།ཇི་ལྟར་ཡུལ་དེ་ཤེས་པར་འགྱུར། །ཡེ་ཤེས་འདི་དང་ཡུལ་དེ་དག །རང་བཞིན་རྟག་ཏུ་སྤངས་པས་ན། །སྐྱེ་བ་དང་ནི་རྐྱེན་མང་པོ། །འདི་གཉིས་ལ་ཡང་བྱེད་པ་མེད། །བྱེད་མེད་དེ་ལྟར་གང་ཤེས་པ། །དེ་ནི་ཡང་དག་མཚན་ཉིད་ཡིན། །མཚན་ཉིད་མེད་ཀྱང་མཚན་ཉིད་བཤད། །བྱང་ཆུབ་སེམས་དཔའ་དེར་ཞུགས་ཀྱང་། །མཚན་ཉིད་མཚན་ཉིད་མེད་པར་ཡང་། །རྣམ་པར་རྟོག་པར་མི་བྱེད་དོ། །དེ་ལྟར་རབ་ཏུ་གང་ཤེས་པ། །ཡང་དག་མཚན་ཉིད་མཐོང་བས་ན། །ཆོས་རྣམས་ཀྱི་ནི་དབྱིངས་དག་ལ། །ཆོས་ཀྱི་འདུ་ཤེས་ཅུང་ཟད་མེད། །ཆོས་རྣམས་དང་ནི་ཆོས་ཀྱི་དབྱིངས། །འདི་གཉིས་ལ་ཡང་མཚན་མ་མེད། །ཆོས་རྣམས་མཚན་མ་སྤངས་པས་ན། །ཆོས་ཀྱི་དབྱིངས་ཞེས་བཤད་པ་ཡིན། །ཆོས་ཀྱི་དབྱིངས་ཞེས་གང་བཤད་པ། །དབྱིངས་མེད་དབྱིངས་མེད་པ་ཡང་མིན། །ཆོས་ཀྱི་དབྱིངས་ཞེས་རབ་བསྟན་ཀྱང་། །ཡང་དག་པར་ནི་དམིགས་སུ་མེད། །དོན་འདི་རབ་ཏུ་སེམས་པའི་ཚེ། །དམིགས་སུ་མེད་པར་མི་སེམས་ཤིང་། །རྣམ་རྟོག་རྣམས་ནི་སྤངས་བའི་ཕྱིར། །ཆོས་ཀྱི་སྣང་ཆེན་ཐོབ་པར་འགྱུར། །ཆོས་རྣམས་རང་བཞིན་མེད་པའི་ཕྱིར། །སྣང་བ་ལ་ཡང་རང་བཞིན་མེད། །དེ་ལྟར་སོ་སོར་རྟོག་པའི་ཕྱིར། །ཆོས་ཀྱི་སྣང་བ་ཐོབ་པ་ཡིན། །རྟོག་མེད་ཡེ་ཤེས་མི་མཐོང་ཞིང་། །ལྟ་བ་འདི་ཡང་མི་མཐོང་བ། །ཆོས་རྣམས་མི་བདེན་མཐོང་བའི་ཕྱིར། །འདི་ལ་རྟོག་པར་བྱེད་ཅེས་བསྟན། །ཆོས་ཀྱི་སྣང་བ་བསམ་མི་ཁྱབ། །མཐའ་མེད་ཅིང་ནི་ཚད་ཀྱང་མེད། །ཆོས་རྣམས་སྟོང་པར་མཐོང་བས་ན། །རྣམ་པར་མི་རྟོག་པ་ཞེས་བཤད། །ཆོས་རྣམས་དང་ནི་མཚན་ཉིད་རྣམས། །རྟག་ཏུ་ཐོབ་དང་འཇུག་མེད་པའི། །རྣམ་དག་ཆོས་སྒྲ་འདི་ཐོས་ན། །དགའ་བ་ཆེན་པོ་རབ་ཏུ་བསྐྱེད། །གལ་ཏེ་ཆོས་ནི་སྐྱེ་མེད་དང་། །རྟག་ཏུ་རྣམ་རྟོག་མེད་པ་ཡི། །རྣམ་དག་ཆོས་སྒྲ་འདི་ཐོས་ནས། །རབ་དབེན་བདེ་བ་ཐོབ་པར་འགྱུར། །གལ་ཏེ་མ་འོངས་དུས་ཀྱི་ཚེ། །བླ་མེད་ཆོས་ནི་ཐོས་གྱུར་ན། །སེམས་ཅན་དེ་དག་ཡུན་རིང་ནས། །ཡོན་ཏན་བསགས་པ་བཤད་པར་བྱ། །གལ་ཏེ་མ་འོངས་དུས་ཀྱི་ཚེ། །བླ་མེད་ཆོས་འདི་ཐོས་གྱུར་ན། །དེ་ནི་ཡང་དག་ཆོས་འདི་ལ། །མྱུར་བ་ཁོ་ནར་གཞོལ་བར་འགྱུར།། །།བམ་པོ་ལྔ་པ།