།རྡོ་རྗེ་རྣལ་འབྱོར་མ་ཆེན་མོ་རྣམས་ཀྱི་དགོངས་པ་མཆོག་ཏུ་གསང་བ་གསང་བ་ཆེན་པོ་ཉེ་བར་སྤྱོད་པ་དང་བཅས་པའི་སྒྲུབ་ཐབས་ཏེ་ལེའུ་གསུམ་པའོ། །སྒྱུ་འཕྲུལ་ཆེན་མོའི་རྒྱུད་ཅེས་བྱ་བ་རྫོགས་སོ།། །།རྒྱ་གར་གྱི་མཁན་པོ་ཛི་ན་བར་དང་། བོད་ཀྱི་ལོ་ཙྪ་བ་ཆེན་པོ་འགོས་ལྷས་བཙས་ཀྱིས་བསྒྱུར་ཅིང་ཞུས་ཏེ་གཏན་ལ་ཕབ་པ།། །།༄༅། །རྒྱ་གར་སྐད་དུ། བཛྲ་ཨཱ་ར་ལི་མ་ཧཱ་ཏནྟྲ་རཱ་ཛ་ནཱ་མ། བོད་སྐད་དུ། རྡོ་རྗེ་ཨཱ་ར་ལི་ཞེས་བྱ་བའི་རྒྱུད་ཀྱི་རྒྱལ་པོ་ཆེན་པོ། ཀྱེའི་རྡོ་རྗེ་ལ་ཕྱག་འཚལ་ལོ། །འདི་སྐད་བདག་གིས་ཐོས་པ་དུས་གཅིག་ན། བཅོམ་ལྡན་འདས་དེ་བཞིན་གཤེགས་པ་ཐམས་ཅད་ཀྱི་ཤེས་རབ་ཀྱི་ཕ་རོལ་ཏུ་ཕྱིན་པའི་བྷ་ག་ལ་བཞུགས་སོ། །བཅོམ་ལྡན་འདས་ཀྱིས་སངས་རྒྱས་དང་། བྱང་ཆུབ་སེམས་དཔའ་དུ་མ་དང་། དེ་བཞིན་གཤེགས་པས་གསོལ་བ་བཏབ་པར་རིག་ཅིང་བྱང་ཆུབ་སེམས་དཔའ་རྣམས་ཀྱིས་ཡང་མཁྱེན་ནས་བདེ་བའི་ཏིང་ངེ་འཛིན་ལས་བཞེངས་ཏེ། ཕྱག་ན་རྡོ་རྗེ་ལ་འདི་སྐད་ཅེས་བཀའ་སྩལ་ཏོ། །ཆུ་ཡིས་གདོང་ནི་བཀྲུས་ནས་ནི། །སྨན་ནི་བཟའ་བར་བྱས་ནས་སུ། །བདེ་བའི་སྟན་ལ་འདུག་ནས་ནི། །ཧེ་རུ་ཀ་ནི་རབ་བསྒྲུབ་བྱ། །རང་གི་སྙིང་གར་རེ་ཕ་ནི། །བསྲེག་པའི་བསྐལ་པ་ལྟར་འབར་བསྒོམ། །དེ་བྱུང་རྡོ་རྗེ་ཉི་མ་ནི། །འབར་བའི་ཕྲེང་བས་ཡང་དག་ཁྱབ། །དེ་ཡི་སྟེང་དུ་ཧཱུྃ་ཉིད་དེ། །བསྐལ་པའི་མེ་ནི་ལྟ་བུ་ཉིད། །དེ་ནི་རྡོ་རྗེར་ཡང་བསམས་ནས། །རྡོ་རྗེ་ལས་བྱུང་ཧེ་རུ་ཀ། །བགེགས་ནི་ཆེན་པོ་མནན་ནས་ནི། །སྐུ་ལ་ཐལ་བས་བྱུགས་པ་དང་། །ཕྱག་རྒྱ་ལྔ་དང་ཡང་དག་ལྡན། །འཇིགས་པ་ཡང་ནི་འཇིགས་པར་མཛད། །ཨིནྡྲ་ནཱིཾ་ལའི་འོད་ལྟ་བུ། །དབུ་སྐྲ་སེར་པོ་སྟོབས་པོ་ཆེ། །གར་དགུའི་རོ་དང་ལྡན་པར་ནི། །རོལ་པའི་གར་གྱིས་གར་མཛད་ཅིང་། །རི་རབ་རི་རྒྱལ་མཐོན་པོ་ཡང་། །ས་ཡི་འོག་ཏུ་ཡང་དག་མནན། །ཕྱག་ཏུ་རྡོ་རྗེ་རྣམ་བསྒོམས་ནས། །གཡོན་པས་སྐྱེས་པའི་ཐོད་པ་ནི། །བདུད་རྩི་ལྔ་དང་ཡང་དག་ལྡན། །ཤ་ལྔ་ཡང་དག་ལྡན་པར་བསྒོམ། །ཀུནྡ་དང་ནི་ཟླ་བ་དང་། །ཆུ་སྐྱེས་དོ་ཤལ་ལྟ་བུར་ནི། །ཁ་ཊྭཱྃ་ག་ཡིས་ཕྲག་པ་བརྒྱན། །རྡོ་རྗེ་ཨཱ་ར་ལི་ལས་ལྷའི་ལེའུ་སྟེ་དང་པོའོ།། །།