བྱང་ཆུབ་སེམས་དཔའ་བྱེ་བ་ཕྲག་དྲུག་ཅུས་ཡོངས་སུ་བསྐོར་ཏེ་མདུན་དུ་བདར་ནས་ལྷན་ཅིག་ཏུ་རིན་པོ་ཆེ་བཀོད་པའི་འཁོར་གྱི་ཁྱམས་ག་ལ་བ་དེར། བཅོམ་ལྡན་འདས་ག་ལ་བ་དེར་འོངས་ཏེ་ལྷགས་ནས། བཅོམ་ལྡན་འདས་ཀྱི་སྤྱན་སྔར་སྟེང་གི་བར་སྣང་ལ་ཏ་ལ་བདུན་སྲིད་ན་འཁོད་ནས་ཐལ་མོ་སྦྱར་ཏེ། སྟོང་གསུམ་གྱི་སྟོང་ཆེན་པོའི་འཇིག་རྟེན་གྱི་ཁམས་འདི་ཐམས་ཅད་དབྱངས་ཀྱིས་གོ་བར་བྱེད་ཅིང་། བཅོམ་ལྡན་འདས་ལ་ཚུལ་དང་འདྲ་བའི་ཚིགས་སུ་བཅད་པ་འདི་དག་གིས་མངོན་པར་བསྟོད་དོ། །རྡུལ་མེད་རྡུལ་དང་བྲལ་བ་དཔའ་བོ་འདོད་ཆགས་བྲལ། །ཡེ་ཤེས་རབ་རིབ་མི་མངའ་སྤྱན་གསུམ་རྣམ་པར་སྦྱངས། །སྐྱོན་རྣམས་བསལ་བ་དྲི་མ་གསུམ་དང་ཐ་བ་སྤངས། །རྡུལ་བྲལ་སངས་རྒྱས་ཐུགས་རྗེ་ཅན་ལ་ཕྱག་འཚལ་ལོ། །འཇིགས་དང་བྲལ་ཞིང་གཏི་མུག་དྲ་བ་རྣམ་པར་བསལ། །སྟོབས་བཅུ་རྒོལ་བའི་ཚོགས་ཀྱིས་ཤིན་ཏུ་ཐུལ་བར་དཀའ། །ལོག་པའི་ལམ་ཞུགས་ཕ་རོལ་ཚོགས་སྐྲག་མཛད། །སེང་གེ་ལྟ་བུར་བསྙེངས་པ་མི་མངའ་ས་ལ་གཤེགས། །ལྷ་ཡུལ་ས་སྟེང་ན་ཡང་སྐྱོན་རྣམས་ཀུན་དང་བྲལ། །ཁྱོད་ཀྱི་ཡན་ལག་དྲི་མ་མི་མངའ་ལམ་མེར་བཞུགས། །མུན་དང་རབ་རིབ་མ་རིག་ལེགས་པར་རབ་བསལ་ནས། །སྤྲིན་གྱི་དྲ་བ་ལས་གྲོལ་ཉི་མ་བཞིན་དུ་ལྷམ། །འགྲོ་བ་འདི་རྣམས་མགོན་སྐྱབས་མེད་ཅིང་སྡུག་བསྔལ་གྱུར། །རྒ་དང་འཆི་བས་མནར་ཅིང་གནས་སྐབས་མ་མཆིས་ལ། །སེམས་ཅན་མཆོག་གིས་ཐུགས་བརྩེ་ཐུགས་རྗེ་བསྐྱེད་མཛད་ནས། །སྨན་པ་བཞིན་དུ་རབ་ཏུ་གྲོལ་བར་མཛད་ཅིང་གཤེགས། །མ་རིག་པ་དང་གཏི་མུག་སྲིད་མཚོ་རྒལ་དཀའ་བ། །ཉོན་མོངས་རྣམ་རྟོག་རྣམ་མངའ་དབའ་ཀློང་མང་པོ་ལས། །གཞན་ལས་མ་གསན་པར་ནི་བདག་ཉིད་རབ་རྒལ་ཏེ། །པད་མོ་བཞིན་དུ་ཆགས་པ་མི་མངའ་རྣམ་པར་གཤེགས། །ཆོས་འདི་ཐམས་ཅད་རང་བཞིན་གྱིས་ནི་བདག་མ་མཆིས། །བྲག་ཅ་སྒྲ་སྐད་བཞིན་དུ་བསྟེན་ནས་འབྱུང་བ་ལགས། །མ་བགྱིས་བྱེད་པ་པོ་དང་ཚོར་བ་མ་མཆིས་པར། །འཇིག་རྟེན་མགོན་པོ་སེམས་ཅན་ཕན་ཕྱིར་རབ་ཏུ་གསུངས།