Degé Kangyur volume 46, F.51.b

འབྲངས། །​ལྷ་ཅིག་ལྷ་མཆོག་བལྟམ་ཞིང་དེ་དག་བཙས་པས་རྒྱལ་ཁབ་ཕུན་སུམ་ཚོགས། །​རྗེ་ཅིག་རྒྱལ་པོར་གཤེགས་ཏེ་བསོད་ནམས་གཟི་འོད་ལྡན་པ་བལྟམ་པ་ཡི། །​ཡོན་ཏན་དག་ནི་མཐོང་བར་གྱུར་ནས་ལྷ་དང་མི་རྣམས་སྟོང་བགྲངས་པ། །​རབ་ཏུ་དགའ་བར་གྱུར་དང་ཀུན་ལ་ཉིད་ཀྱིས་ལེགས་པར་གཟིགས་སུ་གསོལ། །​མྱུར་དུ་རྒྱལ་གྱུར་ཅིག་ཅེས་བྱང་ཆུབ་དམ་པ་མྱ་ངན་མེད་པར་ཞུགས། །​དགེ་སློང་དག་དེ་ལྟར་བྱང་ཆུབ་སེམས་དཔའ་བཙས་པ་དང་སྐད་ཅིག་དེ་ལ་སྦྱིན་པ་གཏོང་བ་ཡང་དེ་བས་རྒྱ་ཆེར་གྱུར་ཏོ། །​ཡ་རབས་ཀྱི་རིགས་ལྔ་བརྒྱ་ཡང་བཙས་པར་གྱུར་ཏོ། །​གྲགས་ལྡན་ལ་སོགས་པ་བུ་མོ་ཁྲི་དང་། བྲན་མོ་བརྒྱད་བརྒྱ་དང་། འདུན་པ་ལ་སོགས་པ་བྲན་ལྔ་བརྒྱ་དང་། རྟེའུ་མོ་ཁྲི་དང་། བསྔགས་ལྡན་ལ་སོགས་པ་རྟེའུ་ཕོ་ཁྲི་དང་། བ་ལང་གི་ཕྲུག་གུ་མོ་ལྔ་བརྒྱ་དང་། བ་ལང་གི་ཕྲུག་གུ་ཕོ་ལྔ་བརྒྱ་པོ་དག་ཀྱང་བཙས་ཤིང་འབྲངས་པར་གྱུར་ནས་དེ་དག་ཐམས་ཅད་རྒྱལ་པོ་ཟས་གཙང་མས་སྣ་གྲངས་ཡི་གེར་བྲིས་ཏེ་སྲས་བུ་གཞོན་ནུ་རྩེན་པའི་ཕྱིར་བྱིན་པར་གྱུར་ཏོ། །​བྱང་ཆུབ་སེམས་དཔའི་ལོངས་སྤྱོད་ཀྱི་དོན་དུ་བྱང་ཆུབ་སེམས་དཔའ་ཉིད་ཀྱི་མཐུས་གླིང་བྱེ་བ་བརྒྱ་ཕྲག་བཞིའི་དབུས་ཀྱིས་ཕྱོགས་ནས་ཨ་ཤྭད་ཐའི་སྡོང་པོ་སྐྱེས་པར་གྱུར་ཏོ། །​གླིང་ཕྲ་མོ་རྣམས་སུ་ཡང་ཙན་དན་གྱི་ནགས་ཚལ་སྐྱེས་པར་གྱུར་ཏོ། །​བྱང་ཆུབ་སེམས་དཔའི་ལོངས་སྤྱོད་ཀྱི་དོན་དུ་གྲོང་ཁྱེར་གྱི་ཁོ་ར་ཡུག་ཏུ་ཡང་སྐྱེད་མོས་ཚལ་ལྔ་བརྒྱ་དག་བྱུང་བར་གྱུར་ཏོ། །​གཏེར་ལྔ་སྟོང་ཡང་སའི་འོག་ནས་གྱེན་དུ་འབུས་ཏེ་སྒོ་སྟོན་པར་གྱུར་ཏོ། །​དེ་ལྟར་རྒྱལ་པོ་ཟས་གཙང་མ་དེའི་དོན་བསམ་པ་གང་ཡིན་པ་དེ་དག་ཐམས་ཅད་ཕུན་སུམ་ཚོགས་པར་གྱུར་ནས་རྒྱལ་པོ་ཟས་གཙང་མ་འདི་སྙམ་དུ་བདག་གི་བུ་གཞོན་ནུ་དེའི་མིང་ཇི་སྐད་ཅིག་གདགས་པར་བྱ་སྙམ་པ་དང་། དེ་འདི་སྙམ་དུ་སེམས་ཏེ། བུ་འདི་སྐྱེས་མ་ཐག་ཏུ་བདག་གི་དོན་ཐམས་ཅད་ཡང་དག་པར་གྲུབ་པར་གྱུར་གྱིས། འདིའི་མིང་ནི་དོན་ཐམས་ཅད་གྲུབ་པར་གདགས་སོ་སྙམ་སྟེ། དེ་ནས་རྒྱལ་པོ་ཟས་གཙང་མས་བྱང་ཆུབ་སེམས་དཔའ་ལ་རིམ་གྲོ་ཆེར་བྱས་ནས་བུ་འདིའི་མིང་དོན་ཐམས་ཅད་གྲུབ་པ་ཞེས་བྱའོ་ཞེས་མིང་དུ་བཏགས་སོ། །​དགེ་



The English translation of this folio by 84000 Translating the words of the Buddha can be found at:
https://read.84000.co/translation/toh95.html?part=UT22084-046-001-4162#UT22084-046-001-4162