།དེ་དག་ལས་ཀྱང་འཇིག་རྟེན་དུ་དགྲ་བཅོམ་པ་རྣམས་འབྱུང་བར་འགྱུར་རོ། །རང་སངས་རྒྱས་རྣམས་དང་། བྱང་ཆུབ་སེམས་དཔའ་སེམས་དཔའ་ཆེན་པོ་རྣམས་འཇིག་རྟེན་དུ་འབྱུང་བར་འགྱུར་རོ། །དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་རྣམས་འཇིག་རྟེན་དུ་འབྱུང་བར་འགྱུར་རོ། །རིགས་ཀྱི་བུ་འདི་ཇི་སྙམ་དུ་སེམས། ནམ་མཁའ་མིག་ལ་གནས་སམ། གསོལ་པ། བཅོམ་ལྡན་འདས་དེ་མ་ལགས་སོ། །ཅི་མིག་གི་རྣམ་པར་ཤེས་པ་ལ་གནས་སམ། བཅོམ་ལྡན་འདས་དེ་མ་ལགས་སོ། །ཅི་མིག་གིས་ཀུན་དུ་རེག་པ་ལ་གནས་སམ། བཅོམ་ལྡན་འདས་དེ་མ་ལགས་སོ། །གང་ཡང་ནང་དུ་མིག་གིས་ཀུན་དུ་རེག་པའི་རྐྱེན་གྱིས་ཚོར་བ་གསུམ་འབྱུང་བ་དེ་ལ་ནམ་མཁའ་གནས་སམ། གསོལ་པ་བཅོམ་ལྡན་འདས་དེ་མ་ལགས་སོ། །དེ་བཞིན་དུ་རྣ་བ་དང་། སྣ་དང་། ལྕེ་དང་། ལུས་ལ་ཡང་བརྗོད་པར་བྱའོ། །རིགས་ཀྱི་བུ་འདི་ཇི་སྙམ་དུ་སེམས། ནམ་མཁའ་ཡིད་ལ་གནས་པ་ནས་ཡིད་ཀྱིས་ཀུན་དུ་རེག་པའི་རྐྱེན་གྱིས་ཚོར་བ་གསུམ་འབྱུང་བ་དེ་ལ་ནམ་མཁའ་གནས་སམ། གསོལ་པ། བཅོམ་ལྡན་འདས་དེ་མ་ལགས་སོ། །རིགས་ཀྱི་བུ་འདི་ཇི་སྙམ་དུ་སེམས། སེམས་ཅན་ནམ་མཁའ་ལ་གནས་སམ། གསོལ་པ། བཅོམ་ལྡན་འདས་དེ་མ་ལགས་སོ། །རིགས་ཀྱི་བུ་འདི་ཇི་སྙམ་དུ་སེམས། ནམ་མཁའ་སེམས་ཅན་ལ་གནས་སམ། གསོལ་པ། བཅོམ་ལྡན་འདས་དེ་མ་ལགས་སོ། །དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་བྱང་ཆུབ་སེམས་དཔའ་སེམས་དཔའ་ཆེན་པོ་ནམ་མཁའི་སྙིང་པོས་འདི་སྐད་ཅེས་གསོལ་ཏོ། །བཅོམ་ལྡན་འདས་གཅིག་ལ་གཅིག་མི་རྟེན་ཏོ། །གཅིག་ལ་གཅིག་སྤྱོད་ཡུལ་མ་ལགས་སོ། །བཅོམ་ལྡན་འདས་ཆོས་ཐམས་ཅད་ནི་རྟོག་པ་མ་མཆིས་པ། སྟོང་པ་ཉིད་དང་། སྒྲོ་མ་བཏགས་པ། ཡང་དག་པའི་མཐའ་དེ་བཞིན་ཉིད་དུ་རྟོགས་པར་བགྱིའོ། །བཅོམ་ལྡན་འདས་ནམ་མཁའི་སྙིང་པོ་ནི་འདི་ལྟ་སྟེ། རང་གི་མཚན་ཉིད་ཐ་མི་དད་པ། མི་རྟོག་པ། རྣམ་པར་མི་རྟོག་པ། མི་གཡོ་བ། གསོབ་ལགས་ཏེ། མྱུ་གུ་མ་མཆིས་པ། ས་བོན་མ་མཆིས་པ། འབྲས་བུ་མ་མཆིས་པ། རྣམ་པར་སྨིན་པ་མ་མཆིས་པ། ཡི་གེ་མ་མཆིས་པ། རློམ་སེམས་མ་མཆིས་པ་ལགས་སོ། །བཅོམ་ལྡན་འདས་དེ་བཞིན་དུ་བྱང་ཆུབ་སེམས་དཔའ་སེམས་དཔའ་ཆེན་པོས་ཆོས་ཐམས་ཅད་ལ་དེ་ལྟར་རྟོགས་ན་མི་སྐྱེ་བའི་ཆོས་ལ་བཟོད་པ་ཐོབ་པར་འགྱུར་རོ།