དེ་བཞིན་གཤེགས་པའི་གཟུགས་སུ་བརྩམས་ནས་སེམས་ཅན་རྣམས་ལ་ཆོས་སྟོན་ཏོ། །ལྷ་དང་། དྲི་ཟ་དང་། མིའི་འཁོར་དེ་ཐམས་ཅད་དང་ལྡན་པ་དེ་ཇི་ལྟ་བུར་སྔོན་གྱི་གཟུགས་ཀྱི་ལུས་ཀྱིས་གནས་པར་གྱུར་ཏོ། །དེ་ནས་བཅོམ་ལྡན་འདས་ཡང་འཁོར་བའི་དཀྱིལ་འཁོར་ཞེས་བྱ་བའི་ཏིང་ངེ་འཛིན་ལ་མཉམ་པར་བཞག་སྟེ། ཡང་བཅོམ་ལྡན་འདས་འཁོར་བའི་དཀྱིལ་འཁོར་གྱི་ཏིང་ངེ་འཛིན་ལ་མཉམ་པར་ཞུགས་མ་ཐག་ཏུ་དེ་ནས་དེ་ཉིད་ཀྱི་ཚེ་བཅོམ་ལྡན་འདས་ཀྱི་སྨིན་མཚམས་ཀྱི་མཛོད་སྤུ་ནས་ཁ་དོག་དུ་མ་ཁ་དོག་སྣ་ཚོགས་ཀྱི་འོད་ཟེར་བྱུང་སྟེ། འོད་ཟེར་དེས་ཕྱོགས་བཅུ་ཆུ་བོ་གང་གཱའི་བྱེ་མ་སྙེད་ཀྱི་རྙོག་པ་ལྔའི་སངས་རྒྱས་ཀྱི་ཞིང་གི་རང་སངས་རྒྱས་ཀྱི་ཐེག་པ་པ་ཀུན་སྣང་བར་བྱས་སོ། །ཇི་ལྟར་སེམས་ཅན་རྣམས་འོད་ཟེར་དེ་ལུས་ལ་རེག་པ་དེ་ལྟར་འདོད་ཆགས་དང་། ཞེ་སྡང་དང་། གཏི་མུག་གི་ཀུན་གཞི་སྤངས་པས་དེ་ཡང་དེ་ལྟར་ལུས་ཀྱི་གཟུགས་བདེ་བ་དང་ལྡན་པར་འགྱུར་རོ། །འདི་ལྟ་སྟེ། དཔེར་ན། བསམ་གཏན་གཉིས་ལ་ཡང་དག་པར་ཞུགས་པའི་དགེ་སློང་དག་དེ་ཡང་ཕྱོགས་བཞིའི་རྣམ་པར་སྣང་བའི་ཕྱིར་བདག་གང་དུ་རྣམ་པ་འདི་འདྲ་བའི་བདེ་བ་དང་། ཚོར་བ་འབྱུང་བར་འགྱུར་བ་དེ་ཡང་སངས་རྒྱས་ཀྱི་མཐུས་ན། དཔག་ཚད་ཕྱེད་ཙམ་ན་ཤཱཀྱ་ཐུབ་པ་དེ་བཞིན་གཤེགས་པ་འཁོར་དང་བཅས་པ་མི་རིང་བར་མཐོང་ངོ་། །མཆོག་ཏུ་དང་བ་ཐོབ་པ་དེ་སངས་རྒྱས་ཀྱི་མཐུས་ཆུང་ཟད་ཙམ་གྱིས་ཀྱང་བཅོམ་ལྡན་འདས་ཀྱི་དྲུང་དུ་ཉེ་བར་ཕྱིན་ཏོ། །དེ་ནས་དེའི་དུས་ན་ཡང་ཕྱོགས་བཅུའི་རྙོག་པ་ལྔའི་སངས་རྒྱས་ཀྱི་ཞིང་སྟོང་པ་མེ་བཅུ་རྡུལ་ཡལ་བྱེ་བ་ཁྲག་ཁྲིག་བརྒྱ་སྟོང་ཕྲག་བརྒྱད་ཅུ་རྩ་བཞིའི་རང་སངས་རྒྱས་ཀྱི་ཐེག་པ་པའི་སེམས་ཅན་འདི་དག་དེ་ལྟར་ཤཱཀྱ་ཐུབ་པ་དེ་བཞིན་གཤེགས་པའི་དྲུང་དུ་ཉེ་བར་ཕྱིན་ནས། བཅོམ་ལྡན་འདས་ཀྱི་ཞབས་གཉིས་ལ་སྤྱི་བོས་ཕྱག་འཚལ་ཏེ། བཅོམ་ལྡན་འདས་ཀྱི་སྤྱན་སྔར་ཆོས་མཉན་པའི་ཕྱིར་འདུག་གོ། །དེ་ལ་བཅོམ་ལྡན་འདས་ཀྱིས་ཡང་བྱང་ཆུབ་སེམས་དཔའ་གདུལ་དཀའ་བ་བོས་སོ། །ཡུལ་ལ་ཆགས་པའི་རིགས་ཀྱི་བུ། །རྟག་ཏུ་དགའ་བའི་བྱ་བ་བྱེད། །ཤིན་ཏུ་ཤེས་མེད་བྱིས་པ་དག །བདེ་བའི་ལམ་དུ་དེ་མི་ཤེས། །མུན་པའི་ཕུང་པོས་དེ་གཡོགས་སོ། །འཁོར་བ་ཡང་ནི་མི་འདོར་རོ།