Degé Kangyur volume 46, F.10.a

ནས་བསྐོར་ཅིང་འདུག་པའི་ཚེ། ཤར་ཕྱོགས་ནས་ལྷའི་འཁོར་ལོ་རིན་པོ་ཆེ་རྩིབས་སྟོང་ཡོད་པ། མུ་ཁྱུད་དང་ལྡན་པ། ལྟེ་བ་དང་བཅས་པ། ཐམས་ཅད་གསེར་ལས་གྲུབ་པ། མགར་བས་མ་བྱས་པ། འཕང་དུ་ཤིང་ཏ་ལ་བདུན་ཙམ་ནས་འབྱུང་སྟེ། རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བས། ལྷའི་འཁོར་ལོ་རིན་པོ་ཆེ་དེ་མཐོང་ནས་འདི་སྙམ་དུ་སེམས་ཏེ། བདག་གིས་ཐོས་པ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་གསོ་སྦྱོང་གི་ཉི་མ་ཚེས་བཅྭ་ལྔ་ལ་མགོ་ཁྲུས་བྱས་ཏེ། དབུ་ཟུངས་སུ་གནས་ཤིང་སྟེང་གི་ཁྱམས་ན་བུད་མེད་ཀྱི་ཚོགས་ཀྱིས་ཀུན་ནས་བསྐོར་ཅིང་འདུག་པའི་ཚེ། ཤར་ཕྱོགས་ནས་ལྷའི་འཁོར་ལོ་རིན་པོ་ཆེ་བྱུང་བར་གྱུར་ན། དེ་ནི་འཁོར་ལོས་སྒྱུར་བའི་རྒྱལ་པོར་འགྱུར་རོ་ཞེས་ཐོས་ཏེ། བདག་གི་དྲུང་དུ་ལྷའི་འཁོར་ལོ་རིན་པོ་ཆེ་འོངས་པ་ལས་ན། བདག་ཀྱང་འཁོར་ལོས་སྒྱུར་བའི་རྒྱལ་པོ་ཡིན་དུ་ངེས་སོ་སྙམ་སྟེ། དེ་ནས་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་དེ་བླ་གོས་ཕྲག་པ་གཅིག་ཏུ་གཟར་ནས། པུས་མོ་གཡས་པའི་ལྷ་ང་ས་ལ་བཙུགས་ཏེ། ལག་པ་གཡས་པས་ལྷའི་འཁོར་ལོ་རིན་པོ་ཆེ་དེ་སྐོར་ཞིང་འདི་སྐད་དུ་བཙུན་པ་ལྷའི་འཁོར་ལོ་རིན་པོ་ཆེ་ཆོས་ཀྱིས་སྐོར་ཅིག །​ཆོས་མ་ཡིན་པས་ནི་མ་ཡིན་ནོ་ཞེས་བྱ་བའི་ཚིག་སྨྲས་པ་དང་། དེ་ནས་ལྷའི་འཁོར་ལོ་རིན་པོ་ཆེ་དེ་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བས་བསྐོར་བས་རྫུ་འཕྲུལ་གྱིས་ནམ་མཁའ་ལས་ཤར་ཕྱོགས་སུ་ལེགས་པར་འགྲོ་སྟེ། རྒྱལ་པོ་འཁོར་ལོས་སྒྱུར་བ་ཡང་དཔུང་གི་ཚོགས་ཡན་ལག་བཞི་པ་དང་ལྷན་ཅིག་རྗེས་སུ་འགྲོའོ། །​སའི་ཕྱོགས་གང་དུ་ལྷའི་འཁོར་ལོ་རིན་པོ་ཆེ་དེ་གནས་པར་འགྱུར་བ་དེར་རྒྱལ་པོ་རྒྱལ་རིགས་སྤྱི་བོ་ནས་དབང་བསྐུར་བ་དེ་ཡང་དཔུང་གི་ཚོགས་ཡན་ལག་བཞི་པ་དང་ལྷན་ཅིག་ཏུ་གནས་པར་འགྱུར་རོ། །​དེ་ནས་ཤར་ཕྱོགས་ཀྱི་ཁམས་ཀྱི་རྒྱལ་པོ་གང་ཡིན་པ་དེ་དག་དངུལ་གྱི་སྣོད་ནི་གསེར་ཕྱེས་བཀང་སྟེ་ཐོགས། གསེར་གྱི་སྣོད་ནི་དངུལ་སིལ་མས་བཀང་སྟེ་ཐོགས་ནས། འཁོར་ལོས་སྒྱུར་བའི་རྒྱལ་པོ་བསྩ་ཞིང་འདི་སྐད་དུ་ལྷ་འདིར་ལེགས་པར་གཤེགས་སོ། །​ལྷ་ཚུར་གཤེགས་སུ་གསོལ། ལྷའི་ཆབ་སྲིད་ནི་ཤིན་ཏུ་རྒྱས་ཤིང་འབྱོར་ལ་བདེ་



The English translation of this folio by 84000 Translating the words of the Buddha can be found at:
https://read.84000.co/translation/toh95.html?part=UT22084-046-001-4079#UT22084-046-001-4079