Degé Kangyur volume 88, F.80.a

ཏོ། །​བཅོམ་ལྡན་འདས་སླད་མའི་དུས་སླད་མའི་ཚེ་ཆོས་ཀྱི་རྣམ་གྲངས་འདི་རྟག་ཏུ་རྒྱུན་མི་འཆད་པར་ཐམས་ཅད་རྫོགས་པར། གང་དུ་སྤྱོད་པར་འགྱུར་ལགས། བཅོམ་ལྡན་འདས་ཀྱིས་བཀའ་སྩལ་པ། རིགས་ཀྱི་བུ་ཆོས་ཀྱི་རྣམ་གྲངས་འདི་ནི་ཀླུའི་རྒྱལ་པོ་རྒྱ་མཚོའི་གནས་དང་། སུམ་ཅུ་རྩ་གསུམ་པའི་ལྷ་རྣམས་ཀྱི་གནས་སུ་ཐམས་ཅད་རྫོགས་པར་གནས་པར་འགྱུར་རོ། །​ལྷོ་ཕྱོགས་སུ་ཡང་སྤྱོད་པར་འགྱུར་རོ། །​འཛམ་བུའི་གླིང་དུ་ནི་ཅུང་ཟད་ཙམ་གནས་པར་འགྱུར་ཏེ། གནས་ཁ་ཅིག་ཏུ་ནི་སྤྱོད་ཁ་ཅིག་ཏུ་ནི་མི་སྤྱོད་པར་འགྱུར་རོ། །​དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ལག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །​ལག་ན་རྡོ་རྗེ་ཆོས་ཀྱི་རྣམ་གྲངས་འདི་གཟུང་བར་བྱ་བ་དང་། བཀླག་པར་བྱ་བ་དང་། མཆོད་པར་བྱ་བ་དང་། ཉན་དུ་གཞུག་པར་བྱ་བའི་ཕྱིར་ཁྱོད་ལ་གཏད་དོ། །​དེ་བཞིན་གཤེགས་པ་དང་འདྲ་བའི་ཆོས་ཀྱི་རྣམ་གྲངས་འདི་ནུབ་པར་གྱུར་ཏ་རེ། འདི་ནི་དེ་བཞིན་གཤེགས་པའི་བྱ་བ་བྱེད་པ་ཡིན་ནོ། །​དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་ལག་ན་རྡོ་རྗེས་འདི་སྐད་ཅེས་གསོལ་ཏོ། །​བཅོམ་ལྡན་འདས་ཆོས་ཀྱི་རྣམ་གྲངས་འདི་གཟུང་བར་བགྱི་བ་དང་། བཀླག་པར་བགྱི་བ་དང་། མཆོད་པར་བགྱི་བ་དང་། ཉན་དུ་གཞུག་པར་བགྱི་བའི་སླད་དུ་བདག་གིས་གཟུང་ལགས་སོ། །​ཆོས་སྨྲ་བ་དེ་དག་ལ་ཡང་མཆོད་པར་བགྱི། རྗེད་པར་བགྱིའོ། །​གང་ཆོས་ཀྱི་རྣམ་གྲངས་འདི་དང་། ཆོས་སྨྲ་བ་དེ་དག་ལ་མཆོད་པར་བགྱིད་པ་དེ་ནི་བདག་ལ་ཡང་མཆོད་པར་བགྱིད་པ་ལགས་ཏེ། དེ་ནི་བདག་གིས་བསྲུང་བར་བགྱི། ཡོངས་སུ་བསྐྱང་བར་བགྱི་སྟེ། བདག་ནི་དེ་བཞིན་གཤེགས་པ་ལ་བཀའ་དྲིན་གཟོ་བར་བགྱིད་དོ། །​དེ་ནས་བཅོམ་ལྡན་འདས་ཀྱིས་བྱང་ཆུབ་སེམས་དཔའ་ལག་ན་རྡོ་རྗེ་ལ་ལེགས་སོ་ཞེས་བྱ་བ་བྱིན་ཏེ། ལག་ན་རྡོ་རྗེ་ལེགས་སོ་ལེགས་སོ། །​ཁྱོད་ཀྱིས་དེ་ལྟར་གྱིས་ཤིག །​དེ་ནས་བཅོམ་ལྡན་འདས་ལ་བྱང་ཆུབ་སེམས་དཔའ་འཕགས་པ་སྤྱན་རས་གཟིགས་དབང་ཕྱུག་གིས་འདི་སྐད་ཅེས་གསོལ་ཏོ། །​བཅོམ་ལྡན་འདས་ཆོས་ཀྱི་རྣམ་གྲངས་འདི་ལ་ཕྱག་འཚལ་ལོ། །​ཆོས་ཉན་པ་དེ་དག་དང་། ཡི་གེར་འདྲི་བ་རྣམས་དང་། འཛིན་པ་རྣམས་དང་།



The English translation of this folio by 84000 Translating the words of the Buddha can be found at:
https://read.84000.co/translation/toh527.html?part=UT22084-051-002-267#UT22084-051-002-267