།སེམས་ཅན་དག་གི་བསམ་པ་ཚད་མེད་ཤེས། །སྐད་ཅིག་གཅིག་གིས་མཐའ་ཡས་ཞིང་དུ་འགྲོ། །ཚད་མེད་པ་ཡི་དེ་བཞིན་གཤེགས་མཐོང་ནས། །དེ་དག་ལས་ཐོས་ཆོས་ནི་འཛིན་པར་བྱེད། །ཐོས་ནས་དེ་ནི་དེ་བཞིན་དོན་ཀྱང་རྟོགས། །སེམས་ཅན་ཚད་མེད་ཡོངས་སུ་སྨིན་པར་བྱེད། །དེ་དག་གི་ནི་སྤྱོད་པ་ཚད་མེད་ཤེས། །དྲན་དང་ལྡན་པ་གང་ཡིན་བག་ཡོད་པའོ། །རྟག་ཏུ་བདག་གི་ཁར་ལས་བག་ཡོད་པ། །རང་སེམས་ངེས་པར་སེམས་པ་ཡོན་ཏན་འཇུག །སེམས་ལ་ངེས་སེམས་ཉོན་མོངས་ཡོད་མ་ཡིན། །དེ་ནི་ནམ་དུའང་ཡུལ་གྱིས་ཉམས་པ་མེད། །སྐྱེ་དང་གནས་དང་འཇིག་པ་ཤེས་པ་ནི། །ཉེ་བར་ལེན་པ་ཀུན་ལས་སེམས་དབེན་ཏེ། །ལྷག་མཐོང་དང་ནི་ཞི་གནས་ལ་ཡང་མཁས། །དེ་ཡི་སྒྲུབ་པ་ཉམས་པར་མི་འགྱུར་རོ། །ཤིན་ཏུ་ཞི་ཞིང་དུལ་སེམས་ལས་སུ་རུང་། །རྟག་ཏུ་དྲང་ཞིང་གཡོ་མེད་ཡོན་པོ་མིན། །ཚུལ་འཆོས་མེད་ཅིང་མཉེན་ལ་དེས་པ་སྟེ། །འདི་ནི་ངེས་པར་སེམས་པའི་ཕན་ཡོན་ནོ། །སྟོང་པ་མཚན་མེད་སྨོན་པ་མེད་ཅིང་དབེན། །འཁོར་བ་སྡུག་བསྔལ་བ་དང་མི་རྟག་ཤེས། །རྟག་ཏུ་ཆོས་བདག་མེད་ཅིང་མྱ་ངན་འདས། །ངེས་པར་སེམས་པའི་སེམས་སྤྱོད་བག་ཡོད་པའོ། །རྟག་ཏུ་ཐམས་ཅད་མཁྱེན་པའི་སེམས་འཛིན་ཅིང་། །སེམས་ཅན་རྣམས་ལ་བྱམས་པའི་སེམས་མཉམ་པ། །སྙིང་རྗེས་སེམས་ཅན་རྣམས་ནི་མི་གཏོང་ཞིང་། །དགའ་བས་འཁོར་བ་ན་ནི་སྐྱོ་བ་མེད། །བཏང་སྙོམས་ཆེན་པོ་སྐྱོན་རྣམས་སྤངས་པ་སྟེ། །ཀུན་གཏོང་འདོད་ཆགས་བྲལ་བ་འདོད་པ་མེད། །སྦྱངས་པ་ཐམས་ཅད་དང་ནི་མི་གཡེང་བསྙེན། །བྱས་དང་མ་བྱས་བཟོད་པས་ཇི་མི་སྙམ། །སེམས་ཅན་ཐར་བར་བྱ་ཕྱིར་ངོམས་མེད་སེམས། །དེ་ནི་རྩོམ་པ་བརྟན་པར་ཞི་བ་ཚོལ། །ལུས་དང་སྲོག་ལའང་དེ་ནི་མི་ལྟ་ཞིང་། །ཏིང་འཛིན་ཀུན་ལ་རིམ་གྱིས་བསམ་གཏན་བྱེད། །ཏིང་འཛིན་དབང་གིས་དེ་ནི་སྐྱེས་མ་ཡིན། །ཤེས་རབ་ཀྱིས་ནི་འདུས་མ་བྱས་ཤེས་ཀྱང་། །ཐབས་ཀྱིས་འདུས་མ་བྱས་པར་དེ་མི་ལྟུང་།