Degé Kangyur volume 62, F.288.b

པ་སྐྱེད་པ་དང་། །​སེང་གེ་རྣམ་པར་འཕྲུལ་བ་སྤོང་བགྱིད་ཅིང་། །​ཝ་ཡི་ཆོས་ཀྱི་དགའ་བ་སྐྱེད་པ་ལྟར། །​དེ་བཞིན་གང་དག་ཉན་ཐོས་ཁྲོད་དག་ཏུ། །​སྐྱེས་བུ་ཁྱུ་མཆོག་སེང་གེ་རྣམ་འཕྲུལ་མཐོང་། །​ཐེག་པ་དམན་ལ་དགའ་བ་སྐྱེད་པ་ནི། །​དེ་དག་ཕྱོགས་གཅིག་པ་ཡི་རྫུ་འཕྲུལ་ལགས། །​ཡེ་ཤེས་འཚལ་བའི་མིས་ནི་དུས་ཀུན་ཏུ། །​འཇིག་རྟེན་ཀུན་ཏུ་སྡུག་བསྔལ་མང་འགྲེལ་བ། །​ཉན་ཐོས་མང་པོའི་ས་མིན་གང་ལགས་པ། །​ཡེ་ཤེས་དམ་པ་མཆོག་ནི་བཙལ་བར་བགྱི། །​དེ་ནས་དགེ་སློང་དྲི་མེད་འོད་ཀྱི་ཚིགས་སུ་བཅད་པ་སྤོབས་པ་སྨྲས་པ་འདི་ཐོས་ནས། ལྷའི་བུ་བཞི་ཁྲི་ཉིས་སྟོང་བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་སེམས་བསྐྱེད་ནས། དེ་དག་གིས་བཅོམ་ལྡན་འདས་དང་། འཇམ་དཔལ་གཞོན་ནུར་གྱུར་པ་དང་། དགེ་སློང་དྲི་མེད་འོད་ལ་མེ་ཏོག་མན་དཱ་ར་བ་དག་གིས་གཏོར་ཏེ། ཚིག་འདི་སྐད་ཅེས་སྨྲས་སོ། །​དགེ་སློང་ལེགས་སོ་ལེགས་སོ། །​འདི་ལྟར་སངས་རྒྱས་ཀྱི་བྱང་ཆུབ་རྗེས་སུ་འཛིན་པ་འདི་ནི་དེ་བཞིན་གཤེགས་པ་ལ་བྱས་པ་གཟོ་བ་ཉིད་ཡིན་ནོ། །​དེ་ནས་བཅོམ་ལྡན་འདས་ཀྱིས་དེའི་ཚེ་འཛུམ་པ་མཛད་དོ། །​འདི་ནི་སངས་རྒྱས་བཅོམ་ལྡན་འདས་རྣམས་ཀྱི་ཆོས་ཉིད་དེ། ནམ་འཛུམ་པ་མཛད་པ་དེའི་ཚེ་བཅོམ་ལྡན་འདས་ཀྱི་ཞལ་གྱི་སྒོ་ནས་འོད་འཕྲོ་བ་འདི་ལྟ་སྟེ། སྔོན་པོ་དང་། སེར་པོ་དང་། དམར་པོ་དང་། དཀར་པོ་དང་། བཙོད་ཀ་དང་། ཤེལ་དང་། དངུལ་གྱི་ཁ་དོག་ལྟ་བུ་ཁ་དོག་དུ་མ་དང་། ཁ་དོག་སྣ་ཚོགས་བྱུང་སྟེ། དེ་དག་གིས་འཇིག་རྟེན་གྱི་ཁམས་མཐའ་ཡས་མུ་མེད་པ་དག་འོད་ཀྱིས་ཁྱབ་པར་བྱས་ནས། ཚངས་པའི་འཇིག་རྟེན་གྱི་བར་དུ་སོང་སྟེ། ཉི་མ་དང་ཟླ་བའི་འོད་ཀྱང་མོག་མོག་པོར་བྱས་ནས་ཕྱིར་ལོག་སྟེ། བཅོམ་ལྡན་འདས་ལ་ལན་གསུམ་བསྐོར་བ་བྱས་ནས། བཅོམ་ལྡན་འདས་ཀྱི་དབུའི་གཙུག་ཏུ་མི་སྣང་བར་གྱུར་ཏོ། །​དེ་ནས་ཚེ་དང་ལྡན་པ་ཀུན་དགའ་བོ་སྟན་ལས་ལངས་ཏེ་ཆོས་གོས་ཕྲག་པ་གཅིག་ཏུ་བགོས་ནས་པུས་མོ་གཡས་པའི་ལྷ་ང་ས་ལ་བཙུགས་ཏེ། བཅོམ་ལྡན་འདས་ག་ལ་བ་དེ་ལོགས་སུ་ཐལ་མོ་སྦྱར་བ་བཏུད་ནས་བཅོམ་ལྡན་འདས་ལ་འདི་སྐད་ཅེས་གསོལ་ཏོ། །​བཅོམ་ལྡན་འདས་དེ་བཞིན་གཤེགས་



The English translation of this folio by 84000 Translating the words of the Buddha can be found at:
https://read.84000.co/translation/toh218.html?part=UT22084-062-018-211#UT22084-062-018-211