།འཇིག་རྟེན་གྱི་ཁམས་ནི་ཡོངས་སུ་དག་པར་བྱེད་པ་ཞེས་བྱ་སྟེ། །སངས་རྒྱས་དེའི་ཞིང་ཆུ་ཤེལ་ལས་མངོན་པར་གྲུབ་པས་རྟག་ཏུ་འོད་ཟེར་གྱིས་ཞིང་དེ་ཀུན་དུ་གསལ་བར་བྱེད་དེ། །སེམས་ཅན་གང་དག་འོད་ཟེར་དེས་རེག་པར་གྱུར་པ་དེ་དག་ཤིན་ཏུ་མཛེས་ཤིང་བྱད་བཞིན་བཟང་པོར་གྱུར་པས་དེའི་ཕྱིར་འཇིག་རྟེན་གྱི་ཁམས་དེ་ཡོངས་སུ་དག་པར་བྱེད་པ་ཞེས་བྱའོ། །དེ་ན་ལོགས་ཤིག་ན་གྲོང་ཁྱེར་དང་། གྲོང་རྡལ་ཞེས་བྱ་བའི་མིང་ཡང་མེད་དེ། །ལམ་རྣམས་གྱ་ནོམ་ཞིང་གསེར་གྱི་ཐིག་བཀྱེ་བ་ལམ་རྣམས་ཀྱི་བར་རེ་རེའི་ཚད་རྒྱང་གྲགས་ཕྱེད་ཕྱེད་ཡོད་དོ། །ལམ་རེ་རེའི་བར་དུ་ཡང་རིན་པོ་ཆེའི་ཀ་བ་དང་། ཏ་ལ་སྣ་ཚོགས་ཀྱི་ལྗོན་ཤིང་འོད་དང་ལྡན་པ་བརྒྱད་ཅུ་རྩ་བཞི་བརྒྱད་ཅུ་རྩ་བཞི་ཕྲེང་དུ་དཀྲིགས་སོ། །གཞན་ཡང་རྫིང་བུ་བཞི་ལམ་སྟེགས་ཀྱིས་བསྐོར་བ་ཡོད་དོ། །མི་རྣམས་ནི་རིན་པོ་ཆེ་སྣ་བདུན་གྱི་གཞལ་མེད་ཁང་དྲ་བས་གཡོགས་ཤིང་དར་གྱི་ལྡ་ལྡི་སྤྱངས་པ། །མེ་ཏོག་གིས་རབ་ཏུ་མཛེས་པར་བྱས་པ་དག་ན་གནས་པས་དཔེར་ན་ལྷ་རྣམས་ཇི་ལྟ་བ་བཞིན་ནོ། །འཇིག་རྟེན་གྱི་ཁམས་དེའི་སེམས་ཅན་རྣམས་ནི་རབ་ཏུ་བདེ་ཞིང་བདེ་བ་དང་ལྡན་པས་དགེ་བ་བཅུའི་ལས་ཀྱི་ལམ་རྣམས་ཡོངས་སུ་རྫོགས་ཤིང་བྱད་བཞིན་ཤིན་ཏུ་སྡུག་པ། ཚེ་ཤིན་ཏུ་རིང་བ། འདོད་ཆགས་དང་། ཞེ་སྡང་དང་། གཏི་མུག་སྲབ་པ། གདུལ་སླ་བ། སྦྱོར་བ་ཆུང་ངུས་ཆོས་རྣམས་རྒྱ་ཆེར་རྟོགས་པ་ཤ་སྟག་གོ །དེ་བཞིན་གཤེགས་པ་དེའི་སྐུ་ཚེའི་ཚད་ནི་ལོ་བྱེ་བ་ཕྲག་སྟོང་ཐུབ་པར་གྱུར་ཏོ། །ཡོངས་སུ་མྱ་ངན་ལས་འདས་པའི་འོག་ཏུ་ཡང་དག་པའི་ཆོས་ནི་འཇིག་རྟེན་ན་ལོ་བྱེ་བ་སྙེད་གནས་པར་གྱུར་ཏོ། །འདུས་པ་ལན་བཅུར་ཆོས་བཤད་དེ། འདུས་པ་རེ་རེ་ལ་ཡང་ཉན་ཐོས་ཀྱི་འཁོར་སློབ་པའི་ས་ལ་གནས་པ་ནི་བྱེ་བ་ཁྲག་ཁྲིག་ཕྲག་ཉི་ཤུ་ཡོད་པར་གྱུར་ཏོ། །བྱང་ཆུབ་སེམས་དཔའི་འཁོར་ཐེག་པ་གཅིག་གི་ལམ་ལ་བགྲོད་པར་གྱུར་པ། དེའི་གྲངས་ནི་ཚད་ཀྱང་མེད་དོ། །བློ་གྲོས་མཐའ་ཡས་དེ་བཞིན་གཤེགས་པ་ཟླ་བའི་སྒྲོན་མའི་རྒྱལ་པོ་དེའི་བྱང་ཆུབ་ཀྱི་ཤིང་རིན་པོ་ཆེའི་ཚད་ཀྱང་རྒྱར་ནི་དཔག་ཚད་ལྔ་བཅུ་ཡོད་དོ། །སྲིད་དུ་ནི་དཔག་ཚད་བརྒྱ་ཡོད་དེ། རྩ་བ་ནི་བྱི་རུ་ལས་བྱས་པ། སྡོང་པོ་ནི་བཻ་དཱུརྱ་ལས་བྱས་པ། །ཡལ་ག་ནི་གསེར་ལས་བྱས་པ། །ལོ་མ་ནི་རྡོའི་སྙིང་པོ་ལས་བྱས་པའོ།