བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ནས་ཚིགས་སུ་བཅད་པ་འདི་སྨྲས་སོ། །གློག་གི་རྒྱལ་པོ་སྐུ་ཆེ་བ། །ནམ་མཁའ་དང་ནི་མཚུངས་འདྲ་སྟེ། །དེ་བཞིན་གཤེགས་པ་ཐབས་ཀྱི་གཟུགས། །བདག་གིས་ཆུང་ཟད་བརྗོད་མི་ནུས། །གློག་གི་འོད་གླེང་གཞིའི་ལེའུ་ཞེས་བྱ་སྟེ་བཅུ་གཉིས་པའོ།། །།སྤྲིན་ཆེན་སྙིང་པོས་གསོལ་པ། སེམས་ཅན་ཐམས་ཅད་ལ་སྨན་པ་དང་བདེ་བའི་སླད་དུ་བཅོམ་ལྡན་འདས་ཀྱིས་སངས་རྒྱས་ཀྱི་ཉི་མའི་འོད་ཟེར་ཆེན་པོ་མཐའ་ཡས་པ་རབ་ཏུ་དགྱེ་བར་གསོལ། སྤྲིན་ཆེན་པོའི་གློག་འགྱུ་བ་དང་ལྡན་པ་ལ་འཇུག་པའི་རྣམ་པ་ཞེས་བགྱི་བའི་ཆོས་ཀྱི་སྒོ་བཅུ་བཅོམ་ལྡན་འདས་ཀྱིས་བཤད་དུ་གསོལ། བཅོམ་ལྡན་འདས་ཀྱིས་བཀའ་སྩལ་པ། རླུང་གི་མཐུ་དང་མཉམ་པའི་ཤུགས་ཀྱི་གློག་གི་འོད་འགྱུ་བའི་རྒྱལ་པོ་ཞེས་བྱ་བ་དང་། ཡེ་ཤེས་ཤིན་ཏུ་རྣོ་བ་ཞེས་བྱ་བ་དང་། ཡེ་ཤེས་མངོན་པར་གཏན་ལ་འབེབས་པའི་རྒྱལ་པོ་ཞེས་བྱ་བ་དང་། ལྷན་ཅིག་འཇུག་པའི་ཤུགས་ཀྱིས་སྒྲ་བསྒྲགས་པའི་རྒྱལ་པོ་ཞེས་བྱ་བ་དང་། རྒྱ་མཚོའི་རླབས་གཡོ་བ་ལ་མཁས་པའི་རྒྱལ་པོ་ཞེས་བྱ་བ་དང་། ཆོས་འདོད་ཅིང་རབ་ཏུ་བསྲུངས་པ་ཞེས་བྱ་བ་དང་། ནོར་གྱིས་རྒྱལ་བའི་མཚམས་སྦྱོར་བ་ལ་མཁས་པའི་རྒྱལ་པོ་ཞེས་བྱ་བ་དང་། ཆོས་ཀྱི་རྔ་བོ་ཆེ་དུག་གནོན་པའི་སྨན་གྱི་རྒྱལ་པོ་ཞེས་བྱ་བ་དང་། ཤིན་ཏུ་མཛེས་པས་སྟོན་པ་སྟོབས་དང་ལྡན་པར་བྱེད་པ་ཞེས་བྱ་བ་དང་། མུན་པ་དང་ཆབ་རོམ་ལྟ་བུའི་ཉོན་མོངས་པའི་རྩ་བ་རྣམ་པར་སྒྲོགས་པ་ལ་རྣམ་པར་འཕྲུལ་པའི་རྒྱལ་པོ་ཞེས་བྱ་བ་སྟེ། བཅུ་པོ་དེ་དག་ནི་སྤྲིན་ཆེན་པོའི་གློག་འགྱུ་བ་དང་ལྡན་པ་ལ་འཇུག་པའི་རྣམ་པར་འཕྲུལ་བ་ཞེས་བྱ་བའི་ཆོས་ཀྱི་སྒོ་ཡིན་ནོ། །དེ་ནས་དེའི་ཚེ་ལྷ་མོ་ཤུགས་ལྡན་མ་ཞེས་བྱ་བས་བཅོམ་ལྡན་འདས་ལ་མཆོད་པ་བྱས་ནས་ཚིགས་སུ་བཅད་པ་འདི་དག་སྨྲས་སོ། །ང་རྒྱལ་མི་མངའ་བསྙེངས་མི་མངའ། །ཐུགས་རྗེར་ལྡན་ཞིང་སྐྱོན་མི་མངའ། །དཔའ་བོ་ཐབས་ལ་མཁས་པ་སྟེ། །འཇིག་རྟེན་ཀུན་དང་འཐུན་པར་འཇུག །དེ་རིང་ཁྱོད་ཀྱི་གཟི་བརྗིད་ཀྱིས། །འཇིག་རྟེན་འཐུན་པ་བདག་གིས་བསླབས། །བསམ་གྱིས་མི་ཁྱབ་བསམ་ཡས་ལྷ། །དེ་བཞིན་གཤེགས་པ་མཚུངས་མེད་མཚུངས། །སེམས་ཅན་རྣམས་ལ་སྨན་སླད་དུ། །ཆོས་རྣམས་སྣ་ཚོགས་སྟོན་པ་མཛད། །སྤྲིན་ཆེན་པོའི་གློག་འགྱུ་བ་དང་ལྡན་ཞིང་མུན་པ་འཇོམས་པའི་གླེང་གཞིའི་ལེའུ་ཞེས་བྱ་སྟེ་བཅུ་གསུམ་པའོ།།