ཕྱོགས་རྣམས་ན་ནི་འགྲོ་བ་སེམས་ཅན་ཇི་སྙེད་གནས། །དེ་དག་ཀུན་གྱི་སེམས་ཀྱི་སྤྱོད་པ་རྣམས་དང་ནི། །དམན་དང་མཆོག་དང་ཐ་མ་བར་མ་རྒྱུ་ལྡན་མཁྱེན། །ཇི་སླད་འཛུམ་པ་མཛད་པ་བདག་ལ་བསྟན་དུ་གསོལ། །ལྷ་དང་དེ་བཞིན་ཞུགས་འབར་སྒྲ་ནི་གང་ལགས་དང་། །མི་འམ་ཅི་དང་མི་དང་བརྒྱ་བྱིན་ལྷ་མིན་དང་། །མཁའ་ལྡིང་ལྟོ་འཕྱེ་ཚངས་པའི་སྒྲ་དང་སྒྲ་གཞན་རྣམས། །སངས་རྒྱས་རྡུལ་བྲལ་གསུང་སྒྲའི་ཆར་ཡང་ག་ལ་སྤྱོད། །འོད་བཟང་ཉི་མའི་འོད་དང་ནོར་བུའི་འོད་རྣམས་དང་། །བརྒྱ་བྱིན་འོད་དང་ཚངས་པའི་འོད་རྣམས་ཇི་སྙེད་པ། །ཇི་ལྟར་སངས་རྒྱས་འོད་ཀྱིས་ཁྱབ་པར་གདའ་བ་ལྟར། །འོད་རྣམས་དེ་དག་ཐམས་ཅད་རྣམ་པར་གསལ་མ་ལགས། །སངས་རྒྱས་ཞིང་དེ་ཟབ་མོའི་ཆོས་ནི་རྗེས་སུ་ཐོབ། །སྟོང་པ་བདག་མེད་སེམས་ཅན་གང་ཟག་མེད་མཁྱེན་ནས། །ཡོད་དང་མེད་པའི་མཐའ་གཉིས་རྣམ་པར་སྤངས་ནས་སུ། །དུས་གསུམ་ཆུ་ཟླ་འདྲ་བར་རབ་ཏུ་མཁྱེན་པ་པོ། །དེང་འདིར་སུ་ཞིག་ཐེག་པའི་མཆོག་ལ་སེམས་བཏུད་དེ། །སུ་ཞིག་སངས་རྒྱས་རིགས་དང་ཆོས་ཀྱི་རིགས་ལ་གནས། །སུ་ཞིག་དཀོན་མཆོག་གསུམ་པོ་རྒྱ་ཆེར་སྐྱེད་པར་བགྱིད། །གང་གི་ཆེད་དུ་འཛུམ་པ་མཛད་པ་ལེགས་པར་གསུངས། །གལ་ཏེ་རྒྱལ་བ་ཉན་ཐོས་རྣམས་ལ་དོན་ལྡན་གསུང་། །དེ་ཚེ་བདེ་གཤེགས་འཛུམ་པ་ཞབས་ཀྱི་པུས་མོར་ནུབ། །གལ་ཏེ་རྐྱེན་གྱི་ཐེག་པ་གསུང་ན་ཕྲག་པར་ནུབ། །གལ་ཏེ་སངས་རྒྱས་ཐེག་གསུང་དེ་ཚེ་སྤྱི་བོར་ནུབ། །ཇི་ལྟར་ཁྱོད་ཀྱིས་འོད་ཟེར་འབུམ་སྙེད་རབ་བཏང་བ། །བདེ་བར་གཤེགས་ཀྱི་གཙུག་ཏུ་ནུབ་པར་གྱུར་ལགས་ན། །ཕན་མཛད་ལྷ་ཡི་ལྷ་སྟེ་ཕན་པ་མཛད་པ་པོ། །འདི་ནི་སངས་རྒྱས་ཐེག་པར་ལུང་སྟོན་དོགས་མ་མཆིས། །དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་བ། ཀུན་དགའ་བོ་ཁྱོད་ཀྱིས་རིགས་ཀྱི་བུ་བཟང་པོ་མཐོང་ངམ། གསོལ་པ། བཅོམ་ལྡན་འདས་མཐོང་ལགས་སོ། །བཀའ་སྩལ་པ། ཀུན་དགའ་བོ་རིགས་ཀྱི་བུ་བཟང་པོ་འདི་ནི་བསྐལ་པ་དགུ་ཁྲི་ཉིས་སྟོང་ན་བསྐལ་པ་ལེགས་པར་སྤྲུལ་པ་ལ་འཇིག་རྟེན་གྱི་ཁམས་བཀོད་པ་ཆེན་པོར་དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམ་པར་འཕྲུལ་པའི་རྒྱལ་པོ་ཞེས་བྱ་བར་འཇིག་རྟེན་དུ་འབྱུང་བར་འགྱུར་ཏེ།