།བསོད་ནམས་བདག་གིས་མ་བྱས་པས། །བདག་གི་ཕ་ཡང་ཤི་བར་གྱུར། །བདག་ནི་སྡུག་བསྔལ་ལྟུང་གྱུར་པས། །བདག་ཉིད་ཆེན་པོས་དྲང་དུ་གསོལ། །དེ་ནས་བློ་ལྡན་ཉན་ཐོས་མཆོག །སངས་རྒྱས་ཐུགས་ལས་སྐྱེས་པའི་སྲས། །འོད་སྲུང་ཆེན་པོ་ཞེས་གྲགས་པ། །སྐྱེ་དགུ་རྣམས་ལ་ཕན་བྱེད་པས། །མ་སྐྱེས་དགྲ་ནི་ངོ་ཚ་ལྡན། །སེམས་ཞུམ་གྱུར་ཏེ་མཐོང་ནས་ནི། །རྫུ་འཕྲུལ་ཉིད་ལ་རབ་གནས་ནས། །དེ་ཡི་དུས་སུ་ཡང་དག་དགོངས། །རྒྱལ་བའི་རིང་བསྲེལ་སྐུ་གདུང་ནི། །ཆ་གཅིག་ཁྱོད་ཀྱིས་བླང་བར་གྱིས། །རྒྱལ་པོ་གཞན་ནི་སྟོབས་ལྡན་གྱིས། །གཞན་དག་རབ་ཏུ་ཁྱེར་བར་གྱུར། །ཕན་ཚུན་བབ་ཅོལ་འཁྲུགས་ནས་ནི། །གཅིག་ལ་གཅིག་ནི་འཁོན་བྱས་ནས། །དེ་ཚེ་ནམ་མཁར་སྐུ་གདུང་ཁྱེར། །རང་གི་གནས་སུའང་བཞག་པར་འགྱུར། །དེ་ཚེ་ཐུབ་པའི་ཉན་ཐོས་མཆོག །དགེ་སློང་འོད་སྲུང་ཆེན་པོ་དེ། །ཀྱེ་མའོ་ཀྱི་ཧུད་སེམས་པ་ནི། །ས་སྟེང་འདིར་ནི་རབ་སྟོངས་པ། །སངས་རྒྱས་དང་ནི་རང་རྒྱལ་དང་། །རྫུ་འཕྲུལ་ཆེན་པོའི་ཉན་ཐོས་ཀྱིས། །སེམས་ཅན་འཇིགས་པར་སྣང་བ་སྟེ། །སྲིད་པའི་བཙོན་རར་སྤྱོད་པ་ཡིན། །རྣམ་པ་སྣ་ཚོགས་སྡུག་བསྔལ་དྲག །ཡུན་རིང་རྗེས་སུ་མྱོང་བར་འགྱུར། །འཇིག་རྟེན་མགོན་པོ་སྐྱོབ་པ་ཡི། །རིང་བསྲེལ་ཡང་དག་མཆོད་བྱས་ནས། །དེ་དག་ལྷ་ཡི་འཇིག་རྟེན་དུ། །ཡུན་མི་ཐུང་བར་བདེ་བ་མྱོང་། །རྒྱལ་སྲིད་དེ་ནས་ལོངས་སྤྱོད་དང་། །རྙེད་པར་དཀའ་བའི་སྔགས་རྣམས་ནི། །འགྲོ་བ་སྣ་ཚོགས་སྤྱོད་པ་ཡིས། །རྣམ་པ་སྣ་ཚོགས་ཐོབ་པར་འགྱུར། །ཕུན་ཚོགས་འདོད་པ་འཇིག་རྟེན་མཆོག །རྣམ་ཐར་གསུམ་གྱིས་རྣམ་པར་བརྒྱན། །སྐུ་གདུང་རྣམས་ནི་མཆོད་བྱས་ན། །གྲུབ་པ་མཆོག་ནི་ཐོབ་པར་འགྱུར། །འཇིག་རྟེན་རྣམས་གྲགས་བྲམ་ཟེ་ཞེས། །ཐུབ་པ་མཆོག་ནི་ཉན་ཐོས་གཙོ། །འོད་སྲུང་ཞེས་ནི་བྱ་བ་ཡིས། །འདི་ལྟར་དེ་ནི་བསམས་ནས་ནི། །དེ་ཚེ་ས་ལས་མ་ཕྱེ་བར། །དེ་ཡི་སྐུ་གདུང་བླངས་ནས་ནི། །མ་ག་དྷཱ་བདག་མ་སྐྱེས་དགྲས། །འབད་ནས་ཅུང་ཟད་ཡོངས་སུ་བྱིན། །དེ་བཞིན་རྒྱལ་པོ་ཀུན་ལ་ཡང་། །འོད་ཆེན་པོ་ནི་མ་མཐོང་ཡང་། །ཉན་ཐོས་བདག་ཉིད་ཆེན་པོ་དེས། །ཀུན་ལའང་ཐམས་ཅད་རབ་ཏུ་བྱིན།