མཁས་པ་དང་ཤེས་རབ་ཆེན་པོ་ལ་བསྙེན་བཀུར་བྱེད་པ་དང་། ཐོས་པའི་དོན་སེམས་པ་དང་། གཞན་གྱི་ཉེས་བ་མི་གླེང་ཞིང་གླེང་བ་གང་ཡིན་པ་ཡང་བྱམས་པས་གླེང་གི་སྐྱོན་གཙོར་བྱེད་པས་མ་ཡིན་པ་སྟེ། བཞི་པོ་དེ་དག་ཡིན་ནོ། །བཟང་པོ་བྱང་ཆུབ་སེམས་དཔའ་ཕན་ཡོན་བཞི་པོ་འདི་དག་མཐོང་ན་ཐོས་པ་ཚོལ་བར་བྱེད་དེ། བཞི་གང་ཞེ་ན། བདག་དང་གཞན་གྱི་ཤེས་རབ་སྦྱོང་བ་དང་། ཕྱོགས་བཞི་ནས་ལྷགས་པ་རྣམས་ཀྱི་ཐེ་ཚོམ་གཅོད་པ་དང་། དམ་པའི་ཆོས་འཛིན་པ་དང་། སངས་རྒྱས་ཀྱི་བསྔགས་པ་ཟད་མི་ཤེས་པ་སྟེ། བཞི་པོ་དེ་དག་ཡིན་ནོ། །བཟང་པོ་བཞི་པོ་འདི་དག་ནི་བྱང་ཆུབ་སེམས་དཔའ་རྣམས་ཀྱི་མང་དུ་ཐོས་པའི་སྙིང་པོ་ཡིན་ནོ། །བཞི་གང་ཞེ་ན། ཐོས་ནས་ཆོས་བྱེ་བྲག་ཏུ་ཤེས་པ་འདི་ནི་འདིའི་སྙིང་པོ་ཡིན་ནོ། །ཐོས་ནས་བྱ་བ་མ་ཡིན་པ་མི་བྱེད་པ་འདི་ནི་འདིའི་སྙིང་པོ་ཡིན་ནོ། །ཐོས་ནས་གཞན་ལ་སྟོན་པར་བྱེད་པ་འདི་ནི་འདིའི་སྙིང་པོ་ཡིན་ནོ། །ཐོས་ནས་དོན་དེ་ཉིད་རྣམ་པར་གྲོལ་བ་འདི་ལྟ་སྟེ། སངས་རྒྱས་བཅོམ་ལྡན་འདས་རྣམས་ཀྱི་བྱང་ཆུབ་ལ་གཏོད་པར་བྱེད་པ་འདི་ནི་འདིའི་སྙིང་པོ་ཡིན་ཏེ། བཞི་པོ་དེ་དག་ཡིན་ནོ། །བཟང་པོ་བཞི་པོ་འདི་དག་ནི་བྱང་ཆུབ་སེམས་དཔའ་ཆོས་སྟོན་པར་བྱེད་པའི་ཕན་ཡོན་ཡིན་ཏེ། བཞི་གང་ཞེ་ན། ལས་བྱས་ནས་ཀྱང་ཟས་ལ་ཡོངས་སུ་སྤྱོད་པ་དང་། ཆོས་གོས་དང་། བསོད་སྙོམས་དང་། མལ་ཆ་དང་། སྟན་དང་། ནད་གསོས་དང་། སྨན་ཟོང་རྣམས་རྙེད་པ་དང་། གཞན་གྱི་ཕྱོགས་མཐུ་ཆུང་བར་བྱེད་པ་དང་། ཆོས་འདོད་པའི་ལྷ་རྣམས་ཕྱི་བཞིན་འབྲང་ཞིང་དེ་དག་གིས་བསྲུངས་པས་བདུད་ཀྱིས་གླགས་མི་རྙེད་པ་སྟེ། བཟང་པོ་བཞི་པོ་དེ་དག་ནི་བྱང་ཆུབ་སེམས་དཔའ་ཆོས་སྟོན་པར་བྱེད་པའི་ཕན་ཡོན་ཡིན་ནོ། །བྱང་ཆུབ་སེམས་དཔའ་ཆོས་བཞི་དང་ལྡན་ན་གཞན་དག་ལ་ཆོས་སྟོན་པར་བྱེད་ཅིང་འདིའི་ཚིག་གི་ལམ་གཟུང་བར་འོས་པར་ཡང་འགྱུར་ཏེ། བཞི་གང་ཞེ་ན། འདོད་པ་ཆུང་བ་དང་། ཆོག་ཤེས་པ་དང་། ངང་ཚུལ་བཟང་ཞིང་མཉེན་པ་དང་། བདག་ཉིད་ཀྱི་ཆོས་སྒྲུབ་པ་སྟེ། བཞི་པོ་དེ་དག་ཡིན་ནོ།