Degé Kangyur volume 31, F.84.a

བཅུར་རློམ་སེམས་སུ་མི་བྱེད། དེ་བཞིན་དུ་མི་འཇིགས་པ་བཞི་དང་། སོ་སོ་ཡང་དག་པར་རིག་པ་བཞི་དང་། བྱམས་པ་ཆེན་པོ་དང་། སྙིང་རྗེ་ཆེན་པོ་དང་། སངས་རྒྱས་ཀྱི་ཆོས་མ་འདྲེས་པ་བཅྭ་བརྒྱད་དུ་རློམ་སེམས་སུ་མི་བྱེད། དེ་བཞིན་དུ་རྒྱུན་ཏུ་ཞུགས་པའི་འབྲས་བུའི་བར་དུ་རློམ་སེམས་སུ་མི་བྱེད་པ་ནས་དགྲ་བཅོམ་པའི་བར་དུ་རློམ་སེམས་སུ་མི་བྱེད། དེ་བཞིན་དུ་རང་བྱང་ཆུབ་ཏུ་རློ་མ་སེམས་སུ་མི་བྱེད། བླ་ན་མེད་པ་ཡང་དག་པར་རྫོགས་པའི་བྱང་ཆུབ་ཏུ་རློམ་སེམས་སུ་མི་བྱེད་པ་སྟེ། ཤ་ར་དྭ་ཏིའི་བུ་དེ་ལྟར་ན་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པས་རྣམ་པར་འཕེལ་བ་ན། བྱང་ཆུབ་ཀྱི་ལམ་དུ་འགྲོ་ཞིང་བྱང་ཆུབ་སེམས་དཔའི་སྐྱོན་མེད་པ་ལ་ཡང་འཇུག་ལ། སུས་ཀྱང་ཐུལ་བར་མི་ནུས་པ་ཡིན་ནོ། །​ཤ་ར་དྭ་ཏིའི་བུ་གཞན་ཡང་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་རབ་ཀྱི་ཕ་རོལ་ཏུ་ཕྱིན་པ་ལ་གནས་ནས། ཐམས་ཅད་མཁྱེན་པའི་ཡེ་ཤེས་ཡོངས་སུ་རྫོགས་པར་བྱེད་དེ། ཤེས་པ་གང་དང་ལྡན་ནམ་ཡང་ངན་སོང་རྣམས་སུ་རབ་ཏུ་མི་ལྟུང་ཞིང་མི་རྣམས་ཀྱི་ནང་དུ་ཉམས་པར་མི་འགྱུར་ལ། དབུལ་པོར་མ་ཡིན་པ་དང་། ལུས་གང་དང་ལྡན་ན་ལྷ་དང་མི་དང་ལྷ་མ་ཡིན་གྱི་འཇིག་རྟེན་གྱིས་སྨད་པར་འགྱུར་བའི་ལུས་དེ་ལྟ་བུ་ཡོངས་སུ་འཛིན་ཏོ། །​དེ་སྐད་ཅེས་བཀའ་སྩལ་པ་དང་། བཅོམ་ལྡན་འདས་ལ་ཚེ་དང་ལྡན་པ་ཤ་ར་དྭ་ཏིའི་བུས་འདི་སྐད་ཅེས་གསོལ་ཏོ། །​བཙུན་པ་བཅོམ་ལྡན་འདས་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་པ་གང་དང་ལྡན་ན། ནམ་ཡང་ངན་སོང་རྣམས་སུ་མི་ལྟུང་བ་དང་། ལྷ་དང་མི་དང་ལྷ་མ་ཡིན་གྱི་འཇིག་རྟེན་གྱིས་སྨད་པར་མི་འགྱུར་བར་ཤེས་པ་གང་ལགས། བཅོམ་ལྡན་འདས་ཀྱིས་བཀའ་སྩལ་པ། ཤ་ར་དྭ་ཏིའི་བུ་བྱང་ཆུབ་སེམས་དཔའ་སེམས་དཔའ་ཆེན་པོ་ཤེས་པ་གང་དང་ལྡན་ན། ཤར་ཕྱོགས་ཀྱི་འཇིག་རྟེན་གྱི་ཁམས་གང་གཱའི་ཀླུང་གི་བྱེ་མ་སྙེད་དག་ན། དེ་བཞིན་གཤེགས་པ་དགྲ་བཅོམ་པ་ཡང་དག་པར་རྫོགས་པའི་སངས་རྒྱས་གང་གཱའི་ཀླུང་གི་བྱེ་མ་སྙེད་དག་མཐོང་ཞིང་དེ་དག་ལས་ཆོས་ཀྱང་ཉན་ལ། སངས་རྒྱས་བཅོམ་ལྡན་འདས་དེ་



The English translation of this folio by 84000 Translating the words of the Buddha can be found at:
https://read.84000.co/translation/toh11.html?part=UT22084-031-002-4914#UT22084-031-002-4914