང་མ་བསླབས་པར་རྩལ་གྱི་ཤེས་པ་དེ་ལྟ་བུ་དང་ལྡན་པ་ནི་ངོ་མཚར་ཆེའོ་ཞེས་ཟེར་རོ། །​ནམ་མཁའི་དཀྱིལ་ན་འཁོད་པའི་ལྷའི་བུ་དག་གིས་ཀྱང་རྒྱལ་པོ་ཟས་གཙང་མ་དང་། སྐྱེ་བོའི་ཚོགས་ཕལ་པོ་ཆེ་དེ་དག་ལ་འདི་སྐད་ཅེས་སྨྲས་སོ། །​དེ་ལྟར་ངོ་མཚར་ཡང་ཅི་ཆེ་སྟེ། དེ་ཅིའི་ཕྱིར་ཞེ་ན། འདི་ནི་ས་ཡི་སྙིང་པོ་སྔོན་གྱི་སངས་རྒྱས་གདན་ལ་བཞུགས། །​ཞི་གནས་གནམ་རུ་ཐོགས་ཤིང་སྟོང་པ་བདག་མེད་མདའ་རྣམས་ཀྱིས། །​ཉོན་མོངས་དགྲ་རྣམས་བཅོམ་སྟེ་ལྟ་བའི་དྲ་བ་དྲལ་ནས་སུ། །​བྱང་ཆུབ་དམ་པ་ཞི་བ་རྡུལ་མེད་མྱ་ངན་མེད་པ་འཐོབ། །​དེ་སྐད་ཅེས་སྨྲས་ནས། ལྷའི་བུ་དེ་དག་གིས་བྱང་ཆུབ་སེམས་དཔའ་ལ་ལྷའི་མེ་ཏོག་དག་གིས་མངོན་པར་གཏོར་ཏེ་དོང་ངོ་། །དེ་བཞིན་དུ་མཆོངས་པ་དང་། ཡི་གེ་དང་། ལག་རྩིས་དང་། རྩིས་དང་། གྲངས་དང་། གྱད་ཀྱི་འཛིན་སྟངས་དང་། རྒྱང་ནས་ཕོག་པ་དང་། བང་དང་། ཚར་དང་། རྐྱལ་དང་། འཕོང་དཔྱད་དང་། གླང་པོ་ཆེའི་གཉར་ཞོན་པ་དང་། རྟ་རྩལ་དང་། ཤིང་རྟའི་ཐབས་དང་། མདའ་གཞུའི་



The English translation of this folio by 84000 Translating the words of the Buddha can be found at:
https://read.84000.co/translation/toh95.html?part=UT22084-046-001-4219#UT22084-046-001-4219