ཨོྃ་བཛྲ་དྷཱ་ཏྭི་ཤྭ་རཱི་ཨཱ་གཙྪ་ཨཱ་གཙྪ་བྃ་སྭཱ་ཧཱ། ཨོྃ་ཀུ་རུ་ཀུལླེ་ཨཱ་གཙྪ་ཨཱ་གཙྪ་ཧྲཱིཾ་སྭཱ་ཧཱ། ཨོྃ་ཏཱ་རེ་ཨཱ་གཙྪ་ཨཱ་གཙྪ་ཏཱྃ་སྭཱ་ཧཱ། དེ་ནས་ཡང་དག་བཤད་བྱ་བ། །དཔའ་བོ་གཅིག་པའི་དཀྱིལ་འཁོར་ལ། །གྲུ་བཞི་པ་ལ་སྒོ་བཞི་པ། །རྟ་བབས་བཞི་ཡིས་བརྒྱན་པ་ལ། །ཁ་དོག་སེར་པོར་བྱས་པ་ལ། །དབུས་སུ་པདྨ་འདབ་བཞི་ལ། །དེ་ཡང་མེ་ཡི་འདབ་མ་དཀར། །བདེན་བྲལ་དུ་ནི་དམར་པོར་མཚུངས། །རླུང་དུ་ཁ་དོག་སེར་པོ་སྟེ། །དབང་ལྡན་མཚམས་སུ་ལྗང་གུའོ། །དབུས་སུ་ཁ་དོག་ནག་པོ་སྟེ། །དེ་ལ་མི་གཡོ་བརྟག་པར་བྱ། །ཡང་ན་ཉི་མའི་སྟེང་གནས་པའི། །དཀར་པོ་སེར་པོ་དམར་པོའམ། །ལྗང་གུ་སངས་རྒྱས་ལྔ་རྣམས་ཀྱི། །སྐུ་རུ་རྣམ་པར་བསམ་པར་བྱ། །མེ་ཡི་མཚམས་སུ་སྤྱན་མ་སྟེ། །སྟོན་ཀའི་ཟླ་བའི་འོད་དང་མཚུངས། །གཡོན་དང་གཡས་པའི་ཕྱག་དག་གིས། །ཟླ་བ་མྱ་ངན་མེད་ཤིང་བསྣམས། །བདེན་བྲལ་ལྷ་མོ་གོས་དཀར་མོ། །གཞུ་དང་མདའ་ནི་ཕྱག་བསྣམས་ས་སེར། །རླུང་གི་མཚམས་སུ་མཱ་མ་ཀཱི། །སྐུ་མདོག་དམར་མོར་གྱུར་པ་ནི། །བུམ་པ་འབྲས་ཀྱི་སྙེ་མ་ཕྱག །དབང་ལྡན་མཚམས་སུ་སྒྲོལ་མ་སྟེ། །ལྗང་གུ་གཡས་པ་མཆོག་སྦྱིན་དང་། །གཡོན་པ་ཨུཏྤ་ལ་སྔོན་པོ་བསྣམས། །དེ་རྣམས་ཟླ་བའི་གདན་ལ་ནི། །ཐམས་ཅད་སྐྱིལ་ཀྲུང་ཕྱེད་པས་བཞུགས། །ཤར་སྒོ་བརྒྱ་བྱིན་གདན་ལ་ནི། །འདོད་ཆགས་རྡོ་རྗེ་དགོད་པར་བྱ། །རལ་གྲི་ཐོད་བསྣམས་སྐུ་མདོག་དམར། །ལྷོ་རུ་གཤིན་རྗེའི་གདན་ལ་ནི། །ཞེ་སྡང་རྡོ་རྗེ་སྐུ་མདོག་ནག །གྲི་གུག་དང་ནི་སྡིགས་མཛུབ་ཕྱག །ནུབ་ཏུ་རྨ་བྱའི་གོས་ཅན་གྱི། །ཆུ་བདག་སྟེང་གནས་ལྗང་གུ་ཡི། །ང་རྒྱལ་རྡོ་རྗེ་ཞེས་བྱ་བ། །རྡོ་རྗེ་རྒྱས་པ་ཕྱག་ན་བསྣམས། །བྱང་དུ་གཏི་མུག་རྡོ་རྗེ་ནི། །སྡིགས་མཛུབ་ཨ་ཤོ་ཀ་བསྣམས་པ། །ལུས་ངན་སེར་པོ་ལ་གནས་པའི། །ཉི་མའི་གདན་ལ་དགོད་པར་བྱ། །ཐམས་ཅད་གཡོན་བརྐྱང་རྐང་སྟབས་ཅན། །ཁྲོ་ཞིང་སྐྲ་ནི་གྱེན་དུ་བརྗེས། །ཁ་དོག་སེར་པོར་མཚུངས་པ་ཡི། །མཚམས་བཞི་ལ་ནི་བུམ་པ་དགོད། །རྣལ་འབྱོར་མ་བརྒྱད་དང་ལྡན་པ། །འདི་ནི་བསྒོམས་པ་ཙམ་གྱིས་ནི། །འཇིག་རྟེན་གསུམ་གནས་བུད་མེད་ཀྱི། །བདག་པོ་དབང་ཕྱུག་དམ་པར་བཅས། །དེ་ནས་གཞན་ཡང་རབ་བཤད་བྱ། །གཏུམ་པོ་ཁྲོ་བོས་སྒོམ་པ་ནི། །སྣ་ཚོགས་པདྨའི་སྟེང་དུ་ལྷ། །གཏུམ་པོ་ཁྲོ་བོ་བརྟག་པར་བྱ། །རཱ་མ་དེ་བ་ཁ་དོག་དམར། །མ་སྟེ་བདེན་བྲལ་མཚམས་སུ་ནི། །འདོད་པའི་ལྷ་སྟེ་ཁ་དོག་སེར། །མ་ཧཱི་ཎི་ཞེས་ཁ་དོག་ལྗང་། །རླུང་སྟེ་ལྷ་མིན་ཀོ་ཀི་ལ།