།དེ་ཡི་དུས་སུ་འཇིགས་མེད་བྱ། །གཙུག་པུད་ལྔ་པའི་ཕྱག་རྒྱ་འམ། །གཙུག་ཏོར་ལས་བྱུང་གཞན་པའང་བཅིང་། །དེ་ནས་ཕྱོགས་ནི་བཅིང་བྱ་སྟེ། །སྟེང་དང་འོག་ཏུའང་དེ་བཞིན་ནོ། །དེ་ནས་དེ་ཡི་འབྱུང་བ་ཀུན། །བར་དང་ཐ་མར་རབ་ཏུ་བརྗོད། །དེ་བཞིན་དང་པོ་བར་མའི་དུས། །བྱུང་དང་མ་འོངས་དུས་དག་དང་། །དེ་བཞིན་ད་ལྟར་བྱུང་གྱུར་པ། །འོད་ལྡན་དེས་ནི་སྟོན་པར་འགྱུར། །དེ་བཞིན་འཛུམ་མེད་མིག་གིས་ནི། །ཆགས་བྲལ་དེས་ཟིན་རབ་ཏུ་ལྟ། །གང་ཡིན་དེས་བསྟན་ཚིག་གིས་ནི། །བདེན་པར་འགྱུར་གྱི་གཞན་དུ་མིན། །དེ་བཞིན་གྲུབ་དང་བསྒྲུབ་བྱའི་རྫས། །གང་ཞིག་ཚོགས་ཀྱི་རྣམ་པ་དང་། །རང་རྒྱལ་བྱང་ཆུབ་དགྲ་བཅོམ་དང་། །ངེས་པར་བྱང་ཆུབ་ཆེན་པོའང་དེ། །ངེས་པར་སངས་རྒྱས་ཉིད་རིག་ཉིད། །དེ་བཞིན་བྱང་ཆུབ་སེམས་རིགས་དང་། །རིགས་མེད་ཉིད་དང་དུས་དང་ནི། །སེམས་ཅན་སྐལ་ལྡན་བརྗོད་པའང་ཡིན། །དམ་ཚིག་གིས་ནི་མངོན་མཚོན་པས། །བདེན་པ་ཀུན་ནི་དེས་སྟོན་འགྱུར། །སྐད་ཅིག་ཙམ་སྟོན་རྣལ་འབྱོར་ལ། །དུས་རིང་དུས་སུ་སྡོད་མ་ཡིན། །སྐད་ཅིག་དེ་ལ་གང་ཅུང་ཟད། །ཡིད་ལ་བསམས་ཤིང་དོན་དུ་གཉེར། །མྱུར་དུ་སྔགས་གྲུབ་ཁོ་ན་ལ། །དེ་དག་ཐམས་ཅད་སྟོན་པར་བྱེད། །ཅི་འདོད་མངོན་པར་རེ་བ་དག །ཕུན་སུམ་ཚོགས་པ་ཐམས་ཅད་ཐོབ། །སྔགས་པས་སླར་ནི་གཤེགས་གསོལ་བ། །མྱུར་དུ་མཆོད་ཡོན་ཕུལ་ནས་འགྱེལ། །ཆོ་ག་མཐོང་བའི་ལས་ཀྱིས་ནི། །སྣོད་ནི་ཡང་དག་བསྲུང་བ་བྱ། །སེམས་ཅན་ལུས་ནི་འགྱེལ་བ་ཡང་། །ས་ཡི་སྟེང་དུ་ཉལ་བ་ཉིད། །གཙུག་ཏོར་སྔགས་དང་ལྡན་པ་ཡི། །སྔགས་ནི་ཆོ་གར་གསུངས་པ་དག །དེ་ཉིད་ཀྱིས་ནི་བསྲུང་བ་དང་། །ཕྱག་རྒྱ་གཙུག་ཕུད་ལྔ་ཡིས་སོ། །དེ་ཚེ་ལུས་ནི་བདེ་ལེགས་འགྱུར། །ས་ཡི་སྟེང་ལས་ལྡང་བར་འགྱུར། །སེམས་ཅན་ཀུན་ལའང་འཇུག་པ་ཡི། །སྲུང་བ་འདི་ནི་རབ་ཏུ་བརྟག །སྣོད་ལ་བརྟེན་ཏེ་འཚེ་བྱེད་པར། །གདུག་པའི་སེམས་ཅན་གྱིས་མི་ནུས། །སྐྱེ་བོ་སྣོད་དུ་གྱུར་པ་ལ། །འདི་ནི་སྲུང་བ་ཆེན་པོ་ཡིན། །དེ་ཡི་ཚིག་ནི་བར་མར་གནས། །དབུས་ཀྱི་ཡུལ་གྱིར་རབ་ཏུ་བསྒྲགས། །