ཡོན་ཏན་ཐམས་ཅད་རབ་ཏུ་མཁྱེན། །སངས་རྒྱས་བསྟན་པ་རྒྱ་ཆེ་བ། །རྐང་གཉིས་གཙོ་བོས་བཤད་དུ་གསོལ། །སེམས་ཅན་རྣམས་ཀྱི་སྨིན་པ་དང་། །ཇི་ལྟར་མི་རྣམས་འཚང་རྒྱ་བ། །ཉོན་མོངས་གང་གིས་ཉོན་མོངས་པས། །མི་མཁས་འཁོར་བར་རབ་ཏུ་འཁོར། །མི་རྣམས་གང་གིས་ཉོན་མོངས་པ། །ཉོན་མོངས་དེ་དག་ཁྱོད་ཀྱིས་མཁྱེན། །དེ་ཡི་ལམ་དང་བསམ་པ་རྣམས། །འདྲེན་པ་ཁྱོད་ཀྱིས་རྣམ་པར་མཁྱེན། །ཇི་ལྟར་ཏིང་འཛིན་འབྱུང་བ་དང་། །བྱུང་ནས་ཇི་ལྟར་གནས་པ་དང་། །ཇི་ལྟར་དེ་ལས་ལྡང་བ་རྣམས། །སྟོན་པ་ཁྱོད་ཀྱིས་རབ་ཏུ་མཁྱེན། །བསམ་གཏན་རྣམས་དང་ཚད་མེད་པ། །ཇི་སྙེད་ཏིང་ངེ་འཛིན་རྣམས་དང་། །ཞི་གནས་དང་ནི་ལྷག་མཐོང་རྣམས། །རྣམ་པ་ཐམས་ཅད་ཤིན་ཏུ་མཁྱེན། །ཇི་ལྟར་ཆོས་ལ་འདོགས་པ་དང་། གང་གི་རྐྱེན་གྱིས་བཤད་པ་ཡང་། །དེ་ཡང་སྟོན་པས་རབ་མཁྱེན་ཏེ། །དེ་ལ་ཐེ་ཚོམ་མི་མངའ་ཁྱོད། །ཁྱོད་ཀྱིས་བསྐལ་པ་བྱེར་སྤྱད་པས། །ཡེ་ཤེས་འདི་ལས་ངེས་པར་འབྱུང་། །སྟོན་པས་སྟོབས་ཀྱི་མཐུ་ཡང་བརྙེས། །དྲང་སྲོང་ཆེན་པོ་སྟོབས་དང་ལྡན། །བསྐལ་པ་སྟོང་ཕྲག་བྱེ་བ་ཡི། །བདག་དང་ཕ་རོལ་རྣམས་ཀྱི་ཡང་། །སྤྱོད་པ་དཔག་ཏུ་མ་མཆིས་ཤིང་། །བསམ་གྱིས་མི་ཁྱབ་ཐམས་ཅད་མཁྱེན། །གང་དུ་བྱང་ཆུབ་ཅི་འདྲ་བ། །སྐྱེ་བ་ཐམས་ཅད་དུ་ཡང་འཇུག །དེ་དག་མ་ལུས་འདྲེན་པ་ཡིས། །ཇི་ལྟ་བུ་ཡང་རབ་ཏུ་མཁྱེན། །གང་དུ་ཇི་འདྲ་སྐྱེ་བ་དང་། །གང་དུ་རིགས་ཀྱང་ཅི་འདྲ་བ། །ཇི་ལྟར་ཀུན་དུ་སྤྱད་པ་རྣམས། །དེ་དག་འདྲེན་པས་རབ་ཏུ་མཁྱེན། །ཐ་མའི་ཆོས་རྣམས་ཅི་འདྲ་བ། །འདྲེན་པས་འཁོར་བ་དེ་རྣམས་ཀྱང་། །འགྲོ་བ་གང་དུ་སྐྱེ་བ་ནི། །དེ་བཞིན་གཤེགས་པས་རབ་ཏུ་མཁྱེན། །ཅི་འདྲ་བ་ཡི་ཡེ་ཤེས་ཀྱིས། །སྔོན་ཆད་རྣམ་པར་ལུང་བསྟན་པ། །མཁས་པ་ཁྱོད་ཀྱིས་དེ་མཁྱེན་པས། །དེ་ལ་ཐེ་ཚོམ་མི་མངའ་ཁྱོད། །ཚུལ་ཁྲིམས་གང་དང་ཆོས་གང་དང་། །ཅི་འདྲའི་སྤྱོད་པ་སྤྱད་པ་དང་། །ཡེ་ཤེས་གང་ལ་ཞུགས་པ་ཡང་། །དེ་དག་འདྲེན་པས་རབ་ཏུ་མཁྱེན།