།དེ་ལ་ཚོར་བའི་ཚོགས་དྲུག་གིས་ཚོར་བ་རྣམ་གསུམ་ཚུལ་བཞིན་དུ་བརྟག་པར་བྱའོ། །ཚོར་བ་རྣམ་གསུམ་གྱིས་ཉོན་མོངས་པའི་རྩ་བ་འབྱུང་བ་དང་། ལས་ཀྱི་རྩ་བ་དང་། ཟད་པའི་རྩ་བ་ནུབ་པ་ཚུལ་བཞིན་དུ་བརྟག་པར་བྱའོ། །དེ་མིག་གིས་གཟུགས་ཀྱི་མཚན་ཉིད་སྣང་བ་དམའ་བ་འམ། བདེ་བ་འམ། ཆེ་བའམ། ཕྲ་བའམ། གང་ཉེ་བའམ། གང་རིང་བར་མཐོང་བ་དེ་ལ་ཚོར་བ་འབྱུང་ངོ་། །གང་གཟུགས་བདེ་བའམ། ཆེ་བའམ། ཕྲ་བའམ། གང་རིང་བའམ། ཉེ་བར་མཐོང་བ་དེ་ལ་ཚོར་བ་སྲེད་པའི་གནས་ཆུའི་ཆུ་བུར་ལྟ་བུ་དང་། མངོན་པར་དགའ་བ་འབྱུང་བར་འགྱུར་བ་དེ་ལ་ཡང་ཚུལ་བཞིན་དུ་བརྟག་པར་བྱའོ། །ཇི་ལྟར་ཡང་མིག་མིག་གིས་སྟོང་པ་ནས་ཇི་ལྟར་གོང་དུ་བཤད་པའི་བར་དུ་དེ་གློ་བུར་དང་། ལུས་མ་ཡིན་པ་དང་། གནས་མེད་པ་དང་། གཟུགས་མེད་པ་དང་། བསྟན་དུ་མེད་པ་དང་། དངོས་པོ་མེད་པ་དང་། ཡི་གེ་མེད་པ་ཚོར་བ་ཆུའི་ཆུ་བུར་ལྟ་བུར་འབྱུང་ངོ་། །འདོད་ཆགས་ཀྱིས་ཀུན་ཏུ་བསྒྲིབས་པ་འབྱུང་ངོ་། །སློང་བ་པོའམ། དགོད་པ་པོའམ། ཀུན་ཏུ་རྒྱུ་བ་པོའམ། སོགས་པར་ཡང་མི་ཤེས་སོ། །འབྱུང་བའི་མཚན་ཉིད་བདག་པོ་མེད་པ་དང་། འགོག་པ་ལ་ཡང་བདག་པོ་མེད་པ་དང་། མཚན་ཉིད་ཚོར་བ་ལ་ཡང་བདག་པོ་མེད་པ་སྟེ། མཚན་ཉིད་མེད་པའི་ཆོས་འདི་དག་ཐམས་ཅད་ལ་ཡང་སྲོག་མེད་པ་དང་། སྲོག་དང་བྲལ་བ་དང་། སེམས་ཅན་མེད་པ་དང་། སེམས་ཅན་དང་བྲལ་བ་དང་། གསོ་བ་མེད་པ་དང་། གསོ་བ་དང་བྲལ་བ་དང་། གང་ཟག་མེད་པ་དང་། གང་ཟག་དང་བྲལ་བ་དང་། འདོད་པ་མེད་པ་དང་། དངོས་པོ་མེད་པ་དང་། མཚན་ཉིད་མེད་པ་དང་། བདག་པོ་མེད་པ་དང་། མཚན་ཉིད་འཇིག་པ་དང་། ཟད་པའི་འདུ་བྱེད་ཀྱི་སྡུག་བསྔལ་དངོས་པོ་མེད་པ་དང་། དུས་གསུམ་གྱི་འདོད་ཆགས་དང་བྲལ་བའི་མཐའ་ལ་དེས་དེ་དག་སྟོང་ངོ་། །བརྗོད་དུ་མེད་པ་འདོད་ཆགས་ཀྱི་མཐའ་ལ་དེས་དེ་དག་སྟོང་ངོ་། །གཉིས་སུ་མེད་པའི་འདོད་ཆགས་ཀྱི་མཐའ་ལ་དེས་དེ་དག་སྟོང་ངོ་། །རྒྱུན་ཆད་པ་མེད་པ་འདོད་ཆགས་ཀྱི་མཐའ་ལ་དེས་དེ་དག་སྟོང་ངོ་། །རྟག་པ་མེད་པ་འདོད་ཆགས་ཀྱི་མཐའ་ལ་དེས་དེ་དག་སྟོང་ངོ་། །མཚན་མ་མེད་པ་འདོད་ཆགས་ཀྱི་མཐའ་ལ་དེས་དེ་དག་སྟོང་ངོ་། །སྨོན་པ་མེད་པ་འདོད་ཆགས་ཀྱི་མཐའ་ལ་དེས་དེ་དག་སྟོང་ངོ་།