།བྱང་གི་སྒྲ་མི་སྙན་ལ་ལར་ནི་འཁོར་ལོས་སྒྱུར་བའི་རྒྱལ་སྲིད་ཀྱི་ཚུལ་སྟོན་ཏེ། འཁོར་ལོས་སྒྱུར་བའི་རྒྱལ་པོར་སེམས་ཅན་རྣམས་ཀྱིས་ཤེས་ཀྱང་དེ་འཁོར་ལོས་སྒྱུར་བའི་རྒྱལ་པོ་ཕལ་གྱི་སྤྱད་པ་ཡང་མི་སྤྱོད་དེ་རྟག་ཏུ་ཕྱིར་མི་ལྡོག་པའི་ཆོས་ཀྱི་འཁོར་ལོ་སྐོར་བའི་རྒྱལ་པོ་བྱེད་ཅིང་སེམས་ཅན་ཐམས་ཅད་ཀྱང་བྱེད་དུ་འཇུག་གོ། །བྱང་གི་སྒྲ་མི་སྙན་ལ་ལར་ནི་དེ་ལྟ་བུའི་རྒྱལ་སྲིད་ཕུན་སུམ་ཚོགས་པ་ཤིན་ཏུ་རྒྱ་ཆེ་བ་དག་ཀྱང་རྩྭ་བཞིན་དུ་བོར་ནས་རབ་ཏུ་བྱུང་བའི་གཟུགས་དང་། མཚན་མ་སྟོན་པར་བྱེད་དེ། ལ་ལར་ནི་རབ་ཏུ་བྱུང་བ་ལྟ་བུ། ལ་ལར་ནི་རབ་ཏུ་མ་བྱུང་བ་ལྟ་བུར་སེམས་ཅན་རྣམས་ཀྱིས་ཤེས་སོ། །བྱང་གི་སྒྲ་མི་སྙན་ལ་ལར་ནི་ཡ་མཚན་ཅན་ཐམས་ཅད་ཀྱི་རབ་ཏུ་བྱུང་བ་ལྟ་བུར་ལྟ་བ་ངན་པ་རབ་ཏུ་འབྱུང་བ་ལ་རབ་ཏུ་བྱུང་བར་སེམས་ཅན་རྣམས་ཀྱིས་ཤེས་ཀྱང་། ཡ་མཚན་ཅན་ཐམས་ཅད་དང་འཐུན་པར་རབ་ཏུ་བྱུང་བ་ཡང་མ་ཡིན་ཏེ། དེ་དག་ངེས་པར་བསྒྲལ་བའི་ཕྱིར་རབ་ཏུ་འབྱུང་ངོ་། །བྱང་གི་སྒྲ་མི་སྙན་ལ་ལར་ནི་དེ་བཞིན་གཤེགས་པའི་རབ་ཏུ་འབྱུང་བར་རྩོམ་པ་ལྟ་བུར་སྟོན་ཏེ། དེ་བཞིན་གཤེགས་པའི་རབ་ཏུ་འབྱུང་བས་རབ་ཏུ་འབྱུང་བར་སེམས་ཅན་རྣམས་ཀྱིས་ཤེས་ཀྱང་བསྐལ་པ་བྱེ་བ་ཕྲག་དུ་མ་ནས་དེ་བཞིན་གཤེགས་པའི་རབ་ཏུ་འབྱུང་བའི་བྱ་བ་ཡང་མཐར་ཕྱིན་པར་བྱས་སོ། །བྱང་གི་སྒྲ་མི་སྙན་ལ་ལར་ནི་སྦྱངས་པའི་ཡོན་ཏན་བཅུ་གསུམ་ཡང་དག་པར་འཛིན་པ་ལྟ་བུར་སྟོན་ཏེ། སྦྱངས་པའི་ཡོན་ཏན་ཅན་ཡོ་བྱད་བསྙུངས་པ་ཡིན་པར་སེམས་ཅན་རྣམས་ཀྱིས་ཤེས་ཀྱང་། བསྐལ་པ་བྱེ་བ་ཕྲག་དུ་མ་ནས་སྦྱངས་པའི་ཡོན་ཏན་རྫོགས་ཤིང་རྟག་ཏུ་མཉམ་པར་གཞག་པ་ཡང་ཡིན་ནོ། །བྱང་གི་སྒྲ་མི་སྙན་ལ་ལར་ནི་བྱང་ཆུབ་ཀྱི་སྙིང་པོར་རྩྭ་བཏིང་བ་ལྟ་བུར་སྟོན་ཏེ། བྱང་ཆུབ་ཀྱི་སྙིང་པོ་ལ་འདུག་པར་སེམས་ཅན་རྣམས་ཀྱིས་ཤེས་ཀྱང་རྟག་ཏུ་བྱང་ཆུབ་ཀྱི་བྱ་བ་མཐར་ཕྱིན་པར་བྱས་པ་ཡང་ཡིན་ནོ། །བྱང་གི་སྒྲ་མི་སྙན་ལ་ལར་ནི་བསམ་གཏན་དང་། ཏིང་ངེ་འཛིན་དང་། སྙོམས་པར་འཇུག་པ་ལ་སྙོམས་པར་ཞུགས་པ་ལྟ་བུར་སྟོན་ཏེ། བསམ་གཏན་དང་། ཏིང་ངེ་འཛིན་དང་། སྙོམས་པར་འཇུག་པ་ལ་སྙོམས་པར་ཞུགས་པར་སེམས་ཅན་རྣམས་ཀྱིས་ཤེས་ཀྱང་རྟག་ཏུ་སྙོམས་པར་འཇུག་པའི་སྤྱོད་པ་དུ་མ་སྤྱོད་པ་ཡང་ཡིན་ནོ། །བྱང་གི་སྒྲ་མི་སྙན་ལ་ལར་ནི་ཡན་ལག་དགུའི་མདོ་འཆད་པ་ལྟ་བུར་སྟོན་ཏེ། བཅོམ་ལྡན་འདས་ཀྱིས་ཡན་ལག་དགུའི་མདོ་གསུངས་པ་འཆད་པར་སེམས་ཅན་རྣམས་ཀྱིས་ཤེས་ཀྱང་།