Degé Kangyur volume 62, F.297.a

རྗེ་དང་ལྡན་པ་ལགས་ཏེ། སེམས་ཅན་ཐམས་ཅད་ལ་སྨན་པ་དང་། ཐུགས་བརྩེ་བ་ཅན་ལགས་ན། བཅོམ་ལྡན་འདས་བདུད་ཀྱི་གནས་ཐམས་ཅད་རབ་ཏུ་གཡོས་ཏེ། བདག་ཀྱང་མྱ་ངན་གྱི་ཟུག་རྔུས་ཟུག་ལགས་ཀྱིས། བཅོམ་ལྡན་འདས་ཡང་ཆོས་ཀྱི་རྣམ་གྲངས་འདི་མི་བཤད་པར་གསོལ། བཅོམ་ལྡན་འདས་བདག་གིས་ཀྱང་ཆོས་ཀྱི་རྣམ་གྲངས་འདི་ཅི་ནས་འཛམ་བུའི་གླིང་དུ་སྤྱོད་པར་མི་འགྱུར་བ་དེ་ལྟར་བགྱིའོ། །​ཅི་ནས་ཆོས་ཀྱི་རྣམ་གྲངས་འདི་སུ་ཡང་འཛིན་པར་མི་འགྱུར། འཆང་བར་མི་འགྱུར། ཀུན་ཆུབ་པར་བགྱིད་པར་མི་འགྱུར་བ་དེ་ལྟ་བུར་ཡང་བགྱིའོ། །​ཅི་ནས་ཆོས་ཀྱི་རྣམ་གྲངས་འདི་ལ་ལམ་ངན་པར་འདུ་ཤེས་པར་འགྱུར་བར་ཡང་བགྱིའོ། །​དེ་དག་ཤིན་ཏུ་རྒྱས་པའི་མདོ་སྡེ་དག་ལ་ལོག་པར་ལྟ་བའི་འདུ་ཤེས་སུ་འགྱུར་བར་ཡང་བགྱིའོ། །​དགེ་སློང་དེ་དག་ཅི་ནས་ཆོས་ཀྱི་རྣམ་གྲངས་འདི་སྤོང་བར་འགྱུར་བའི་ཀུན་ནས་དཀྲིས་པ་འགའ་འབྱུང་བར་ཡང་བགྱིའོ། །​དེ་ནས་སངས་རྒྱས་ཀྱི་མཐུས་ལྷའི་དབང་པོ་བརྒྱ་བྱིན་བཅོམ་ལྡན་འདས་ཀྱི་སྤྱན་སྔར་འདུག་ནས། དེས་བཅོམ་ལྡན་འདས་ཀྱི་ཞབས་ལ་མགོ་བོས་ཕྱག་འཚལ་ཏེ། བཅོམ་ལྡན་འདས་ལ་མེ་ཏོག་མན་དཱ་ར་བ་དག་གིས་གཏོར་ནས། བཅོམ་ལྡན་འདས་ལ་འདི་སྐད་ཅེས་གསོལ་ཏོ། །​བཅོམ་ལྡན་འདས་གལ་ཏེ་བདུད་སྡིག་ཅན་ཆོས་ཀྱི་རྣམ་གྲངས་འདི་ནུབ་པར་བགྱིད་པའི་སླད་དུ་རྩོལ་བར་གྱུར་ན། བཅོམ་ལྡན་འདས་བདག་གིས་ཆོས་ཀྱི་རྣམ་གྲངས་འདི་གཟུང་བར་བགྱི། བཅང་བར་བགྱི། ཀུན་ཆུབ་པར་བགྱིའོ། །​བཅོམ་ལྡན་འདས་དང་བཙུན་པ་ཀུན་དགའ་བོ་ཡོངས་སུ་མྱ་ངན་ལས་འདས་པའི་འོག་ཏུ་ཡང་བདག་གིས་ཆོས་ཀྱི་རྣམ་གྲངས་འདི་འཛམ་བུའི་གླིང་དུ་སྤྱོད་པར་འགྱུར་བར་བགྱིའོ། །​ཆོས་སྨྲ་བ་དེ་ལ་ཡང་རྒྱལ་པོ་ཆེན་པོ་བཞི་གནོད་སྦྱིན་གྱི་ཚོགས་ཀྱི་འཁོར་དང་བཅས་པ་རྣམས་བསྲུང་བ་དང་། བསྐྱབ་པ་དང་། སྦ་བར་བགྱིད་དུ་སྩལ་བར་འཚལ་ཏེ། ཆོས་ཀྱི་རྣམ་གྲངས་འདི་འཛིན་པ་དང་། འཆང་བ་དང་། ཀློག་པ་དང་། ཀུན་ཆུབ་པར་བགྱིད་པ་གང་ལགས་པ་དེ་ལ་བདག་གིས་ཀྱང་བསྲུང་བ་དང་། བསྐྱབ་པ་དང་། སྦ་བར་འཚལ་ལོ། །​དེ་ནས་བཅོམ་ལྡན་འདས་ཀྱིས་ཚེ་དང་ལྡན་པ་ཀུན་དགའ་བོ་ལ་བཀའ་སྩལ་པ། ཀུན་དགའ་བོ་ཁྱོད་ཀྱིས་ཆོས་ཀྱི་རྣམ་གྲངས་འདི་ཟུང་ཤིག །​ཆོངས་ཤིག །​ལྷོགས་ཤིག །​ཀུན་ཆུབ་པར་གྱིས་ཤིག །​གཞན་དག་ལ་ཡང་རྒྱ་ཆེར་སྟོན་ཅིག །



The English translation of this folio by 84000 Translating the words of the Buddha can be found at:
https://read.84000.co/translation/toh218.html?part=UT22084-062-018-228#UT22084-062-018-228